Read Mongondow YESAYA 10 Bible Online

YESAYA 10 - Mongondow bible

YESAYA 10

¹Moboditodon in moiko inta nogaid kon hukum mita inta diá moadil sin pondorot kon bangusa-Ku.

²Pinongin aid natua moiko in moḷamboi kon intau bogá mokouḻí kon hak bo koadilan, bo mogagow kon kapunyaan in boba-bobay mita bo uno-unon.

³Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua?

⁴Ukurmu in tongábí ḻimodon kon parang andeka diaan nobaḻí intau inta dinakop. Táe ki TUHAN in umuranpabí tumorú bo tantú mohukum.

⁵Ki TUHAN in noguman, “Moboditodon in Asyur! Asyur in pakéon-Ku nobaḻí sambok bo popangkuḷ sin momongkug kon intau mita inta kinotugatan in torú-Ku.

⁶Akuoi in nopotabá mangoi kon Asyur sin monubu kon bangusa-Ku inta nonaḷámai kon i-Nakó bo nopomuká kon torú-Ku. Akuoi in nopotabá in Asyur sin mogagow bo monakow bo moritak kon bangusa-Ku naonda bo ḷobud kon daḷan.”

⁷Táe datu in Asyur oyúon in tomayánea tontaní. Sia in moniat momaké in aid motogat bo moyopú kon mobayong in bangusa.

⁸Sia in dinumodia, gumannea, “Tongguḷu in tontaraku mita in komintanbí datu!

⁹Inagowku in kotá mita in Kalno bo Karkemis, Hamat bo Arpad. Inagowku doman in kotá mita in Samaria bo Damsyik.

¹⁰Sinaḷowku in dodatuan mita inta nosumba kon berhala mita inta mokawa-kawasa nongkon onu inta oyúon kon Yerusalem bo Samaria.

¹¹Samaria bo bayongan in berhalanea ain iyopúku. Natua doman in aidankubí kon Yerusalem takin komintan berhala inta sinumba kon tua.”

¹²Táe ki TUHAN in noguman, “Aka inta aidan-Ku kon Buḷud in Sion bo Yerusalem tatua ain nopaḷut, Akuoi in mohukumbí kon datu in Asyur popisí in ḷoḷatú bo dodianea.”

¹³Datu in Asyur mongambungangaḷ, kainia, “Tua komintan inaidanku pinongin kawasaku tontaní. Akuoi in mobijaksana bo mopandoi. Pinopatanku in sigad mita in bangusa mita, bo inagowku in tongkaaḷ monia. Naonda bo bantong akuoi in noritak kon intau mita inta nomarenta.

¹⁴Bangusa mita kon dunia naonda bo pugad in ḷagapan; nogampangkubí totok in nogamá kon kapunyaan monia, naonda bo intau norakup kon natu inta sinaḷáan kon pugad. Diábí in koḻikip in mongaḻikokab, diábí in mobuká kon popadoknea andeka mociap.”

¹⁵Táe ki TUHAN in noguman, “Degá motaau in boḻiung in dumodia kon intau inta mopomaké kon inia? Degá garagaji in moponti-ponting in intau inta nopomaké kon inia? Deemanbí bobobak in nobuat kon intau, táe intaubí in motonggó kon bobobak.”

¹⁶Popisí in intau in Asyur ain dinumodia, ki TUHAN Inta Totok in mokawasa in mopoangoibí in yampoi in takit sin mohukum kon porwira mita inta mongotorindog. Mosia in ponikonbí in patú totok naonda bo tuḷú inta tantú momokak.

¹⁷Ki Allah inta motusi, sindar in Israel, in mobaḻíbí naonda bo dokot in tuḷú inta kon bonu in tosinggai momokak kon bayongan in yagi-yagi, nodapot in dogami mita.

¹⁸Kayuon mita inta moromon bo gobá mita inta mopia kon butá in Asyur in yompatonbí modait, naonda bo intau notakit inta nororiga dapot in minatoi.

¹⁹Pangkoi mita in kayu in dongka bidon topiḻik, dá mongoadí in mokoiap bidon kon tua.

²⁰Moiangoibí in wakutunea ki agat in bangusa in Israel inta nokoḷagui in diá bidon mopoandoḷ in ukurnea kon bangusa inta mongongawasa inta gogió momutú kon i monia, táe umandoḷ bidon kon i TUHAN, Allah inta mokudus in Israel.

²¹Ki agat in bangusa Israel inta noyakagdon in mogogai bidon mogaid kon inta moraat kon i Allah inta motorindog.

²²Umpaka intau in Israel tanaa notongkai in kobayongnea in bungaion kon dagat, tongábí tongonumai in mobui mangoi. Hukuman i TUHAN in nodiugdon, bo totuu kon patusbí bo moadil in bangusa tatua in yopúon.

²³Oo, sinangkub in butá in rimumudonbí i TUHAN Inta Totok in mokawasa; tuata in simpod in singog i TUHAN, bo diábí in motaau baḷuian bui.

²⁴Ki TUHAN Inta Totok in mokawasa noguman kon umat-Nea inta nogutun kon Sion, “Dika moondok kon intau in Asyur, umpaka mosia mondorot bo mopogutú kon i monimu ná inta pinomia in intau in Mesir koḻipod.

²⁵Kon bonu in wakutu motoyong torú-Ku kon inimu mogogaidon, bo mosia in yopúon-Ku.

²⁶Akuoi Ki TUHAN Inta Totok in mokawasa, in mosambokbí kon i monia in sambok uwoi, ná Akuoi nosambok kon intau in Midian kon Buḷud in batu Oreb. Asyur in hukumon-Kubí, ná Akuoi nohukum kon Mesir.

²⁷Kon tungkuḷ intua Akuoi in mopoḷuatdon kon i monimu nongkon pinondorotan in Asyur, bo mosia in diá bidon mongawasa kon i monimu.”[21]

²⁸Tontara in Asyur ain nogagow kon kotá in Ayat.[22] Mosia in noitaḻibdon kon Migron! Tongkaaḷ monia in sinaḷáan kon Mikhmas!

²⁹Mosia in noitaḻibdon kon iḷoḷanan bo nogogai kon Geba! Intau kon kotá in Rama gugur mako, bo intau in Gibea, kotá i Datu Saul, ain noḷagui.

³⁰Karakdon, ei intau in Galim! Indongogaidon, intau in Laisya! Tubagaidon, intau in Anatot!

³¹Intau in Madmena bo Gebim noḷagui nogadop.

³²Singgai in naa musung kon kotá in Nob, bo kon tua mosia morangkom kon koyungkum potundú kon Buḷud in Sion kon kotá in Yerusalem.

³³Ki TUHAN Inta Totok in mokawasa in mogumpagbí kon i monia naonda bo tanga inta pinongkó nongkon pangkoinea. Inta totok in mobambar bo inta moḷantud kon sigadnea in pupuḷonbí bo umpagon.

³⁴Ki TUHAN in mogumpagbí kon i monia naonda bo pangkoi in kayu kon yuak in kayuon pinupuḷ in boḻiung. Umpaka in mosia moropot ná pangkoi in kayu inta totok in motoyang kon Libanon, mosia in moumpagbí doman!