Read Mongondow MOHOHUTUBA 7 Bible Online

MOHOHUTUBA 7 - Mongondow bible

MOHOHUTUBA 7

¹Tangoibí mopia in mopia-pia in ḷana inta momahaḷ; bo singgaibí kopatoian in mopia-pia in singgai kinobaḻian.

²Maníka bo mayá in pinatoian bo dika in mayá in rame. Sin kita in mustibí tantú monanob kon popatoi in mogoḷatbí mako kon batúan in intau.

³Robonoḷbí in dodob in mopia-pia in kosing. Umpaka molamurú mako, asaḷ bo gina in mosanang.

⁴Intau bodok in tantú momatuk kon kasanangan; intau mopandoi in umuran morai kon popatoi.

⁵Maníka bo sinoboḷow in intau inta mopia, bo dika in dinayow in intau bodok.

⁶Kosing in intau bodok diá in mangaḻenea, naonda bo doradak in pinotubáan kon dugi.

⁷Aka intau mopandoi bo monguboḷ, yo nobodokdon in aidnea; aka intau bo motarima kon sogó in pelekara, yo nogoguyaatdon in raiannea.

⁸Mopia-piabí kon imbuit in pelekara tobatú in pangkoi in pelekara tatua; mopia-piabí kon mosabar bo dika in moiḻiu in yunggagá.

⁹Dika baḷú tumorú totok; tongábí intau bodok in motagú kon gina.

¹⁰Dikabí in moḻibó nanaa, “Nongonu sin dungkuḷmaibí in mopia-pia in masai in naa?” Tongábí intau dondunguḷ in moḻibó natua.

¹¹Intau nobiag mustibí oyúon in hikmat; hikmat naa in notongkai in budel;

¹²notongkai doman in doit inta mobogoi in porasaan moaman. Apa doman totaau soaḷ hikmat! Ki ine in oyúon intua yo mosaḷamat.

¹³Tondudutka in oaidan i Allah. Ki ine in mokotuḻid kon onu inta binelung i Allah?

¹⁴Dá, kosanangdon aka iko bo nokouḻí kon inta sinayakmu. Táe aka iko bo kinoantugan in bodito, yo dika koḻiongan kon ki Allahbí in nobogoi doyowa tatua. Diábí kotaauan naton mongo onu in mobaḻí moiduduimai.

¹⁵Kobiaganku in diábí in mangaḻenea, táe kon bonu in akuoi nobiag inontongku in naa: Moiḷanuimai in intau mopia moyopú, umpakabí in sia motoindudui. Moiḷanuimai doman in intau moraat moumur in kobiagannea, umpakabí in sia umuran mogaid kon dosa.

¹⁶Dika moiḻiu in pia bo dika doman moiḻiu in pandoi. Onubí in mangaḻenea in simimpatoi?

¹⁷Dika doman moiḻiu in raat andeka moiḻiu in bodok. Onubí in mangaḻe in matoi aka deemanpa wakutunea?

¹⁸Pokoyayú kon doyowa inta koina. Aka kita motoguondok kon i Allah, yo notantú bidon kon kodapotan naton in onu inta sinayak.

¹⁹Hikmat in mokodugang kon itoginea moropot moiḻiu kon pongawasa mopuḷú kon kotá tobatú.

²⁰Kon dunia naa in diábí in intau diá in bogit; diábí in umuran mogaid kon inta mopia bo diá kon dodai in onda in noiḷaut noiaid kon dosa.

²¹Dika moibog umuran mokidongog kon ouman diá totuu, sin dikabo iko in koyogotbí inodi-odian in bobantung tobatú.

²²Kinotaauanmubí doman kon intau ibanea in nokoimontanbí doman in inodi-odianmu.

²³Tua komintan in sinungkuḷankudon in hikmatku. Táe aka aḷowanku in pandoi tatua, modugang moyayú in sia kon inakó.

²⁴Ki ine in mokodungkuḷ kon mangaḻe in kobiagan naa? Moiḻiu in ako komangaḻean!

²⁵Táe akuoi in tantúbí mobalajar bo motayak kon totaau, sinbá mokouḻí kon pandoi bo tubag in bayongan inta ḻibóon. Tungkuḷanku tomangaḻean kon dosa tua in kabodokanbí, bo aid moraat in ibogbí ná noiḷoḷongon.

²⁶Nouḻíku kon naanta yo bobaybí in mopai-pait in popatoi. Ibog in bobay tua in naonda bo pukot bo poyogaḷap inta ain sinaan mako. Koyotnea in naonda bo kayu pinoumantungan. Intau inta dinumudui kon ibog i Allah in moiyayúbí kon poyogaḷapnea, táe intau baradosa in notantú bidon kon kodomokannea.

²⁷Indoiai, guman i Intau Kohikmat: Tua komintan in nouḻíku, kon dodai in akuoi tantú motayak kon tontubag.

²⁸Tantúpa doman in akuoi motayak kon tontubag mita ibanea, táe diádon nokouḻí. Kon sigad in intau toribu, nouḻíku in ḷoḷaki tobatú inta ihoromatku. Táe kon sigad monia diá in bobay inta motaau horomatonku.

²⁹Tongábí naa in nouḻíku: Pinomia i Allah in kita diá noiḻiu bo biasabímai. Táe kitabí tontaní in mopororigamai bo mopoyagi-yagimai.