Read Mongondow DONDONG MOḶANTUD 3 Bible Online

DONDONG MOḶANTUD 3 - Mongondow bible

DONDONG MOḶANTUD 3

¹Doḷom, kon tosiuganku, kon bonu in togoindop sinayakku in batoḷ in dodobku; sinayakku in sia, táe diá nouḻí.

²Akuoi moibog mobangon bo moḻibu kon kotá, modondaḷoi kon bayongan daḷan bo lorongnea. Akuoi moibog motayak kon batoḷ in dodobku; sinayakku in sia, táe diá nouḻí.

³Akuoi noyodungkuḷ in intau moḷoḷukad kon kotá, bo iḻibóku, “Inontong degá monimu in batoḷ in dodobku?”

⁴Bagupa sinaḷáanku in mosia, noyodungkuḷkudon in batoḷ in dodobku. Kinadaianku in sia, bo diádon inukatanku nodapot in diniaku kon baḷoi i ináku, kon gopot in intau inta nopononggadí kon inakó.

⁵Podandidon, ei mongodeaga mita in Yerusalem, podoyon kon rusa mita bo kijang mita kon kayuon, kon moiko in diábí monuyayow kon totabian, modapot in ibognea moguḻídon.

⁶Onu degá intua inta namangoi nongkon padang gurun, naonda bo poyok nosipun? Kobondunea in naonda bo taḷong mobondu bo kamania, bo pupur mita mobondu nongkon mopopotaḷui.

⁷Indoiai, tua in bobuḻigan i Salomo, iḻibu in intau onom nopuḷú inta mongoroton, intau mita in Israel inta mongotorindog,

⁸inta nobiasadon kon parang. Mosia komintan nopogabit in kedang nosadiadon monayow aka oyúon in monubu doḷom.

⁹Ki Salomo in nokiaid in bobuḻigannea, nongkon kayu inta totok in mopia.

¹⁰Oiginea in pinomia nongkon saḷaka, bo oandoḷannea in nongkon buḷawan. Ḷoḻitúannea nokamumu in batangannea, sinuji takin pia in gina in bobay mita in Yerusalem.

¹¹Ḷuaidon, ei mongodeaga mita in Sion, indoiaidon in ki Datu Salomo takin topí in datu inta pinoḷutud i inánea, kon singgai pinonikaannea, kon singgai sia noḷunganga.