Read Mongondow DONDONG MOḶANTUD 5 Bible Online

DONDONG MOḶANTUD 5 - Mongondow bible

DONDONG MOḶANTUD 5

¹Akuoi in namangoi in gobáku, batoḷ in dodobku, buḷoiku, sinipunku in taḷong mobondu bo toyokayuku mita; kinaanku in ḻipú in pasukan bo bilukku, ininumku in susu bo tubig in anggurku. Pongaan bo ponginumdon yobayat mita, ponginumdon modapot in moḷoḷangu in totabian.

²Akuoi in nosiug, táe ginaku in nobangon. Indongogaidon, batoḷ in dodobku nonangkokó kon ḷoḻingkop. Bukataipa in ḷoḻingkop, uḻe, batoḷ in dodobku, paḷomaku, intau inta totok in kinotabiku; uḷuku nobuntad in oḷú, buokku nobuntad in oḷú doḷom.

³Ḷambungku iḷongkutkudon; yo degá ḷutudonkupa bui? Sioḷku dinaritankudon, yo degá buikupa kotoron?

⁴Modoḷodok totok in ginaku sin batoḷ in dodobku nokadai kon kokadaian in ḷoḻingkop.

⁵Dá nobangondon in akuoi sin momukat kon ḷoḻingkop tuotan in batoḷ in dodobku. Taḷong mobondu mototuyú nongkon ḻima bo gongguyamúku mita, nomuntad kon kokadaian in ḷoḻingkop.

⁶Binukatanku in ḷoḻingkop sin tuotan in batoḷ in dodobku, táe nomurowdon in sia bo minayá. Mokotanob totok in akuoi mokidongog kon singognea; sinayakku in sia, táe diá nouḻíku. Kinuukku in tangoinea, táe diá sinumubag in sia.

⁷Akuoi inangoi in moḷoḷukad doḷom kon kotá; binongkug bo sinongkekeban monia in akuoi, aḷuangku in pinakisa inagow monia.

⁸Podandidon, ei mongodeaga mita in Yerusalem, aka moyodungkuḷ in batoḷ in dodobku, potaaudon kon inia, kon takitku naa in takitbí in tanob.

⁹Yo degá batoḷ in dodobmu noiḻiu kon batoḷ in dodob mita ibanea, ei mongodeaga inta totok in moḷunat? Degá batoḷ in dodobmu noiḻiu kon batoḷ mita in dodob ibanea, modapot in iko nopotabá kon inami modandi?

¹⁰Batoḷ in dodobku motorindog bo moḷunat, noiḻiu kon intau mopuḷú noribu.

¹¹Uḷunea naonda bo buḷawan, buḷawan taakan, buoknea noḻikog bo norondí, ná korondí in kawag.

¹²Matanea naonda bo paḷoma kon bokaká in tubig, paḷoma inta noinggú in susu, nonguyom kon bingkí in tabang.

¹³Putonginea naonda bo gobá in toyokayu inta mobondu, kuḻit in bibignea bungang bakung inta nopototuyú in taḷong mobondu taakan.

¹⁴Ḻimanea moropot, nogisising in buḷawan inta iḷambáan in permata, awaknea naonda bo uwaḷa in gajah inta sinabudan in batu nilam.

¹⁵Sioḷnea naonda bo oigi mita marmar nobudó, inta inoḻitan in buḷawan taakan. Pongongawaknea ná kogaga in buḷud mita kon Libanon, bo ná kotaingkat in pangkoi in aras.

¹⁶Totuu mokosanang in pososingognea, bayongan yagi-yagi kon inia mokoangá. Natuata batoḷ in dodob bo yobayatku, ei mongodeaga mita in Yerusalem!