Read Mongondow MOHOHUTUBA 9 Bible Online

MOHOHUTUBA 9 - Mongondow bible

MOHOHUTUBA 9

¹Tua komintan in iraiku kinopira totok. Ki Allah in nonompia kon kobiagan in intau inta mopia bo mobijaksana, modapot in aka intau tatua moyongó andeka motabi. Diábí in monotaau mongo onu in mobaḻí kon singgai moiduduimai.

²Totuu, ukur inta motongkai in moiumabí kon batúan in intau: Intau motuḻid andeka intau mobelung in raian, intau mopia andeka intau moraat, intau modarit andeka intau nonajis, intau inta noposumba in kuruban andeka inta diá. Intau mopia in diábí mopia-pia in kobiagannea nongkon intau inta binaradosa, intau inta nongibot notongkaibí doman in intau inta doí mongibot.

³Dá, ukur inta motongkai in moiumabí doman kon i monia komintan. Bo tua in soaḷ inta mokonakit kon gina ná doman bayongan inta nobaḻí kon dunia. Kon dodai in mobiagpa gina in intau nopuḻing in inta moraat, bo raiannea in nopuḻing doman in kabodokan. Bo daḻídon in sia moyodungkuḷ in wakutunea matoi.

⁴Táe kon bonu in dimukud naa noitogotpa kon awak, yo umuranpabí doman oyúon in andoḷan. Ungkúbí inta nobiagpa in mopia-pia nongkon singa inta ain minatoi?

⁵Intau inta nobiag nonotaaubí kon singgai kopatoian in nogoḷatbí mako kon inia, táe intau minatoi in diábí nonotaau kon onu bo onu. Diábí in tondan andeka tontuḻínea bo tangoinea in kinoḻiongandon.

⁶Porasaan tabi, yongó bo napusunea, komintan bidon matoi moyotakinnea. Diá bidon in sia mogamá kon tonsilai onuka kon bayongan onu in nobaḻí kon dunia.

⁷Pongaanbí bo pobarasanang, inumdon in anggurmu takin ḷunganga in gina. Diábí mobogat in gina i Allah, sin kinoibog-Neabí intua.

⁸Pokotarimbukabí bo pokopobayag in pogotmu.

⁹Paké in kobiagan takin i buḷoimu inta kinotabimu kon bonu in kobiaganmu inta diá in baragunanea, inta inogoi i Allah kon inimu kon dunia. Pakébí muḷoi in singgai umpaka diá in baragunanea. Sin tongábí tua in tondan in irorigaanmu.

¹⁰Aidaibí in bayongan oaidanmu podoyon kon bayongan ropotmu. Sin moiangoibí in kodaitan raian andeka oaidan. Diábí in ilimu andeka pandoi kon dunia in intau minatoi. Bo kon tuata in bayáanmu.

¹¹Kon dunia naa oyúonpa doman in inontongku: kon totandingan in diábí umuran intau inta moḻikat in mokountung, kon poparangan in diábí umuran intau moropot in mountung. Intau mobijaksana in diábí umuran mokouḻí kon oaidan. Bo intau mopandoi in diábí umuran mokouḻí kon kaoyúonan. Bo intau inta motaau totok diábí umuran mobaḻí ponango-nangoian. Sin ki inekabí kotugatanbí in ukur diá mopia.

¹²Intau naa in diábí nonotaau mongo toonu in wakutunea mamangoi. Naonda bo ḷagapan noibaaḷ bo toyá noikarit, natua doman in intau kinotugatan in bodito kon tungkuḷ inta diá kon gina-gina mako.

¹³Moiduduimai naa oyúon in dodoyonan tobatú inta mopia kon naonda in mohoromat kon hikmat:

¹⁴Oyúon in kotá mointok tobatú inta noyakag in intaunea. Kon singgai tobatú datu moḷoben tobatú namangoi nonubu kon kotá tatua. Kinopungnea bo nosadiadon mondangat kon dindingnea.

¹⁵Kon kotá tatua oyúon in intau nobiag nobogá inta mobijaksana. Sia in nokoposaḷamatbí kon kotá tatua. Táe popisí in sia nobiag nobogá, onu in pinomianea tatua baḷúdon kinoḻiongan bo diá tobatúmai in intau nokotorop kon inia

¹⁶Dá, totuubí in kain singogku kon hikmat naa in noiḻiubí kon ropot. Umpaka natua, hikmat in intau nobiag nobogá diá inindoianmai. Tosingogonnea diá in inindongogan.

¹⁷Maníka bo mokidongog kon tosingogon moonow nongkon intau inta mopandoi bo dika in baḷú in pongawasa kon sigad in intau mita inta dondunguḷ.

¹⁸Hikmat in mobara-baraguna nongkon ḷoḷutam, táe aid moraat topiḻik mokogoguyaat kon aid mopia mobayong.