Read Mongondow MOHOHUTUBA 2 Bible Online

MOHOHUTUBA 2 - Mongondow bible

MOHOHUTUBA 2

¹Sinimpodkudon kon tongádon moposanang in gina sinbá monotaaudon kon onu in kopiaan. Táe noniata magí diábí doman in mangaḻe intua.

²Nosadar in akuoi kon kosing tua in kabodokanbí bo kasanangan in diábí in baragunanea.

³Kinogonúan in ginaku kon moibog moarip, moniat in akuoi moposanang in gina pongin monginum kon anggur bo momia kon rame. Kon inakókamai dá tuabí in aid inta totok in mopia kon intau mopomaké in kobiagannea inta notoyong kon dunia naa

⁴Aid mita inta moḷoben ain inaidanku. Pinosindogku in baḷoiku mita. Inaidanku in taman mita bo gobá mita inta pinomuḷaanku kon pangkoi in anggur bo noyagi-yagimai in pangkoi in ayop.

⁶Kinaḻiku in tabang mita sinbá oyúon in tubig kon taman mita bo kon gobá mita tatua.

⁷Nobayong in ataku, pinomayá inta sinaḷuiku, andeka inta pinononggadí kon baḷoiku. Bobiagonku in mobaro-barong nongkon bobiagon i inekadon inta nokoimontan nogutun kon Yerusalem.

⁸Sinipunku in saḷaka bo buḷawan inta inogoi saḷaku iba in datu mita inta kon butá inta kon bonu in kawasaku. Mododondong ḷoḷaki bo bobay moposanang in ginaku pinongin dondong mita monia. Oyúon doman in pahang mita tongonukabí in koibogku.

⁹Totuu, akuoibí in mokawa-kawasa nongkon i ineka inta nokoimontan nogutun kon Yerusalem, bo hikmatkubí doman in noiḻiu.

¹⁰Bayongan inta kinoibogku, dinuduianku totok. Diábí kon dodai in onda akuoi in nomondam kon onu inta koibogku. Nosanang in ginaku kon bayongan inta siniḷopíanku, bo tuata in tondan in pinogaidanku.

¹¹Táe noiduduimai kon tua sinaridiku in bayongan inta inaidanku, bo inta bayongan ḷopíku sin moginḷapat kon oaidanku mita tatua, dá kinotaauankudon kon tua mita in diábí in mangaḻenea. Onu in iḷongasiku tua diábí in baragunanea naonda bo moḷongasi modomok kon tompot.

¹²Naondaka yo datu tobatú in tongábí mokoaid kon onu inta inaidan in datu mita inta noiuna kon inia. Bo nomangkoidon in akuoi norai; Onu in mangaḻenea in mobaḻí moarip andeka dondunguḷ andeka bodok?

¹³Totuu, kon kinotaauanku, “Hikmat in mopia-pia in kabodokan, ná doman bayag in mopia-pia in sindip.

¹⁴Intau moarip mokoontong kon daḷan inta bayáannea; intau bodok naonda bo mayá sindaḷan mongokap.” Táe kinotaauanku doman kon ukur inta motongkai moiumabí kon i monia komintan.

¹⁵Dá iraiku, “Ukur inta noiuma kon intau bodok in korasaankubí doman. Dá onu in mangaḻe in bayongan pandoiku?” Dá sinimpodkudon in tosingogon kon hikmat tua in totuubí kon diá in baragunanea.

¹⁶Intau inta bodok ḷagidon koḻiongan, táe intau inta mopandoi in diá domandon toro-toropon. Koonggot-koonggot kita komintan in modaitdon koḻiongan. Kita komintan in mustibí matoi, pinomayá intau inta moarip andeka intau inta dondunguḷ.

¹⁷Tuamai in kobiagan diá bidon in mangaḻenea kon inakó, ibanea in diábí. Komintan diá in mangaḻenea; akuoi in noḷongasidon nodomok kon tompot.

¹⁸Bayongan bungai in ḷopíku bo onu inta nouḻíku diá in baragunanea kon inakó, sin mustibí intua taḷaanku kon intau inta momaḷui kon inakó.

¹⁹Bo ki inebí in nonotaau kon intau tatua in moarip andeka bodok? Táe naondaka doman siabí in mobaḻí kitogi kon onu inta iḷongasiku inta ain kinodapotanku kon dodai in akuoi nobiag kon dunia naa popisí in ḷopí bo hikmatku. Dá, tua in diá doman in mangaḻenea.

²⁰Tanaaya nomanasaḷdon in akuoi nogaid inimibo-ibog.

²¹Sin intau imibo-ibog in mogaid takin mopomaké in bayongan hikmat, ilimu bo onu inta totok in kinotaauannea sin momatuk kon onu in koibognea. Táe kon imbuitnea musti in sia monaḷámai kon bayongan inta irorigaannea kon intau inta diá kotoguḷopí kon tua. Dá, tua in diá domandon in mangaḻenea, apa doman totuubí kon diá motuḻid!

²²Kino ouput in kinobiagan intau moḷongasi totok mogaid bo yumoyigamai; bo onubí in siniḷopían tua in motaau pongata-ngata mako?

²³Onukabí in inaidannea kon dodai in nobiagpa, modia kon roriga bo nakit in ginanea. Kon tungkuḷ in doḷom mohawatir doman in ginanea. Dá tua komintan in diábí doman in mangaḻenea.

²⁴Diábí in mopia-pia in kon intau koḻikudbí in mongaan, monginum bo mokaan kon onu in siniḷopíannea. Kinotaauanku doman kon tua in ki Allahbí in nobogoi.

²⁵Ki ine in motaau mongaan bo mobarasanang takin diá in Allah?

²⁶Ki Allah nobogoi in hikmat, pongotahuan bo kasanangan kon intau inta mokosanang kon gina-Nea. Táe intau baradosa in pinotabá-Nea mogaid motayak kon pakéon bo mosipun kon onu inta nouḻí sin ogoi kon intau inta mokosanang kon gina i Allah. Dá, tua komintan diá in mangaḻenea naonda bo modomok kon tompot.