Read Mongondow AMSAL 4 Bible Online

AMSAL 4 - Mongondow bible

AMSAL 4

¹Uḻe mongoadí mita, indongogaibí in tonggina i amámu! Tondudut intua, dá mobaḻí in iko moarip.

²Onu inta sinundúku naa kon inimu in mopiabí, tuamai in dikapa in iko moguman kon tua in diá in baraguna.

³Kon tungkuḷ in akuoi nointokpa, ki adí tuḷong in guyangaku,

⁴akuoi in sinundú i amáku. Sia in noguman, “Toropdon in tongginaku mita, dikabí mokoimontanmai in koḻionganmu. Aidaibí onu inta sinundúku mita, sinbá mosanang in kobiaganmu.

⁵Pokopobijaksana bo pokopopandoi! Umuran torop in tongginaku mita bo dikabí ḷumbúon intua.”

⁶Horomatbí in hikmat, dá hikmat in moḷukad kon inimu; kotabibí in sia dá ḷukadanneabí in iko sinbá umuran moaman.

⁷Inta totok in moponting bo inta musti muna-munamai aidanmu, tuata in moḷongasi mobaḻí mobijaksana. Onuka in tayakonmu, inta totokanea in moḷongasibí sinbá mokouḻí kon pomomangaḻe.

⁸Untubí in hikmat, dá poḷantudonneabí in iko. Gakapai in sia dá sia in mokopoangoibí kon kahoromatan kon inimu.

⁹Sia in mobogoibí kon inimu in bungang inta mopia totok sin baḻíon mahkotamu.

¹⁰Indongogai in akuoi, adíku! Tondudut kopira in tongginaku mita, dá moumur in kobiaganmu.

¹¹Ain sinundúku in hikmat kon inimu bo nopoontong in kobobiag inta moitutui.

¹²Aka iko mobiag natua, dá diábí in moitongkuḷabot kon inimu kon tungkuḷ in mayá, bo diábí moipintud kon dodai in moribatuk.

¹³Tantú torop in totundú inta ain sinarimamu kon inakó. Ḷukadai intua kopira, sin pongin totundú tatua kodapotanmu onu in sinayakmu.

¹⁴Dika dumudui kon kobobiag in intau moraat, bo dika dumayan kon oaid monia.

¹⁵Dikabí in iko umuran tumontong kon i monia. Pokopoyayú kon i monia bo dika mongandup.

¹⁶Intau moraat in diábí mokosiug aka diápa mogaid kon inta diá mopia. Mosia in diábí tomposiug aka diápa mokopobodito kon intau ibanea.

¹⁷Aid moraat bo inta moromú in naonda bo kaanon bo inumon kon i monia.

¹⁸Daḷan in intau moraat in mosindip ná kon sindip in doḷom. Mosia in moipintud bo moḷabú diá butungonmai monia. Noyotoḻikud kon tua in daḷan inta bayáan in intau mopia in naonda bo kinobukaan in mata in singgai; koonggot-koonggot kobayag-kobayag, modapot in imbuitnea mobayagdon totok.

²⁰Taridiaidon totok in tosingogonku mita adíku! Indongogai in tongginaku mita.

²¹Dika ḷumbúon intua, táe tantúbi tagú kon bonu in ginamu.

²²Intau inta nonotaau kon tua in mobiagbí bo mosehat.

²³Ḷukadai in ginamu kopira, sin ginamu in monantúbí kon daḷan in kobiaganmu.

²⁴Dika mokoimontanmai in mosingog kon onu inta diá totuu. Popoyayú in tosingogon mita inta uboḷ bo tosingogon mita inta makusud mopoḷaḻe kon intau.

²⁵Pogotmu in mustibí moponiata kon kototuḻid in ginamu; diábí paraḷu in iko ki ubo-uboḷmai mopia táe oyúon in niat noibuni.

²⁶Raipa muna kopia baintua bo mogaid, dá kodapotanmubí in bayongan totayakmu.

²⁷Popoyayú in inta moraat, bo kobiagdon mokopotuḻid in gina. Dika mokoimontanmai in tumabat nongkon daḷan inta moitutui.