Read Mongondow YESAYA 15 Bible Online

YESAYA 15 - Mongondow bible

YESAYA 15

¹Naa in koyow i TUHAN kon Moab. Kotá in Ar bo Kir iyompat tongá tonggobii, bo butá in Moab mobaḻí moingongow totok.

²Intau inta nogutun kon Dibon [25] motakod kon buḷud sin mongombaḷ kon tampat pososumbaan kon dewa mita. Intau in Moab takin morobonoḷ in dodob mogamui kon kotá in Nebo bo Medeba. Mosia in nongarug kon uḷu bo kumi nobaḻí tomponuot kon norobonoḷ in dodob.

³Intau mita kon daḷan nogibintoḷ nobaḻí tomponuot nonogumatoi; intau nogamui bo nongombaḷ kon rawang bo kon tudu in atop in baḷoi.[26]

⁴Intau in Hesybon Eleale momaḷú, bo singog monia in kodongogan nodapot kon Yahas. Nodapot in tontara mita mogugur; mosia in kinobuḻiandon in barani.

⁵Akuoi in motabi kon Moab! Intaunea in noḷagui minayá in kotá in Zoar bo kon Eglat-Selisia. Oyúon in notakod kon daḷan nopobayá ná Luhit sindaḷan nongombaḷ; oyúon in noḷagui minayá in Horonaim sindaḷan kumarak sin kinoantugan in bodito.

⁶Tubig in Ongkag in Nimrim bo bonok inta nobiag kon bingkínea ain noingkag totok, diádon in mobobiag in noḷunow.

⁷Intau mita in ḷumoḷan kon tapá in Haarabim bo moḷongasi moposaḷamat kon bayongan in kapunyaan monia.

⁸Kon bayongan tampat kon pinosigadan in Moab kodongogan in karak. Amui tua in kodongogan kon Eglaim bo Beer-Elim.

⁹Kon Dibon tubig in ongkag nobaḻídon nopura sin noyobauidon in dugú. Bo ki Allah in mopoangoibí kon intau mita kon tua in inta moiḻiu kon tua in kotoyangnea. Moḷoḻimod inta potabá-Nea in moḻimodbí kon bayongan in intau in Moab inta nobiagpa.