Read Mongondow DONDONG MOḶANTUD 6 Bible Online

DONDONG MOḶANTUD 6 - Mongondow bible

DONDONG MOḶANTUD 6

¹Minayá onda in batoḷ in dodobmu, ei bobay inta totok in moḷunat? Minayá onda in batoḷ in dodobmu, sinbá kami tumakin motayak kon inia?

²Batoḷ in dodobku minayá in gobánea, kon gobá in toyokayu sin moḷukad kon domba mita kon gobá, bo mosipú kon bungang mita bakung.

³Akuoi naa in kapunyaan i batoḷ in dodobku, bo sia in kapunyaanku, sia in noḷukad kon domba mita kon yua-yuak in bungang mobondu.

⁴Moḷunat in iko, batoḷ in dodobku, ná koḷunat kotá in Yerusalem, ná kogaga in kotá in Tirzah. Iko in totokbí in mokoangá naonda bo tontara mita kodia-dia in banderanea.

⁵Dikapa imindoi mako kon inakó, sin pooindoimu mokotoboḻingu kon inakó. Buokmu naonda bo paanan in bembé inta mosiḻig kon buḷud mita in Gilead.

⁶Ingiponmu mobudó naonda bo paanan in domba inta bagupa ginonsingan bo ininggúan; moyogapang naonda bo ki adí mita in domba inta apang, tobatúmai diá in nobuḻi.

⁷Putongimu naonda bo bungai in delima iḷosi, noibuni kon koḷubungmu.

⁸Umpaka onom nopuḷú in buḷoi, bo waḷu nopuḷú in pahang, bo mongodeaga mobarong totok,

⁹táe tongábí tobatú in paḷomaku, inta kino sanangku, adí tuḷong kotabi-tabi i inánea. Mongodeaga mita moindoi bo modayow kon inia, buḷoi mita in datu bo pahang moibog kon inia.

¹⁰Ki ine in sia inta namangoi naonda bo bayag doḷo-doḷom, ná kogaga in moḷoben, ná kobayag in mata in singgai? Sia totok in mokoangá, naonda bo tontara mita kokada-kadai in bandera monia.

¹¹Akuoi namangoi kon gobá in upai, moindoi kon bungang mita kon ḷopá; degá pangkoi in anggur nonubudon, bo pangkoi in delima nonoburdon.

¹²Akuoi mokotanobdon totok kon tabimu, ná tanobku tumakoi kon kereta in parang moyotakin in intau mita moḷoben.

¹³Potayokdon, ei mongodeaga in Sulam, tantúdon poḻibu, sinbá mokosanang kon inami. Nongonu sin moiko in moibogbí moindoi kon inakó, bokaka akuoi in notayok kon yua-yuak in pipidan intau moantó inta namangoi noindoi?