Read Mongondow DONDONG MOḶANTUD 4 Bible Online

DONDONG MOḶANTUD 4 - Mongondow bible

DONDONG MOḶANTUD 4

¹Totuu moḷunat in iko, batoḷ in dodobku, totuu, totuubí kon moḷunat in iko. Matamu noibuni kon koḷubungmu naonda bo paḷoma; buokmu naonda bo paanan in bembé inta mosiḻig kon buḷud mita in Gilead.

²Ingiponmu nobudó naonda bo paanan in domba inta bagu ginonsingan bo ininggúan; moyo-moyogapang naonda bo ki adí mita in domba apang, tobatúmai diábí in nobuḻi.

³Kuḻit in bibigmu naonda bo pita nopura, bo mogaga in bibigmu. Putongimu naonda bo bungai in delima iḷosi, noibuni kon koḷubungmu.

⁴Sigogowmu naonda bo ḷangkeang i Daud, inta pinosindog sin potagúan kon ḷoḷutam. Boboḷmu notongkai in kaḻeaw toribu, tungkud in intau mita mongobarani.

⁵Tetému naonda bo ki adí in rusa doyowa, ki adí in kijang apang inta koyogot in moranut kon bonok kon yua-yuak in bungang mobondu.

⁶Moibog in akuoi mayá kon buḷud in taḷong mobondu, kon buḷud in kamania, modapot in mogirup in tompot doḷo-doḷom, inta monginggamá kon sindip in doḷom.

⁷Totuubí moḷunat in iko, batoḷ in dodobku, diábí in bogit kon inimu.

⁸Koḻigai in kita mosiḻig nongkon Libanon, nonikaanku, koḻigai mosiḻig nongkon Libanon. Posiḻigdon nongkon tudu in Amana, nongkon tudu in Senir bo Hermon, tampat pogogutunan in macan tutul bo singa.

⁹Iko in mokosanang kon ginaku, batoḷ in dodobku, nonikaanku, pooindoimu in nokoangá kon ginaku, takin permata mogaga kon boboḷmu.

¹⁰Totuu mopia in tabimu, uḻe, nonikaanku, mopia-piabí nongkon anggur. Ḷanamu totuu mobondu, mopia-pia nongkon bayongan toyokayu.

¹¹Mopia in tosingogonmu mita, nonikaanku, naonda bo biluk taakan bo susu. Ḷambungmu in ná kobondu in Buḷud Libanon.

¹²Batoḷ in dodobku in gobá inta dininding, gobá dininding, bokaká inta kinunsían.

¹³Kon tua nobiag in pangkoi mita in delima, nopomungai in bungai mita inta totok in mopira in nanamnea. Bungang pacar bo narwastu,

¹⁴narwastu, koḷawag, kayu manis bo túan, bo noyagi-yagimai in pangkoi in kamania. Taḷong mobondu bo gaharu, takin noyagi-yagimai in toyokayu inta notompiḻí.

¹⁵Bokaká kon gobáku nopoḷuai in tubig kobiagan inta moiḻig nongkon Libanon!

¹⁶Pobangondon, ei tompot in utuan, angoidon, ei tompot in toḷatan! Pogirupdon kon gobáku, sinbá bondunea in kobóan. Igumon mako batoḷ in dodobku mamangoi kon gobánea, bo mokaan kon bungainea mita inta mopia in nanamnea.