Read Mongondow AMSAL 24 Bible Online

AMSAL 24 - Mongondow bible

AMSAL 24

¹Dikabí mointoi kon intau moraat, bo dika moibog moyobayat monia.

²Mosia in tongábí morai kon inta moraat bo tongá mongonguman kon onu inta mokobodito.

³Tonibuḷoi in pinosindog pinodoyon kon hikmat bo pomomangaḻe.

⁴Bo aka oyúon in sinotaau, dá gopotnea mita in kobonuan mopuḻing in pakakat mita inta koboḻi bo mogaga.

⁵Intau mobijaksana in mokobangka-bangkaḷ nongkon intau inta moropot; sinotaau in moponti-ponting nongkon ropot.

⁶Sin kon tungkuḷ in diápa moparang tomayá in munabí koḷutúon, bo aka mobarong in monononggina, yo modugangbí moḷoben in kamang mountung.

⁷Intau bodok in diábí mokodoḷop kon hikmat. Sia in diábí mokosingog kon onu bo onu aka intau koyogot in mongonguman kon inta moponting.

⁸Intau inta tantú monomayá kon inta moraat, tangoionbí mopoporopatoi.

⁹Pomuḷoi in akaḷ intau bodok in dosabí. Intau inta umuran mopotaḷá kon intau ibanea, kinodoíbí i inekadon.

¹⁰Aka iko kobuḻian in kamang kon dodai in kosisíannea, dá intaubí moyangkó in iko.

¹¹Dikabí moondo-ondok in mopoḷuat kon intau inta ain pinopoḷabúan in hukuman matoi; posaḷamat in intau inta diaandon kon tampat pobambéan.

¹²Motaaubí in iko moguman, “Tua in deemanbí totaauku.” Táe ki Allah in noindoi mako kon inimu. Kinotaauan-Neabí bo adilon-Nea in raianmu. Sia in motuḻí kon intau podudui in aidnea.

¹³Adíku, pokaandon kon biluk, sin mopiabí intua. Sin naonda bo biluk nongkon ḻipú in pasukan, moromimit in kaanon,

¹⁴natua doman in hikmat mopia kon dimukudmu. Aka mobijaksana in iko, mopiabí in singgaimu moiduduimai.

¹⁵Dikabí ná intau moraat inta moyopakat mogagow kon onuka kon intau motuḻid bo mogagow kon baḷoinea.

¹⁶Sin, umpaka intau motuḻid mopobui-buimai moḷabú, umuranbí in sia mobangon bui. Táe, aka intau moraat yo rimumudonbí in bodito.

¹⁷Dikabí mopia in ginamu aka musungmu bo mobodito, bo dikabí moḷunganga in ginamu aka moḷabú in sia.

¹⁸Sin, notantúbí kon ki TUHAN in moindoibí kon aidmu tatua bo anggapon-Nea moraat intua, bo diádon hukumon-Nea in musungmu tatua.

¹⁹Dika moyaat in gina andeka mointoi kon intau moraat.

²⁰Intau moraat in diábí in singgai mopia in kon singgai moiduduimai bo diá doman in kamangnea.

²¹Adíku, kotoguondokbí kon i TUHAN, bo horomatbí in datu. Dika kinodudu-duduiannea kon intau inta moḷawang kon i monia.

²²Intau ná tatua in diábí moonggot bo morimumud, popisí in bodito inta pinoangoi i Allah andeka in datu in deemanbí pelekara mointok.

²³Intau inta moarip nokoimontandon in noguman nanaa: Hakim in diábí motaau in mobogat kon toḷosi.

²⁴Aka intau kotaḷá bo pinoniata kon diá kotaḷá, dá hakim tatua in odi-odianbí bo ibo-ibotan in bayongan intau.

²⁵Táe hakim inta mohukum kon intau kotaḷá in mosanangbí bo horomaton.

²⁶Tubag inta moitugat in nobaḻí tomponuot kon yoyobayatan inta mopia.

²⁷Dikapa monoimbotú kon tonibuḷoi aka diápa muna nosadia kon gobámu bo oyúon kototayak.

²⁸Dikabí mobaḻí sakusi kon intau ibanea aka diá in dodoyonan inta morigon; dika doman monguboḷ kon tumpaḷa intau.

²⁹Dika moguman, “Tuḻíankubí in onu inta ain pinopoaidnea kon i nakó!”

³⁰Nokoimontandon in akuoi in nongin gobá in intau maḷat bo gobá in anggur in intau pompuḷong.

³¹Inta inontongku kon tua in tongábí dugi bo padang. Tondok bo dindingnea in noumpag domandon.

³²Naonda in sinaridianku mako bo sinano-tanobku intua, nouḻíku in topotundú nanaa:

³³Popisí in tomposiug bo mosiug motoyong, bo ḻimitú mokoyot kon ḻima bo mogogai motoyong,

³⁴kodaitan bo mobiag mobogá mamangoi monubu naonda bo mogogagow inta kodia-dia in ḷoḷutam.