Read Mongondow MOHOHUTUBA 11 Bible Online

MOHOHUTUBA 11 - Mongondow bible

MOHOHUTUBA 11

¹Paké in doitmu kon totayakmu kon ḷuai in ḻipú. Notantúbí kon mokouḻí in iko kon untung kon singgai moiduduimai.

²Paké in doitmu kon bayongan in totayak; kobayongbí in totayak. Sin intau in mustibí kiḷuka-ḷukadmai, kon dodai in bodito diápa moiantug.

³Moumpagkabí naonda in pangkoi in kayu tatua, yo umuranbí doman moobat kon tampat koumpagannea. Aka goḷom mopuḻingdon in tubig, yo uyan in morogotbí doman totok in moḷabú kon butá.

⁴Ki ine in mogoḷat modapot in tompot bo kaadaan in dunia motompia, yo diábí in sia momuḷa bo diábí doman mogamá kon bungainea.

⁵Ki Allah in nomia kon bayongan yagi-yagi, bo intau in diábí monotaau kon onu in aidan-Nea; natua doman diá in sia momangaḻe kon momuká monik in kobiagan mobagu kon bobuḷadían in iná tobatú.

⁶Ponabudon in bibitmu kon dodai in doḷo-doḷom bo dika mogogai in doḷom. Sin diábí kotaauan naton mongo bibit táonda in mopia in kobobiagnea. Dika-dika bo tumpaḷabí in sia mobiag motompia.

⁷Sindar in mata in singgai mokopomuká kon pia in gina; mopiabí in gina aka kotugatannea.

⁸Posukurbí in iko aka modugang in umur. Táe torop, umpakabí moonggot in kobiaganmu kon dunia, yo wakutumubí kon dunia in intau minatoi in moonggo-onggot. Dá, onu in motaau oḷaton mako? Komintanbí parasuma bo diá in mangaḻenea.

⁹Paké kopia in wakutumu kon dodai in iko mobagupa! Pokosanangbí kon dodai in iko bagupa ede in tayowmobiag. Duduiaibí in bayongan ibog in dimukudmu, aidai in bayongan niat in ginamu. Táe pokotorop, ki Allah inta kon soroga, in monantúbí kon bayongan in oaidmu.

¹⁰Untundon in ḻia-ḻiaw bo roriga in ginamu, sin wakutumu mobagupa in motoyongbí moitaḻib.