Read Mongondow AMSAL 21 Bible Online

AMSAL 21 - Mongondow bible

AMSAL 21

¹Naonda bo pononompia i TUHAN kon tubig in ongkag sinbá moiḻig podudui in ibog-Nea, natua doman in pokokapit-Nea kon raian in datu.

²Bayongan aid in intau degá mopiabí in kon bonu in raiannea tontaní, táe ki TUHANbí in moindoi kon makusud in ginanea.

³Oaid inta moadil bo mobanar in mokosanang totok kon gina i TUHAN moiḻiu kon bayongan in sosumba.

⁴Intau moraat tatua in binaradosa, popisí in kinawasa in dodia bo ḷoḷatúnea.

⁵Tomayá in intau morajing in mobogoi in mobarong; pogogaid inta tongá yumombi-yombit mokopoangoi kon kodaitan.

⁶Kaoyúonan inta nouḻí pinongin diá motuḻid ḷagi mobuḻi bo modia kon intau mopobayá in poḷobongan.

⁷Intau moraat in doíbí dumudui kon hukum; sia in mororigabí in romúnea tontaní.

⁸Intau inta kotaḷá, moikaing in daḷannea; intau inta mopia tantú motuḻid in kobobiagnea.

⁹Mogutun kon siku in ḷuntung in mopia-pia in mogutun tobaḷoian in buḷoi bobay inta tantú moibog moropatoi.

¹⁰Intau moraat umuranbí moibog mogaid kon inta moraat; Kon i inekabí diábí in tabinea.

¹¹Hukuman kon intau mononingkuḻe in mobaḻí topotundú kon intau inta diá kopongalaman. Aka intau mopia in toboḷowon, modugang in sia mobijaksana.

¹²Ki Allah Inta Totok in moadil monotaaubí kon onu in mobaḻí kon bonu in baḷoi intau moraat. Sia in mopotabatbí kon i monia dá moyopú in mosia.

¹³Ki ine in doí mokidongog kon amui in intau inta kinodaitan diábí doman pandungonmai aka sia in mopoigum in totuḷung.

¹⁴Sinbá moonow in torú bo napusu, yo uni-unidon mako bo ogoiai in tombuinag.

¹⁵Aka inta moadil in pobayá, dá mosanangbí in gina in intau mopia, táe intau moraat in moondokbí.

¹⁶Intau inta diá dinumudui kon kobobiag inta mopia, notantúbí kon modapot in dunia in intau minatoi.

¹⁷Intau inta moibo-ibog mobarasanang in umuranbí kodaitan; intau inta imibo-ibog in mopomaké in onu inta kon inia yo diábí mobaḻí mooyúon.

¹⁸Aka intau mita hukumon i TUHAN, deemanbí intau mopia, táe intaubí moraat in mokouḻí kon roriga.

¹⁹Maníka bo mogutun kon rawang kayuon, dika in mogutun takin buḷoi bobay inta mounsingog bo tantú tumorú.

²⁰Intau mobijaksana in tantúbí mobiag motompia bo mooyúon; táe intau bodok imibo-ibogbí in mopomaké in kapunyaannea.

²¹Ki ine in umuran mopobayá in inta moadil bo totabian, yo mokouḻíbí kon kobiagan motompia, kahoromatan bo umur moḷanggó.

²²Intau inta mopandoi mokotongodbí in mogagow kon kotá inta iḷukadan in tontara inta mongotorindog; sia in mogumpagbí kon poḷoḷukadan mita inta pongata monia.

²³Sinbá moisimparut kon roriga, yo mustidon mokopoingat in mosingog.

²⁴Intau moḷoḷatú bo mosiḷantud in moibogbí moningkuḻe bo diá koendar.

²⁵Intau maḷat inta doí mogaid; moḻimod kon inia tontaní pongin ibognea.

²⁶Kinoouput in singgai sia in tongábí morai kon onu inta kinoibognea. Táe, intau inta motuḻid in kobobiagnea motaaubí mobogoi in mobarong.

²⁷Ki TUHAN in doíbí kon sosumba in intau inta moraat, apa doman aka pinosumba pinongin makusud inta mokooyá.

²⁸Sakusi inta mouboḷ in diábí pirisayaan; táe tosingogon in intau inta nonotaau in kinobobaḻí in pelekara, in tarimaanbí.

²⁹Intau motuḻid in moyakinbí kon awaknea; intau moraat in diá kooyá.

³⁰Diábí in hikmat, bo pomomangaḻe andeka kobobijaksana inta mononoi kon tayowon in TUHAN.

³¹Umpakabí parang sinontouḷutan in kabaḷo in parang, inta monantú kon kauntungan in ki TUHANbí.