Read Mongondow DONDONG MOḶANTUD 2 Bible Online

DONDONG MOḶANTUD 2 - Mongondow bible

DONDONG MOḶANTUD 2

¹Akuoi in tongábí bungang mawar nongkon Saron, bungang bakung kon ḷopá mita.

²Naonda bo bungang bakung kon yuak in bo bonganga, natuata in batoḷ in dodobku kon sigad in mongodeaga mita.

³Naonda bo pangkoi in apel kon yua-yuak in pangkoi in kayu kon kayuon, natuata in batoḷ in dodobku kon sigad in ḷoḷaki mita. Mopiabí in ginaku kon siungonnea, bungainea mita noromimit in nanamnea.

⁴Dinianea in akuoi kon yuang poramean, sinontongannea in akuoi takin tabi moḷoben.

⁵Iropotaidon in akuoi takin romimit in bungai anggur, posehatdon in akuoi in bungai apel, sin takitku naa in takitbí mokotanob kon batoḷ in dodob.

⁶Ḻimanea koḷoigi notonoi kon uḷuku, ḻimanea koḷanan nokoyot kon inakó.

⁷Podandidon, ei mongodeaga mita in Yerusalem, podoyon kon rusa mita bo kijang mita kon kayuon, kon moiko in diábí monuyayow kon totabian, modapot in moguḻí in ibognea.

⁸Indongogai! Batoḷ in dodobku namangoi! Sia in naonda bo ki adí in rusa andeka kijang. Mosimbanan kon buḷud mita moḷantud, mosimbanan kon buḷud mita moompá. Indoiai, sinimindog in sia kon ḻikud in dinding, matanea motayak magí-mako; motarap nongkon bubú in jandela.

¹⁰Indongogai, batoḷ in dodobku noguman kon inakó. Angoidon batoḷ in dodobku, igaidon ḷunatku!

¹¹Indoiai, sempo in tumping noiḻimpatdon, sempo in uagat noitaḻibdon.

¹²Kon gobá bungang mita nongomusirdon; sempo in morapad noiangoidon; singog in tarangkuku kinodongogan kon butá naton.

¹³Pangkoi in ara momangkoidon momungai, pangkoi in anggur kobóandon in toburnea. Angoidon batoḷ in dodobku, igaidon ḷunatku.

¹⁴O paḷomaku kon sigad in batu, kon pinogadopan kon obaga mita in buḷud inta mosindog, pomayádon mako ontongonku in pogotmu, bo mokodongog kon singogmu, sin pogotmu moḷunat, dondongmu in mopia.

¹⁵Domokdon in dedek mita tatua, dedek mita mointok inta momoguraat kon gobá in anggur, sin gobá in anggur nami koyogotdon monubu.

¹⁶Batoḷ in dodobku kapunyaanku, bo akuoi sia in kitogi, sia in noḷukad kon dombanea mita kon sigad in bungang mita bakung

¹⁷modapot in tompot doḷo-doḷom mogirup inta monginggamá kon sindip in doḷom. Pobuidon mangoi, batoḷ in dodobku, naonda bo kijang, naonda bo ki adí in rusa kon buḷud in Beter.