Read Mongondow DONDONG MOḶANTUD 7 Bible Online

DONDONG MOḶANTUD 7 - Mongondow bible

DONDONG MOḶANTUD 7

¹O, mongodeaga inta motaingkat, mopia totok in sioḷmu momaké in silop tatua. Pongongawakmu naonda bo ḷambá, pinomia in intau mongongurig.

²Putodmu naonda bo palo noḻimbung inta diá kon dodai in onda in kinodaitan in anggur inta ain pinoyobauk. Sianmu naonda bo pinosipunan kon gandum, iḻibu in bungang mita mobondu.

³Tetému naonda bo ki adí in rusa doyowa, rusa apang doyowa.

⁴Sigogowmu naonda bo ḷangkeang uwaḷa in gajah. Matamu naonda bo tabang mita kon Hesybon, kon diug in bonawang Batrabim. Ngiungmu naonda bo ḷangkeang kon Buḷud in Libanon, inta noitayow kon kotá in Damsyik.

⁵Uḷumu naonda bo Buḷud in Karmel; buokmu inta sinuḷapid naonda bo aḻibobag, mokosanang in moindoi umpaka datu.

⁶Totuu moḷunat in iko uḻeku, inta kinotabi kon sigad inta kinosanang.

⁷Awakmu ná kotaingkat in pangkoi in kurma, tetému tua in bungainea mita.

⁸Moibog in akuoi moponik kon pangkoi in kurma tatua, bo mogamá kon bungainea mita. Igumon mako in tetému in naonda bo simpungoian in bungai in anggur, tompot poginaanmu ná kobondu in bungai in apel,

⁹bibigmu ná koromimit in tubig in anggur! Pomayádon mako sinbá anggur tatua moiḻig mayá kon batoḷ in dodobku, inta diá moobo-obot; bo mokopomuká kon totanoban, modapot in kon intau mita inta koyogot mosiug.

¹⁰Akuoi in kapunyaan i batoḷ in dodobku, sia in moibog kon inakó.

¹¹Koḻigai in kita mayá in rawang, uḻe batoḷ in dodobku, bo mosiug kon gobá kon yua-yuak in bungang totabian.

¹²Igai in kita doḷo-doḷom mayá in gobá, bo moindoi mongo pangkoi in anggur nonubudon, bo bungainea nobukádon; degá pangkoi in delima nonoburdon. Kon tua ogoikudon in tabiku kon inimu.

¹³Pangkoi in koitó mobondu in bónea, kon diug in ngara naton oyúon in bungai mita in ayop inta mopira in nanamnea, inta noonggotdon in sinipú bo inta bagupa sinipú; tua in sinagú kon inimu, uḻe batoḷ in dodobku.