Read Mongondow YESAYA 11 Bible Online

YESAYA 11 - Mongondow bible

YESAYA 11

¹Buí i Datu Daud naonda bo pangkoi in kayu inta ain pinupuḷ. Táe ná doman onda nongkon tuodnea nomuká in poḻimping mobagu, natua doman nongkon buí i Daud in moiangoi in datu tobatú.

²Kawasa i TUHAN in mokapit kon inia, mopobaḻí kon inia mopia bo mobijaksana, mopandoi monimpod kon tosingogon bo mopoaid intua; monotaau kon ibog i Allah bo mopirisaya kon i-Nia.

³Koibognea in motoindudui kon i TUHAN. Sia in diábí monisig tongá indoian mako natua andeka podoyon kon singog in intau.

⁴Intau bogá ihakimnea kinoadil, intau inta diá kodaya dinuḷuannea takin gina motuḻid; intau kotaḷá ihukum podudui in parentanea, intau moraat iyompatnea.

⁵Sia in mogaid pongin moadil bo motoindudui kon bayongan yagi-yagi.

⁶Ungkú in kayuon in mogutundon moyotakin in domba, macan tutul mosiug kon diug in bembé. Ki adí in sapi in moranut kon bonok[23] moyotakin in singa, bo mongoadí in modia kon i monia.

⁷Sapi in moranutbí kon bonok moyotakin in beruang, ki adí mita monia mosiug moyotakin. Singa in mokaan kon wawa naonda bo sapi.

⁸Nodapot in adí mointok diábí tompaḻían aka mogogitog kon diug in uḷag mobisa.

⁹Kon Sion, Buḷud Motusi i Allah, diábí in moraat andeka momoguyaat. Dunia naa in mopuḻingbí in sinotaau soaḷ ki Allah, naonda bo tubig momuḻing kon dagat.

¹⁰Moiangoibí in wakutunea datu tobatú buí i Daud in tantú tontongan in bangusa mita. Mosia in mamangoibí kon inia, bo pogogutunannea in tango-tangoionbí.

¹¹Kon singgai tatua ki TUHAN in buipa doman momaké kon kawasa-Nea bo modia mobui kon umat-Nea inta kinotaḷáan kon Asyur bo kon Mesir, kon butá mita in Patros, Sudan bo Elam, kon Babel, Hamat bo ḻibuton mita inta mongoyayú.

¹²Ki TUHAN in mopoponikbí in bandera kon bangusa mita. Tuata in nobaḻí tomponuot kon Sia in mosipun bui kon bangusa in Israel bo Yohuda inta noirarit kon bayongan dunia bo modia kon i monia mobui.

¹³Dodatuan in Israel in diá bidon mointoi kon Yohuda, bo Yohuda in diá bidon mosaturu kon Israel.

¹⁴Mosia in moyotakin bidon in monubu kon intau in Pilistin kon toyopan bo mogagow kon bangusa mita kon pomukaan. Mosia in monaḷowbí kon bangusa in Edom bo Moab, bo bangusa in Amon in tumungkudbí kon i monia.

¹⁵Ki TUHAN in monggiotbí kon Ḷuok in Suez. Baḻíon-Nea in tompot mopatú mogirup dá Ongkag in Eprat mobaḻí pitu notanga in tubig inta mobabow, bo batúan in intau mokoḷoḷanbí kon tua takin momaké in aip in sioḷ.

¹⁶Bo kon umat-Nea inta ki agatnea in ogoianbí in daḷan moḷoben sin ḷuaian nongkon Asyur, ná kon tungkuḷ in Israel iḻumuai nongkon Mesir.