Read Mongondow YESAYA 13 Bible Online

YESAYA 13 - Mongondow bible

YESAYA 13

¹Naa in koyow i Allah, inta sinarima i Yesaya adí i Amos soaḷ Babel:

²Pokerabdon in bandera mita in parang kon tudu in buḷud inta noḷogat! Pokuanidon kon tontara mita, bo tonggódon in kokaḷmu sinbá mosia in monubu kon bonawang mita in kotá inta moḷoḷatú tua.

³Ki TUHAN ain nogoiní kon intau mita inta ain sinokopiḻí-Nea. Mosia in motorindog, mopirisaya kon ropot monia bo motaau pongata. Ki TUHAN in nopotabá kon i monia mohukum kon intau mita inta kinotugatan in torú-Nea.

⁴Indongogaika in dowawá kon buḷud, ná singog in pinosipunan in intau inta totok in mobarong. Indongogaika in dowawá in dodatuan mita bo bangusa mita inta noyosipun. Ki TUHAN Inta Totok in mokawasa in nonaridi kon tontara mita in parang.

⁵Mosia in namangoi nongkon ḻipú mita inta noyayú kon popod mita in dunia. Kon bonu in torú-Nea ki TUHAN in nomaké kon i monia sin moyopú kon sinangkub in dunia.

⁶Pogamuidon, sin singgai i TUHAN in nodiugdon, tuata in singgai koyopúan inta pinoangoi i TUHAN Inta Totok in mokawasa.

⁷Pomuḷoi in intau naonda bo moḻemé in ḻimanea bo moinggamá in baraninea.

⁸Mosia komintan koaputan in ondok inta motoyang, bo momaḻikotad sin monakit naonda bo bobay inta koyogot in mononggadí. Mosia in mosiindoian takin ḻia-ḻiaw in gina, pogotnea in mosimpuya popisí in mooyá.

⁹Singgai i TUHAN in moiangoibí, bo kon singgai tatua ki TUHAN in mopoaid in torú-Nea bo rogi-Nea inta motoyang. Butá in mobaḻí butá inta moḷogat, bo bayongan in intau baradosa in moyopú.

¹⁰Batúan in tundi bo pinosipunan in tundi mogogai in monindar; mata in singgai in simindip kon dodai in sia momuká, bo buḷan in diá bidon monindar bui.

¹¹Ki TUHAN in noguman, “Akuoi in mohukumbí kon dunia popisí in aidnea moraat, bo intau mita inta moraat popisí in dosa mita monia. Bayongan in inta moḷoḷatú in poompáan-Kubí, intau mododia bo moromú in hukumon-Ku.

¹²Intau inta posaḷamaton tongá topiḻik, mosia in moyaka-yakagbí nongkon buḷawan taakan.

¹³Baḻíon-Ku in ḷangit gumugur bo butá in moḷundan nongkon kinoḻitúannea kon singgai in Akuoi, ki TUHAN Inta Totok in mokawasa, mopoontong in torú-Ku.

¹⁴Intau ango-angoi inta nogutun kon Babel in moirangkapbí bo moḷagui mayá in ḻipúnea-ḻipúnea. Mosia in naonda bo rusa inta noḷagui nongkon moḷoḷutam, andeka paanan in domba inta diá in gombala.

¹⁵Ki inekabí in kodomokan tumbukonbí modapot in matoi.

¹⁶Mosia in mokoontongbí tontaní kon adí mita mointok monia romputon, baḷoi mita monia pogagowan bo ki buḷoi mita bobay monia domokon.”

¹⁷Ki TUHAN in noguman, “Akuoi in nopotabá kon bangusa in Madai[24] sin monubu kon Babel. Mosia in diábí motaau sogóon in saḷaka andeka buḷawan.

¹⁸Takin puḷu bo piotnea mosia in moḻimod kon intau mita inta nongoguodpa. Mosia in diábí motabi kon adí mita mointok bo diábí motabi kon mongoadí.

¹⁹Nongkon bayongan in dodatuan, Babel tua in inta totok in mogaga bo mokoyunggagá kon intaunea mita. Táe Akuoi, ki TUHAN, in morimumudbí kon inia, ná inta inaidan-Ku kon Sodom bo Gomora.

²⁰Diá bidon tobatúmai intau in mogutun kon tua. Diá bidon in intau in Arab mododondaḷoi inta moposindog in ḷoḷaigannea kon tampat tatua, bo diá bidon in gombala inta modia kon bembé dombanea sin moranut kon bonok kon tua.

²¹Tampat tatua in pogutunan bidon in biag mita ḻindong. Monikuḷu in monompugadon kon baḷoi mita monia, bo ḷagapan unta in mogutun kon tua. Bembé mita ḷoḷog mosimbanan bidon kon yuak in kinorumbunan tatua.

²²Ganggor in ungkú in kayuon bo serigala in kodongogan nongkon puri mita bo komaḻig mita in Babel. Wakutu korimumudannea motoyongdon bo wakutunea in diá bidon baḷuian bui.”