Read Mongondow AMSAL 6 Bible Online

AMSAL 6 - Mongondow bible

AMSAL 6

¹Adíku, degá iko nokoimontandon in nodandi kon intau tobatú kon moguboḻi kon boḻinea.

²Bo degá iko in noitogotdon kon onu in siningogmu bo noibaaḷdon kon dandimu tontaní.

³Aka totuu natua, adíku, iko ain noibonu kon kawasa in intau tatua. Táe nanaa sinbá iko moiḷuatdon kon tua: koḷamemetdon bayá kon intau tatua; poigumdon totok kon inia sinbá moibog in sia mopoḷuat kon inimu.

⁴Dikapa muna mayá mosiug, bo dika mogogai.

⁵Poḷuatdon in awakmu nongkon poyogaḷap tatua naonda bo ḷagapan andeka rusa noḷagui nongkon intau inta motayak kon inia.

⁶Intau inta maḷat mustibí monaridi kon kobobiag in toyom bo mobalajar kon inia.

⁷Toyom diábí in itoi, diá in nongawasa andeka inta moḷoḷukad kon i monia,

⁸táe kon dodai in sempo in pororatab mosia in mosipun kon tongkaaḷ sin tagúon kon sempo in malarat.

⁹Modapot in toonu in intau maḷat tatua in mosiug? Toonu in sia in mobangon?

¹⁰Ḻimitú in sia bo mokoyot kon dodob sin mogogai, bo moguman in sia, “Mosiugpa in akuoi motoyong, tomposiug in akuoi.”

¹¹Táe kon dodai in sia nosiug, sia inangoi in malarat bo diá koonu bo onu, tua in namangoi naonda bo mogogagow inta nodia kon pakakat in parang.

¹²Intau moraat bo inta diá koendar monguboḷ magí mako.

¹³Mongiloi in sia bo monuḷadá sin monguboḷ.

¹⁴Raiannea inta moraat nopuḻing in tomayá moraat bo mokopomuká kon rogenggeng kon bayongan in tampat.

¹⁵Tua komintan in mokopopisí kon bodito moiantug kon inia inta moidaḻin-daḻí, bo morimumud in sia.

¹⁶Pitu in pelekara inta kinodoí i TUHAN bo inta diá motaau tongá pomayá-Nea mako: Dodia inta moḷoḷatú, bibig inta mosingog kon uboḷ, ḻima inta moḻimod kon intau diá kotaḷá, utok inta monomayá kon oaid mita inta moraat, sioḷ inta ḻimikat in mayá mogaid kon inta moraat, sakusi inta umuran monguboḷ, bo intau inta mokopomuká kon sosaturuan kon sigad in yobayat.

²⁰Adíku, aidaidon onu inta pinoki aid i amámu, bo dika mokoḻiong kon tonggina mita i inámu.

²¹Umurandon torop in tosingogon mita monia bo tagú intua kon bonu in ginamu.

²²Totundú mita monia in mokapit kon inimu kon binayáan, moḷukad kon inimu kon tungkuḷ in doḷom, bo mobogoi in topotundú kon inimu kon tungkuḷ in iko mobangon.

²³Topotundú mita in guyangamu naonda bo togá inta mobayag; toboḷow monia mopoontong kon inimu in kobobiag inta mopia.

²⁴Pongin natua dá iko in popoyayú kon bobay mita sundaḷ bo nongkon dondouḷug mita mobisa nongkon buḷoi bobay in intau ibanea.

²⁵Dika in iko koakaḷan monia in koḷunat monia, dika moitontong kon mata monia inta modondouḷug.

²⁶Bobay sundaḷ in motaaubí uboḻian in doit inta ná boḻi in kaanon topindan, táe monuaḻing takin buḷoi in intau ibanea in musti uboḻian in nyawa.[3]

²⁷Degá motaau in intau monompunuk kon tuḷú bo diá mopokak in ḷambungnea?

²⁸Degá motaau in intau moritak kon baga in tuḷú takin diá mopokak in sioḷnea?

²⁹Tua in notongkaibí in mosiug takin buḷoi in intau ibanea. Ki ine in mogaid kon tua diábí kotaḻiban in hukuman.

³⁰Aka intau monakow kon kaanon, umpakabí popisí in gogoyon yo singkuḻeonbí in sia.

³¹Bo aka kodomokan in sia yo mustibí in sia moguboḻi kon tua kopitu nongkon tua, tuamai in sia mustibí kobuḻian in bayongan kaoyúonannea.

³²Táe naonda degá in intau ḷoḷaki inta nonuaḻing? Sia in nomoguyaatbí kon awaknea tontaní! Totuu mobodok in sia!

³³Sia in rorigaanbí bo singkuḻeon. Tangoinea in mogoguyaat bidon modapot in mononoi.

³⁴Sin, pinongin oaidnea tatua ki buḷoi in bobay tatua moyaat in ginanea, dá torúnea moitagabdon totok. Bo aka motuḻí in sia, yo diábí in tabinea.

³⁵Diábí in sia motaau dondouḷugan in doit, tombuinag nákabí kobayong in onu yo diábí mokoonow kon torúnea.