Read Mongondow AMSAL 2 Bible Online

AMSAL 2 - Mongondow bible

AMSAL 2

¹Abataibí in totundúku mita, adíku, bo umuran torop in tongginaku mita kon inimu.

²Tondudut onda inta mobijaksana bo poḷongasi monotaau kon tua.

³Adíku, poḷongasi mokouḻí kon raian inta mopandoi bo poigum kon pomomangaḻe.

⁴Tayak intua ná motayak kon buḷawan, bo batuk intua ná momatuk kon kapunyaan inta noibuni.

⁵Pongin natua dá kotaauanmudon onu in mangaḻe in motoguondok kon TUHAN bo kotaauanmudon totok in ki Allah.

⁶Ki TUHANbí in mobogoi in hikmat; nongkon i-Niabí intau mokouḻí kon pongotahuan bo komomangaḻe.

⁷Intau inta motuḻid in gina bo inta diá in bogit, tuḷungan-Nea poḷat ḷukadan.

⁸Ki TUHAN in moḷukad kon intau mita inta mongoadil, bo moḷukad kon i monia inta motabi kon i-Nia.

⁹Aka iko bo motoindudui kon inakó, adíku, yo kotaauanmubí onu in moadil, mojujur bo mopia. Kotaauanmu doman naonda in kobobiagmu.

¹⁰Iko in mobaḻíbí mobijaksana, bo sinotaaumu in mokosanangbí kon ginamu.

¹¹Komomangaḻe bo kopopandoimu tua in moḷukad kon inimu,

¹²bo moḷamboi kon inimu dumudui kon kobobiag inta diá mopia, bo mopoyayú doman kon inimu nongkon intau mita inta moraat in bibig.

¹³Mosia in doíbí dumudui kon kobobiag inta mopia; mosia in mongindaḷanbí inta mosindip bo nopuḻing in dosa.

¹⁴Mosia in mokouḻí kon kososanang nongkon aid monia inta moraat.

¹⁵Mosia in motombogá bo kobobiag monia in diá moitutui.

¹⁶Iko, adíku, in mokotaḻingbí kon dondouḷug in bobay sundaḷ inta moḷongasi modondouḷug kon inimu pongin tosingogon mita inta mopia.

¹⁷Bobay tatua in diábí mosatia kon i buḷoinea bo kinoḻionganneadon in dandinea kon i Allah.

¹⁸Aka iko mayá in baḷoinea notongkaibí in mayá in popatoi. Mayá kon inia notongkaibí in mayá kon dunia in intau minatoi.

¹⁹Intau inta mayá kon inia diábí kon dodai in onda in mobui kon daḷan inta mayá in kobiagan.

²⁰Tuamai, adíku, duduiaidon in kobobiag in intau mopia, bo kobiagdon podudui in ibog i Allah.

²¹Sin, intau inta mobiag podudui in ibog i Allah, tuata in intau inta motuḻid in ginanea, mosia tua inta mogutun kon butá inta pinodandi i TUHAN.

²²Táe intau moraat bo binaradosa in pogambat kon ḷuai i Allah nongkon butá tatua, naonda bo bonok irabut nongkon butá.