Read Mongondow AMSAL 30 Bible Online

AMSAL 30 - Mongondow bible

AMSAL 30

¹Naa in tosingogon mita inta pinoyaput i Agur ki adí i Yake nongkon Masa: “Akuoi in moḷopí, o Allah, Akuoi in moḷopí! Nodaitdon in ropotku!

²Akuoi in bodok ná bobiagon; diá in pomomangaḻe.

³Diábí kon dodai onda in binalajarku in hikmat, topiḻikmai yo diábí kotaauanku in ki Allah.

⁴Intaubí táonda in nokoimontandon in noponik noponag kon soroga? Nokoimontandon degá in sia norangkom mako kon tompot, bo mopobakut in ḷambungnea kon tubig, andeka nonantú kon sigad mita in dunia? Ki ine in sia, bo ki ine in ki adínea? Notantúbí kon kinotaauanmu!”

⁵Ki Allah in nogintompodbí kon bayongan in dandi-Nea. Sia in naonda bo kaḻeaw kon bayongan in intau inta mamangoi moniung kon i-Nia.

⁶Aka iko bo modugang kon onu inta pinoguman-Nea, dá toboḷowon-Nea in iko bo moponiata kon mouboḷ in iko.

⁷“O Allah, poigumonku kon dodai in akuoi diápa matoi, ogoiaipa in akuoi in doyowa notontagá naa.

⁸Dika modapot in akuoi mopoyaput in tosingogon mita inta motombogá bo uboḷ, bo dika pomayá mako in akuoi mobaḻí bogá andeka mooyúon. Tongádon ogoiai in akuoi in onu inta pakéonku.

⁹Sin, aka akuoi in mooyúon, yo dika-dika bo akuoi in moguman kon akuoi in diábí moparaḷu kon ini-Mu. Bo aka akuoi mobiag bogá, yo dika-dika bo monakow in akuoi dá mokopooyámai kon tangoi-Mu.”

¹⁰Dika in bobantung moponapud in uboḷ kon i tuangnea, sinbá diá in iko odi-odian bo potaḷáan.

¹¹Oyúon in intau mogodi-godimai kon i amánea bo diá mohoromat kon i inánea.

¹²Oyúon in intau in tumangoi motusi in sia bokaka totokbí in moromú in sia.

¹³Oyúon in intau in dumuí kon mopia totok in sia — nádomai tua in kopopianea!

¹⁴Oyúon in intau in motayak kon pakéon pongin aid inta moromú; mosia in moraat bo mogagow kon intau bogá bo intau moyangkó.

¹⁵Ki inta monononrente kon doit in kogadí kon doyowa; tangoi nayadua in tumpaḷa “Kon inakó”. Opat nopasaḷ inta diá kon dodai in onda moorop:

¹⁶Dunia in intau minatoi, bobay inta diá kon dodai in onda nononggadí, butá noingkag inta mogoḷat mako kon uyan, bo tuḷú inta tantú ḷumekep magí-mako.

¹⁷Intau inta moningkuḻe kon i amánea andeka kon i inánea inta ain nogoguyang,[10] patusbí pogambat kon ḷuai sinbá matanea padokon in ḷagapan kawag bo awaknea in kaanon in ḷagapan boniá.

¹⁸Oyúon in opat nopasaḷ inta mororigaku totok komangaḻean.

¹⁹Ḷagapan boniá inta iḷumayug kon toḷungayá, uḷag inta iḷumandai kon tudu in batu karang, kapaḷ inta iḷumeag kon yuak in dagat, bo togapang in tayowmobiag bo mongodeaga inta mosiibogandon.

²⁰Naa in akaḷ in bobay tobatú inta diá mosatia kon i buḷoinea: Mopaḷut mako monuaḻing, mongaan in sia bodongka radatannea in bibignea, bo moguman, “Diábí in akuoi nogaid kon onu bo onu!”

²¹Oyúon in opat nopasaḷ inta moyoyiga tarimaan kon sinangkub in dunia:

²²bobantung tobatú inta nobaḻí datu, intau bodok tobatú inta nokouḻí kon bayongan inta kinoibognea,

²³bobay tobatú inta nobaḻí notonibuḷoi bokaka sia in diábí kinoibog in intau, bobantung bobay tobatú inta nogagow kon ḷoḻitúan i tuangnea bobay.

²⁴Kon dunia naa opat norupa in mahaḷuk inta mointok táe mopandoi totok, tuata:

²⁵Toyom, mahaḷuk inta diá moropot, táe momonturung kon kaanonnea kon sempo in pononinggai.

²⁶Pelanduk, mahaḷuk inta moyangkó, táe nogaid kon baḷoinea kon buḷud batu.

²⁷Pangkoḷá, mahaḷuk inta diá in datu, táe mopipid motompia.

²⁸Totó, mahaḷuk inta gampang domokon in ḻima, táe oyúonbí doman in sia kon komaḻig in datu.

²⁹Oyúon opat nopasaḷ inta diá koḻiongan aka taridionmai in bobayánea, tuata:

³⁰Singa, mahaḷuk inta totok in moropot kon sigad in bayongan mahaḷuk bo diá moondok kon onuka;

³¹bembé koḷakian, manuk tuḷug inta mayá motorindog, bo datu kon tayowon in rayatnea.

³²Aka podoyon kon kobobodokmu iko in dumodia monomayá kon pelekara mita moraat, pokoingat!

³³Sin, aka iko mokaui kon susu, iko in mokouḻíbí kon mantega. Aka iko moruki kon ngiung in intau, yo ḷumuaibí in dugú. Aka iko bo nokopomukádon kon torú, yo iko in moitakindon kon ropatoi.