Read Mongondow AMSAL 26 Bible Online

AMSAL 26 - Mongondow bible

AMSAL 26

¹Ná uyan kon sempo in pononinggai, bo salju kon dodai in singgai mopatú, natua doman in dodayow kon intau bodok diá in maanannea.

²Ná ḷagapan inta iḷumayug bo modondaḷoi kon ḷokutoi, natua doman in odi-odi diábí moitugat kon intau inta diá kotaḷá.

³Keledai in musti baḷaḷáan, kabaḷo in mustibí sambokon, natua doman in intau bodok musti bongkugon.

⁴Intau inta motubag kon onu in ḻibóon in intau dondunguḷ, yo noyobodokdon in intau tatua.

⁵Ḷoḻibó inta mobodok mustibí tubagan in tontubag inta mobodok doman, sinbá ki inta moḻibó in monotaaudon kon diábí in sia mopandoi ná inta kon raiannea.

⁶Mopotabá kon intau bodok pokidiaan in habar, in notongkaibí in momutoḷ kon sioḷ tontaní bo motayak kon bodito.

⁷Naonda bo intau ḻempeng mopoḷampang in sioḷnea, natua doman in intau bodok inta mononggina.

⁸Modayow kon intau inta diá in kototaau, naonda bo motogot kon batu korigonon kon popakot.

⁹Ná intau noḷoḷangu nopoḷuai in dugi kon ḻimanea, natuata in intau bodok inta mononggina.

¹⁰Ki ine in mokiaid kon intau bodok andeka kon intau inta moitaḻib yo mokoporugibímai kon intau mobarong.

¹¹Ná ungkú inta bui mokaan kon totukanea, natua doman in intau bodok inta mobuimai kon kobobodoknea.

¹²Intau inta totok in bodok in mopia-piabí kon intau inta tumangoi mopandoi.

¹³Intau maḷat in moibogbí sinbá umuran kon baḷoi; sia in moguman, “Oyúon in singa kon ḷuai, dika-dika domokonnea in akuoi kon daḷan.”

¹⁴Naonda bo ḷoḻingkop moburow kon totadangannea, natuata in aid in intau maḷat momurow kon awaknea kon tudu in tosiugannea.

¹⁵Oyúon in intau inta totokbí in moiḻiu in maḷatnea; umpaka mopoyoyok in kaanon kon bibignea tontaní yo mobú doman.

¹⁶Intau maḷat in monganggap kon siabí in motaa-taau nongkon intau pitu inta moitutui in pinototubag.

¹⁷Intau inta dumugang kon bobayowan inta deeman totaaunea notongkai in intau inta nodomok kon ungkú ḻindong kon bongoḷannea.

¹⁸Intau inta monompobaḻik, bodongka moguman, “Akuoi in tongábí momaḻitumbui,” in notongkai in intau nobundai inta mopogogitog in ḷoḷutam inta mokobodito.

²⁰Aka kayu modaitdon, yo tuḷú in mopiong domandon; aka intau bibigon diádon, yo bobayowan in mogogaibí domandon.

²¹Ná buing bo kayu mokopopisí kon tuḷú umuran moyongkit; yo natuata in intau inta moibog mobobayowan monundud kon rogenggengan.

²²Moponapud in uboḷ tua in mopia in konanaman; mopiabí in gina in intau in moḻiom kon tua.

²³Naonda bo kuyon butá sinopuan in saḷaka, natuata in intau inta mopia kon singog, táe moraat kon gina.

²⁴Intau inta moraat in mopiabí in tosingogonnea mita táe ginanea nopuḻing in moromú

²⁵Umpaka mobahasa mako in sia, yo dikabí pirisayaan; sin yaatnea ain nongawasa kon ginanea.

²⁶Umpaka bunionnea in yaat in ginanea, yo ontongonbí kon bayongan in aidnea inta moraat.

²⁷Ki ine in mongaḻi kon bubú sin poniat kon intau ibanea, yo siabí tontaní in moḷabú kon bonunea. Ki ine in moḻiḻid kon batu sinbá moidantug kon intau ibanea, yo siabí tontaní in kodantugan in batu tatua.

²⁸Monguboḷ kon intau notongkaibí in moyaat in gina kon inia. Moburidilá mako mokopoangoi kon bodito.