Read Mongondow AMSAL 9 Bible Online

AMSAL 9 - Mongondow bible

AMSAL 9

¹Hikmat ain noposindog in baḷoi, bo noposindogdon in oiginea pitu.

²Sia in noratádon kon bobiagon sin poramean, nomugutdon kon tubig in anggur bo nogoḷudon kon kaanon.

³Bobantung mita bobay pinotabáneadon minayá nopobaḷú nongkon tampat mita inta moḷantud kon kotá,

⁴“Ki ine in diá kopongalaman, angoi kon naa!” Kon i monia inta diá koakaḷ, hikmat in moguman,

⁵“Koḻigai mokaan kon kaanonku bo monginum kon anggur inta ain pinomiaku.

⁶Taḷaaidon in kobobodok, sinbá mosanang in iko. Duduiaidon in daḷan in intau moarip.”

⁷Aka intau inta doí tundúon bo potaaumu in taḷánea, yo kosinganneabí in iko. Aka intau moraat bo torúanmu, yo siba-sibáanneabímai in iko.

⁸Dika moningkuḻe kon intau inta doí tundúon, sin moyaat in ginanea kon inimu. Táe aka intau inta mobijaksana bo popotaaumu in taḷánea, yo iko in horomatonneabí

⁹Aka intau mobijak tongginaanmu, yo modugang mobijaksana in sia. Bo aka intau inta motoindudui kon i Allah tundúonmu, yo modugang motaau in sia.

¹⁰Sinbá mobaḻí mobijaksana, muna-munamai intau musti kohoromat bo kotoguondok kon i TUHAN. Aka kinotaauanmu in ki Inta Totok in Motusi, yo iko in mokouḻí kon pomomangaḻe.

¹¹Hikmat in mobogoi in umur moḷanggó kon inimu.

¹²Aka hikmat bo oyúondon kon inimu, yo ikobí tontaní in mountung. Táe aka hikmat bo diá tarimaanmu, yo ikobí tontaní in porugionmai.

¹³Kobobodok in naonda bo bobay inta mounsingog inta diá kopongalaman bo diá kooyá.

¹⁴Tampatnea in kon ngara in baḷoinea andeka kon bonawang in kotá.

¹⁵Nongkon tua in sia momaḷú kon intau inta moitaḻib. Intau inta motuḻid in gina dondouḷugannea,

¹⁶“Igai mongandup, ei moiko inta diápa kopongalaman!” Bo sia in moguman kon intau inta bodok,

¹⁷“Tubig sinakow moromimit in nanamnea, bo mokaan umado-adop mopia in nanamnea.”

¹⁸Mosia inta nobaḻí kokaanonnea diá nonotaau kon intau inta mamangoi kon inia moyodungkuḷ in popatoinea kon tua; bo mosia inta ain sinumuot kon baḷoinea, tanaa mako in kon bonudon in dunia in intau minatoi.