Read Mongondow AMSAL 18 Bible Online

AMSAL 18 - Mongondow bible

AMSAL 18

¹Intau inta tumontaní nongkon intau ibanea mangaḻenea in tongá morai kon awaknea tontaní; bayongan in tosingogon in intau bayowannea.

²Intau bodok doíbí motarima kon tonggina; sia in tongábí moibog mopotaau onu in kon bonu in ginanea.

³Dosa bo kahinaan in mayá moyotakin; aka oyúondon in bogit, yo notantú bidon kon singkuḻeon.

⁴Tosingogon in intau in naonda bo pangkoi in kobobijaksana, modaḷom naonda bo baḷangon, moonow ná tubig inta moiḻig.

⁵Diábí mopia in moduḷu kon intau moromú bo mondorot kon intau inta diá kotaḷá.

⁶Aka intau bodok mosingog, mokopomuká in sia kon ropatoi bo mopoigum sambokon.

⁷Tosingogon in intau bodok mokorimumud kon inia tontaní; sia in moibaaḷ kon singognea tontaní.

⁸Moponapud tua in mopiabí in korasaan; intau moibog moḻiom kon tua.

⁹Intau inta maḷat in mogaid kon oaidannea notongkaibí in koraatnea in intau inta moibog momoguyaat.

¹⁰Ki TUHAN tua in notongkaibí in ḷangkeang inta moropot; kon tua in bayáan in intau motuḻid bo mokouḻí kon tampat inta moaman.

¹¹Táe intau nooyúon mosangka kon kaoyúonanneabí in moḷukad kon inia naonda bo dinding moḷantud bo moropot kon ḻibu in kotá.

¹²Intau inta moḷoḷatú in moḷabúbí, intau inta moompá in dodia in horomatonbí.

¹³Motubag kon dodai in diápa mokidongog in aidbí inta mobodok bo mokooyá.

¹⁴Popisí in ibog mobiag, intau in mokopotaanbí kon roriga; moinggamá in ibog tatua, moinggamá doman in bayongan kamang.

¹⁵Intau mopia in tantúbí moibog in sinotaau; intau mobijaksana in umuranbí moibog mokouḻí kon totundú.

¹⁶Tombuinag momukat kon daḷan bo mogatod kon intau mayá kon intau mita moḷoben.

¹⁷Intau inta mosingog muna kon bonu in sidang pongadilan umuranbí koontongan ná mobanar, táe onu in siningognea pangkoiondon ujion aka moiangoidon in ḷawangnea.

¹⁸Pongin undian, ropatoi motaau tompiaan bui, nodapot in bobayowan kon sigad in intau nongawasa in motaaubí doman paḷuton.

¹⁹Mogampa-gampangbí in dimiug kon kotá inta dininding kinorigon dika in dimiug kon utat inta ain pinosaki in ginanea; Rogenggengan naonda bonoboi in bonawang in kotá inta oyúon in dindingnea.

²⁰Bayongan in tosingogon mita inta siningog oyúonbí in bungai inta korasaan.

²¹Dilá naa in oyúonbí in kawasanea moposaḷamat kon kobiagan andeka momoguyaat; intau in mustibí mobaba kon bungai in tosingogonnea.

²²Intau inta mokouḻí kon buḷoi bobay, mokouḻí kon kauntungan; buḷoi in barakat nongkon i TUHAN.

²³Intau bogá mopoigum takin pia-pia mako; intau nooyúon motubag takin torú.

²⁴Oyúon in yobayat inta diá mosatia, oyúon doman in modagi-dagin nongkon utat.