Read Mongondow MOHOHUTUBA 8 Bible Online

MOHOHUTUBA 8 - Mongondow bible

MOHOHUTUBA 8

¹Totuu mosanang in intau mobijaksana. Kotaauannea in tubag in bayongan pelekara. Pandoi nokopomomi kon inia sin pia in gina, dá pogotnea in umuranbí motarimbuka.

²Duduiai aka parentaan i datu, bo dika ḻimika-ḻikat in modandi kon i Allah.

³Onu in koibog in datu motaaubí aidannea, aka kinodoínea, yo maníka mokopoyayú kon inia.

⁴Datu mopomaké in kawasa nea; diábí in mokobaḻí momayow kon inia!

⁵Intau inta motoindudui kon inia, in moaman bo mobiag motompia; intau inta moarip in monotaaubí mongo toonu bo naonda in dumudui kon i datu.

⁶Kon bayongan in yagi-yagi oyúon in wakutu bo aidnea tontaní, táe tongábí topiḻik totok in kinomangaḻean naton!

⁷Diábí tobatúmai in intau in nonotaau mongo onu in mobaḻí kon inia kon singgai moiduduimai, bo diábí doman in mokopotaau mongo onu in mobaḻí.

⁸Diábí tobatúmai in mokotahang andeka momaḷui kon singgai kopatoiannea. Tuata in inta iramuji inta diá motaau poḷaguian, diábí in sia moiḷagui kon tua, umpakabí pongin akaḷ bo tombuḻitok.

⁹Bayongan naa in inontongku kon tungkuḷ in sinaridiku in bayongan inta nobaḻí kon dunia naa. Oyúon intau mopomaké in kawasa nea sin mopobodito kon tumpaḷa intau.

¹⁰Nokoimontan inontongku in intau moraat minatoi bo iḷobong. Táe kon dodai in intau mita nobui nongkon pinoḷobongan kon inia, mosia in nodayow kon inia kon kotá inta pinogaidannea kon inta moraat. Dá, tua in diábí doman in mangaḻenea.

¹¹Nongonu sin totuubí mogampang in intau momia kon inta moraat? Popisí in hukuman diá ḷagi popoḷabú.

¹²Umpaka mogatut in aid moraat in inaidan in intau baradosa, umuranbí in sia mobiag bo modapotbí in moonggot in kobiagannea. Kain intau, ki ine in motoindudui kon i Allah, notantúbí kon kobobiagnea in komintan mogampang.

¹³Noyoḻiu kon tua, intau moraat mokouḻí kon mobayong in roriga. Kobiagannea in ḷagibí mayá naonda bo oḻinow. Sia in matoibí kon dodai in moguodpa popisí in sia diá motoindudui kon i TUHANnea.

¹⁴Tongá tua komintan in diábí totuu. Indoiaidon onu in nobaḻí kon dunia: Oyúon in intau motoindudui inta ihukum naonda bo intau moraat, oyúon in intau moraat in dinuí naonda bo intau motoindudui. Dá tua in diábí doman in mangaḻenea.

¹⁵Impoḷok mako in tosingogonku in intau naa in mustibí mobiag takin ḷunganga in gina. Sin kon bonu in kobiagannea kon dunia diábí in kasanangan ibanea kon inia koḻikudbí in mongaan, monginum bo mobarasanang. Tongábí tua in kopakéannea kon bayongan in onu inta iramujinea, kon bonu in kobiagan inta inogoi i Allah kon inia.

¹⁶Kon tungkuḷ in akuoi noḷongasi motayak kon hikmat, bo sinaridianku in bayongan inta nobaḻí kon dunia naa, dá kinotaauankudon kon umpakabí in kita rumorigamai totok singgai doḷom poḷat diádon mogoga-gogai,

¹⁷yo diábí kotaauan naton mongo onu in aidan i Allah. Naondaka in poḷongasi naton, diábí in kita mokototaau. Intau moarip in tumangoi kon kinotaauannea, táe sabanarnea in diábí kotaauannea.