Read Mongondow AMSAL 31 Bible Online

AMSAL 31 - Mongondow bible

AMSAL 31

¹Naa in tosingogon mita inta siningog i iná i Lemuel, datu in Masa kon i adínea,

²“Adíku, batoḷ in dodobku, inta pinononggadí nobaḻí tubag in sambayangku. Onu in pogumanku kon inimu?

³Dika imibo-ibog in mopomaké in ropotmu andeka mongurab kon ropotmu kon bobay. Nobarongdon in datu inta norimumud popisí in bobay.

⁴Toropdon, Lemuel! Monginum kon anggur bo tantúdon moibog monginum kon inta mokoḷoḷangu, diábí patus kon pongawasa.

⁵Sin, aka datu monginum kon oinumon mokoḷoḷangu, yo koḻionganneadon in hukum bo hak in intau moyangkó.

⁶Oinumon mokoḷoḷangu in kon i moniabí inta kinobuḻian in kamang bo inta norobonoḷ in gina.

⁷Mosia in monginum sin moḻiong kon kobiagan mobogá bo roriga monia.

⁸Sindogdon kon dotá i monia inta diá mokosaḷamat kon awak monia tontaní. Ḷukadai in hak in bayongan intau inta diá kodaya.

⁹Ḷongasi in kopontingan monia, bo kobaḻíbí hakim inta moadil. Ḷukadai in hak in intau bogá bo intau inta iroriga.”

¹⁰Buḷoi mopandoi moajarbí in mokouḻí; siabí in momaha-mahaḷ in intan berlian.

¹¹Ki buḷoinea ḷoḷaki in diábí kodaitan in onu bo onu, sin umuran mopirisaya kon inia.

¹²Sia in diábí kon dodai onda in mogaid kon inta moraat kon i buḷoinea; kinoouputbí in kobiagannea sia in momia kon inta mopia kon inia.

¹³Morajing in sia mosipun kon siningkoi bo bubuḷ in domba bo moramuji mogaboḷ kon tua.

¹⁴Nongkon moyayú in sia modia mangoi kon kaanon, ná inta inaidan in kapaḷ mita in mododagang.

¹⁵Modiugpa mobayag mobangon in sia sin mosadia kon kaanon kon motoḷuadínea, bo mosilai kon oaidan kon bobantungnea mita.

¹⁶Sia in motayak kon butá totampat, bodongka taḷuoionnea; sia in monompinomuḷa kon gobá in anggur nongkon onu in nouḻínea.

¹⁷Sia in moposadia kon awaknea sin mogaid podudui in ropotnea.

¹⁸Kinotaauanneabí kon bayongan yagi-yagi inta inaidannea, mokountungbí; sia in mogaid modapot in moonggot kon doḷom.

¹⁹Siningkoi in inaboḷnea bo dinagum nobaḻí ḷambung.

²⁰Sia in diábí morinut kon intau inta kinodaitan; sia in mopiabí in gina kon i monia inta moparaḷu kon totuḷung.

²¹Diábí in sia mohawatir aka moiangoi in sempo in tumping, sin ḷambung mokopatú in sinadia bidon kon motoḷuadínea.

²²Siabí tontaní in nomia kon ompat in taḷog; ḷambungnea in nongkon kaeng lenan nokamumu inta nopira totok.

²³Ki buḷoinea ḷoḷaki in intau inta ponango-nangoian intau tobatú kon sigad in itoi mita in kotá.

²⁴Sia in nomia kon ḷambung bo baan bodongka pinotaḷuinea kon mododagang.

²⁵Sia in mokobangkaḷ bo ihoromat; bo diábí mohawatir kon singgai moiduduimai.

²⁶Pososingognea in moḷukó totok; tosingogonnea mita in mobijaksana.

²⁷Sia in umuranbí morajing in mogaid bo monondudut kon oaidan in tombonu in baḷoinea.

²⁸Sia in ihoromat i adínea mita, bo dinayow i buḷoinea.

²⁹“Nobayongbí in bobay in mopia,” guman i buḷoinea ḷoḷaki, “táe ikobí in mopia-pia nongkon i monia komintan.”

³⁰Pogot inta motaingkat diábí motaau pirisayaan, bo pogot moḷunat in moinggamábí; táe bobay inta motoindudui kon i TUHAN in patusbí dayowon.

³¹Tuḻíaibí in aidnea inta mopia; sia in bobay inta patus horomaton kon ondakabí!