Read Mongondow AMSAL 25 Bible Online

AMSAL 25 - Mongondow bible

AMSAL 25

¹Moiduduimai naa oyúon doman in tonggina mita nongkon i Salomo inta pinais bui in pogawai mita kon komaḻig i Hizkia, datu in Yohuda.

²Ki Allah pinoḷantud popisí in onu inta iharasia-Nea; datu in ihoromat popisí in onu in motaau ininsilangannea.

³Naonda bo baḷangon inta modaḷom bo ḷangit inta moḷantud, natuata in raian in datu diá kotaauan.

⁴Daritaipa muna in saḷaka nongkon utagnea, baintua bo inta mopira in motaau aidan in mongongurig.

⁵Untundon in monononggina mita inta moraat nongkon komaḻig, baintua bo moroton in pomarenta sin moadil.

⁶Aka mayá kon tayowon in datu yo koompá in dodia, dika tumangoi intau inta koḷoḻitúan moḷantud.

⁷Mopia-piabí kon pokipoḻitúan kon tampat inta mopia-pia dika pokipomampingan kon ḷoḻitúan sin ḻitúan in intau inta kon ḻimonikanmu.

⁸Dikabí ḻimika-ḻikat in modia kon pelekara kon pongadilan; sin, aka kon singgai moiduduimai bo noniatamai ikobí in noitaḷá yo onupa in motaaumu aidan?

⁹Aka moyotaḷá takin yobayatmu, yo poyotutuipa intua tongá takinnea, táe onu in iharasia in intau dikabí potaaumu.

¹⁰Sin, iko in anggapon monia intau inta moruit in bibig bo tangoimu in mogoguyaatdon kon kinoouput in kobiaganmu.

¹¹Bonu in raian inta pinoposingog noitongkaná kon wakutunea in naonda bo bungai in buḷawan kon bonu in pindan saḷaka moḷoben.

¹²Toboḷow in intau moarip kon i intau inta moibog mokidongog, in naonda bo sising buḷawan andeka ḷambá madiow.

¹³Totabá inta motoindudui in mokosanang kon intau inta nopotabá, naonda bo tubig moonow kon mororatab kon gobá in tudunea.

¹⁴Dandi mita inta diá inintompodan, in naonda bo goḷom bo tompot inta diá mopoonag in uyan.

¹⁵Aid mosabar takin tosingogon mita inta moḷukó in mokoyakinbí kon intau inta nongawasa, bo mokorimumud kon bayongan inta moḷawang.

¹⁶Dika mokaan kon biluk mobarong; sin angoiandon in rongó in iko.

¹⁷Dika mokopokakit in iko momangoi kon baḷoi in topodiugmu, sin mobúdon in sia bo doídon in sia koangoianmu.

¹⁸Moponapud in uboḷ in mokopatoibí, naonda bo kedang, popangkuḷ andeka piot inta moḷanit.

¹⁹Mopirisaya kon intau momomaḻidawan kon dodai in mororiga in naonda bo mopongokob in ingipon inta ain nodandú andeka mopobayá in sioḷ nopengkoḷ.

²⁰Modondong kon intau inta kinopatoian in naonda bo nomilang kon inia kon sempo in tumping naonda bo nomutak in boil kon kekebnea.

²¹Aka musungmu bo gogoyon, yo ogoiai in kaanon in sia; bo aka morogang in sia, ogoiai in inumon.

²²Aidmu natua mokopooyámai kon inia bo barakatan i TUHAN in iko.

²³Tompot in utuan notantúbí kon mopoangoi in uyan; natua doman in rorebegan notantúbí kon mokopomuká kon rogenggeng.

²⁴Mogutun kon siku in ḷuntung in mopia-pia nongkon mogutun tobaḷoian in buḷoi bobay inta moibog mobobayowan.

²⁵Motarima kon habar inta mopia nongkon ḻipú inta moyayú in naonda bo monginum kon tubig moonow kon dodai in morogang.

²⁶Intau mopia inta tumungkud kon intau moromú in naonda bo bokaká inta noḷobog andeka parigí inta nokarensó.

²⁷Diábí mopia in mokaan kon biluk moiḻiu, natua doman diábí mopia in moiḻiu[8] in pododayow.

²⁸Intau inta diá mokoigon kon ginanea in naonda bo kotá inta ain noumpag in dindingnea.