Read Mongondow AMSAL 23 Bible Online

AMSAL 23 - Mongondow bible

AMSAL 23

¹Aka iko ḻimitú mongaan takin intau moḷoben, torop ki ine in sia.[7]

²Aka mobiasa mobarong in pongongaan, yo pondam in ibogmu tatua.

³Dika imibo-ibog in mongaan kon mopia inta inoḷudnea, sin dikabo tongábí monungkuḷ in sia kon inimu.

⁴Dika rumoriga totok sinbá mobaḻí mooyúon. Taḷaaidon in niatmu tatua.

⁵Sin, tongábí tokokiap monag in kapunyaanmu bo modait, naonda bo oyúon in koḻikipnea bo ḷumayug kon toḷungayá naonda bo ḷagapan boniá.

⁶Dika mongaan moyotakin in intau inta morinut. Dika doman moibog in kaanonnea inta mopira.

⁷Sin, sia in moguman, “Igai mongaan; podugangpabí,” bokaka makusudnea in deemanbí natua. Mopia in singognea, táe toposibí in kon ginanea.

⁸Sin dikabo onu inta ain iḻiommu buimu pototuka, bo bayongan in tosingogonmu inta mopia in diá in mangaḻenea.

⁹Dika mononggina kon intau bodok; diábí horomatonnea in tongginamu tatua.

¹⁰Dika mokoimontanmai in momamping kon sigad in butá tonsilai andeka mogamá kon butá kapunyaan in intau uno-unon.

¹¹Sin, ki TUHAN in mototuḷung inta moropot Siabí in motuḷung kon i monia moḷawang kon inimu.

¹²Tondudutbí in totundú in gurumu bo pobalajar totok.

¹³Dikabí moondo-ondok in modidik kon i adímu. Aka sambokonmu uwoy in sia, diábí matoi in sia,

¹⁴sedang bo mosaḷamatbí.

¹⁵Adíku, mosanangbí totok in akuoi aka mobijaksana in iko.

¹⁶Mopiabí in ginaku aka mokodongog kon iko in mopoyaput in singog mita inta moitugat.

¹⁷Dika mointoi kon intau binaradosa. Tantúdon kotoindudui kon i Allah

¹⁸sinbá kobiaganmu moiduduimai in koḷukadan, bo kamangmu in diá mobuḻi.

¹⁹Indongogai, adíku! Pokopobijaksana. Tondudut totu-totuu in kobobiagmu.

²⁰Dika moyobayat in intau moḷoḷangu andeka intau turá,

²¹sin mosia in mobaḻí mobogá. Aka iko tongá mosiug, dá diádon moonggot bo iko in mogiḷambungdon in ḷambung mobera-berak.

²²Duduiaibí in ki amámu; sin, aka diá in sia yo diábí doman in iko. Aka ki inámu in mogoguyangdon, yo poniatabí kon iko in mohoromat kon inia.

²³Totundú inta mobanar, hikmat, topotundú, bo pomomangaḻe — tua komintan in patusbí taḷuion, bo donaaibí potaḷui.

²⁴Guyanga ḷoḷaki mosanangbí aka ki adínea oyúon in raian bo mopia in oaid; mopiabí in ginanea aka ki adínea mobijaksana.

²⁵Igumon mako in ki amá bo ki inámu mopia in ginanea kon inimu; igumon mako in mosanangdon totok in bobay inta nopononggadí kon inimu.

²⁶Tondudut kopira bo duduidon kon kobobiagku, adíku!

²⁷Bobay sundaḷ inta sumundaḷ in poyogaḷapbí inta mokoanib.

²⁸Mosia in moḷabot naonda bo mogogagow bo mokopopisí kon mobayong in ḷoḷaki monuaḻing.

²⁹Kotaauanmu degá mongo onu in mobaḻí kon intau inta monginum kon anggur mobarong, bo inta mokakit in monginum kon inta mokoḷoḷangu? Intau tatua in mobogá bo mororiga. Sia in umuran mobobayowan bo mogamui. Matanea in mopura bo awaknea in kekeban, bokaka tua komintan in motaaubí taḷaannea.

³¹Dikabí mopomayá mako kodondouḷugan in anggur in iko, umpaka batangannea totok in mokoangá bo koontongan mopouḻi-uḻinag kon bonu in galas bo tumuot mopira kon sigogow.

³²Ikoḷom doḷo-doḷom iko in mokorasa kon naonda bo ain sinobak in uḷag mobisa.

³³Matamu in naonda bo oyúon in doriaká, raianmu motombauk bo bibigmu in kinosingo-singognea.

³⁴Korasaanmu in naonda bo kon popod in oigi in kapaḷ inta kon yuak in dagat; uḷumu mopusing bo iko in moibangkauḷu.

³⁵Bo iko in moguman, “Akuoi naa in binongkug bo sinokap in intau, táe diádon kinotoropanku mongo onu in nobaḻí. Kaasí ah, tomposiug totok in akuoi! Modugangpa in akuoi monginum!”