Read Mongondow MOHOHUTUBA 10 Bible Online

MOHOHUTUBA 10 - Mongondow bible

MOHOHUTUBA 10

¹Ḷangow inta minatoi mokobongkog kon ḷana mobondu tobotoḷ, kabodokan topiḻik mokoinggamá kon kapandoian inta moḷantud.

²Patusbí in aka intau moarip mogaid kon inta mopia, bo intau bodok mogaid kon inta moraat.

³Kobodokannea in koontongan kon bayongan dodianea. Bo bayongan intau popoontongannea in dondunguḷnea.

⁴Aka iko bo torúan in pongawasa, dikabí mopoigum kon mogogai in mogaid. Umpakabí moḷoben in taḷámu, ampunganbí in iko aka moonow bo mosabar.

⁵Oyúon doman in moraat ibanea in inontongku kon dunia, tuata in aid diá motuḻid in pongawasa mita.

⁶Intau bodok in inogoian ḷoḻitúan moḷantud, bo intau inta mopandoi in diá nokouḻí kon onu bo onu.

⁷Nokoimontan inontongku in ata mita sinumakoi kon kabaḷo bo inanakan intau moḷoben maya-mayá in sioḷ naonda bo ata.

⁸Ki ine in mongaḻi kon bubú, yo siabí in moiḷabú bui kon bonunea; ki ine in ḻimimpat kon sigad yo tobakon in uḷag mobisa.

⁹Ki ine in moḷosi kon batu, yo kotugatan doman in batu bo tompaḻían. Ki ine in moniai kon kayu, yo kosiaian doman.

¹⁰Aka pitowmu mobangkungdon bo diá dilúonmu, yo musti in iko mogaid takin rumoriga totok. Paké in akaḷmu inta mosehat, bo muna pogaid kon tomayá.

¹¹Aka uḷag monobak kon dodai in diápa iyonok in totaau, dá intau inta moyoyonok kon uḷag in diá bidon in mangaḻenea.

¹²Tosingogon in intau moarip modia kon inia horomaton, táe intau bodok in moyopú popisí in tosingogonnea mita tontaní.

¹³Pangkoiannea in ouman uboḷ, táe imbuitnea oumannea naonda bo intau nobundai.

¹⁴Totuu, intau bodok mobayong in singog. Singgai moiduduimai noibunibí kon inaton komintan. Diábí in mokotoḷanow kon onu in mobaḻí naonda in kita diádon.

¹⁵Tongábí intau bodok in diá monotaau kon daḷan mayá in baḷoinea, sia in yumoyiga in mogaid diá mogoga-gogai.

¹⁶Moboditodon in butá inta datunea moguodpa totok, bo intaunea mita moḷoben momia kon rame kino ouput in doḷom.

¹⁷Mopiadon totok in butá inta datunea mokobangkaḷ, inta intaunea moḷoben mongaan kon wakutu inta ain sinantú, doí moḷoḷangu bo mokokawasa kon gina.

¹⁸Atop in baḷoi in moḷopakbí aka diá tompiaanmai, bo kon imbuitnea baḷoi tatua in morugá popisí in maḷat.

¹⁹Rame mokopomuká kon kosing, bo anggur mokobaḻí kon kosanang in gina. Táe paraḷubí oyúon in doit poguboḻi kon tua.

²⁰Dika mogodi-godimai kon datu, umpaka tongá kon bonu in gina. Dika moposingog-singogmai kon intau nooyúon, umpakabí kon tosiuganmu tontaní. Sin dika bo oyúon in ḷagapan nokodongog kon onu in siningogmu, bo bayáannea potaau kon intau inta siningogmu tua.