Read Mongondow AMSAL 5 Bible Online

AMSAL 5 - Mongondow bible

AMSAL 5

¹Adíku, indongogai in akuoi! Tondudutdon in kobobijaksanaku bo pomomangaḻe inta sinundúku kon inimu,

²sinbá kotaauanmu mongo naonda in pododiamu kon aidmu bo mosingog saḷaku intau inta kopongotahuan.

³Bobay sundaḷ,[1] bibignea ná koromimit in biluk bo tosingogonnea in mokosanang kon gina,

⁴táe aka komintandon kinotaḷaban, yo inta kinotaḷáan in dongka bidon inta mopait bo roriga.

⁵Iko in irudonnea moponag kon dunia in intau minatoi, daḷan inta binayáannea in mopobayá in popatoi.

⁶Diá motantú in sia kon daḷan inta mopobayá in kobiagan; diá kinotaa-taauannea mako kon sia in sinumabatdon kon daḷan tatua.

⁷Tuamai, adí mita, indongogaidon in tosingogonku mita bo dikabí taḷaanmu.

⁸Pokopoyayúdon kon bobay inta ná tatua! Modapotbí in dika dimiug kon baḷoinea.

⁹Aka iko moyobayat in bobay tatua, iko in kobuḻian kahoromatanmu bo nyawamu in takowon in intau inta diá kototabi kon tungkuḷ in iko mobagupa.

¹⁰Kaoyúonanmu in modait kaanon in intau ibanea, bo bungai in siniḷopíanmu mobaḻídon kaoyúonan in intau inta diá kinotaauanmu.

¹¹Kon imbuitnea mogamui in iko, aka awakmu modaitdon kaanon in takit.

¹²Bo iko in moguman, “Ah, nongonu sin akuoi in doíbí kon tonggina? Nongonu sin akuoi in doíbí sinoboḷow?

¹³Akuoi in doíbí mokidongog kon mototundúku mita bo doíbí dumudui kon i monia.

¹⁴Dongka kinotaauanmai akuoi ain[2] noḷabú kon tayowon in intau mobarong.”

¹⁵Tuamai, kosatiabí kon i buḷoimu tontaní bo tongádon sia in kotabimu.

¹⁶Diábí in mangaḻenea kon inimu in motayak kon inta mokosanang kon intau inta deeman ki buḷoimu.

¹⁷Inta mokosanang tatua in tongábí kon inimu bo kon i buḷoimu bobay, deemanbí takin intau ibanea.

¹⁸Tuamai, koḷungangabí in iko takin i buḷoimu tontaní; tayakbí in inta mokosanang kon mongodeaga inta ain pinobuḷoimu —

¹⁹Mongodeaga moḷunat bo mokaḻet naonda bo rusa. Biódon mako koḷunat in awaknea in umuran mokobundai kon inimu bo tabinea mokoḷoḷangu kon inimu.

²⁰Onu in mangaḻenea in mongibog kon bobay ibanea, adíku? Onubí in mangaḻenea in mosiug takin bobay sundaḷ?

²¹Ki TUHAN in moindoibí kon bayongan yagi-yagi inta inaidan in intau. Kon ondaka in intau mayá umuranbí indoian mako i TUHAN.

²²Dosa in intau moraat in naonda bo poyogaḷap inta modomok kon intau tatua.

²³Sia in matoi popisí in doí tongginaan. Dondunguḷnea nodia kon inia kon kogoguyaatan.