Read Mongondow DONDONG MOḶANTUD 1 Bible Online

DONDONG MOḶANTUD 1 - Mongondow bible

DONDONG MOḶANTUD 1

¹Dondong Moḷantud pinomia i Salomo.

²Ayokaidon in akuoi; tabimu in mopia-pia in anggur!

³Iko in mobondu totok, tangoimu naonda bo ḷana mobondu inta noibutak; tuamai mongodeaga mita moibog kon inimu!

⁴Mokopoḷamemet in kita, o datuku, diádon in akuoi tumuot in gopotmu. Sin popisí in iko dá moḷunganga totok in gina nami, bo modayow kon totabimu in moiḻiu kon anggur; patusdon in mongodeaga mita moibog kon inimu!

⁵Umpaka morondí, moḷunatbí in akuoi, ei mongodeaga mita in Yerusalem; morondí ná ḷoḷaigan mita in Kedar, táe mogaga naonda bo toipoi mita in komaḻig i Salomo!

⁶Dika indoianmai in kuḻitku inta morondí, popisí in akuoi nopokak in mata in singgai. Ki guya-guyangku mita sinumorú kon inakó, bo nopotabá kon inakó mogaid kon gobá in anggur; diádon in wakutuku monompiamai kon awakku.

⁷Pogumandon, uḻe batoḷ in dodobku, kon onda in pinopokaananmu in domba mita, kon onda in pinoposiuganmu kon i monia aka ḷoḷabungneadon? Umpaka yo akuoi ná don onda bo intau mododondaḷoi kon sigad in paanan domba yobayatmu mita?

⁸Umpaka dá diá kotaauanmu in tampatnea, uḻeku inta totok in moḷunat kon sigad in bobay mita? Duduiaidon in ḻiod in paanan domba, bo ḷukadaidon in bembému mita kon diug in ḷoḷaigan in gombala mita.

⁹Batoḷ in dodobku, iko in naonda bo kabaḷo kobaayan inta nogugut kon kereta i datu in Mesir.

¹⁰Putongimu totuu moḷunat kon sigad in ḷambá, sigogowmu in moḷunat pinakéan in boboḷ permata.

¹¹Pogaidan nami kon ḷambá buḷawan in iko, manik-manik doman mita nongkon saḷaka.

¹²Kon dodai in ki datuku kon tosiugannea, bo mobondu in ḷana narwastuku.

¹³Batoḷ in dodobku naonda bo taḷong mobondu in bónea, kon dodai in inumuḻid kon dodobku.

¹⁴Batoḷ in dodobku naonda bo bungang totabian totanga kon gobá mita in anggur En-Gedi.

¹⁵Iko in moḷunat totok, batoḷ in dodobku, totuu moḷunat in iko! Matamu naonda bo paḷoma.

¹⁶Totuu mogaga in iko, uḻeku totuu kon mogagabí in iko! Posiugan naton kon tudu in bonok moḷunow.

¹⁷Pangkoi in aras in mobaḻí oigi in baḷoi naton, bo pangkoi in ḷokuyú in pinogaid kon ḷuntungnea.