Read Mongondow YESAYA 16 Bible Online

YESAYA 16 - Mongondow bible

YESAYA 16

¹Nongkon kotá in Sela kon padang gurun, bangusa in Moab nokidia in adí in domba sin ogoi mobaḻí tombuinag kon mongongawasa kon Yerusalem.

²Intau mita in Moab nogoḷat kon bingkí in Ongkag in Arnon sindaḷan maya-mayá takin notoboḻingo naonda bo ḷagapan inta inuntun nongkon pugadnea.

³Mosia in noguman kon bangusa in Yohuda, “Pogumandon mongo onu in musti aidan nami. Kobaḻídon pononiungan nami inta mooḷom kon tungkuḷ in singgai moutu, bo pomayádon mako in kami in moniung kon siungonmu. Kami naa in moḷoḷagui; bunipa in kami bo dika mopoyagi-yagimai kon inami.

⁴Ogoipa in kami mogutun kon butámu. Ḷukadaipa in kami nongkon intau mita inta moibog moḻimod kon inami.” (Pondorotan bo poḻimodan in mopaḷutdon, bo intau mita inta morimumud bo mondorot kon butá in Israel in moinggamádon.

⁵Onda intua intau tobatú nongkon buí i Daud in mobaḻí datu, bo sia in momarenta kon bangusanea podoyon kon tabi bo satia. Sia in moposindog in inta moadil bo moḷamemet in mogaid kon inta mobanar.)

⁶Bangusa in Yohuda in moguman, “Kami in nokodongogdon kon naonda in koḷoḷatú in bangusa in Moab. Kinotaauan nami kon mosia in mododia bo moḷoḷatú. Singog monia in tongábí ambungangaḷ inta diá in bonunea.”

⁷Tuamai pomayádon mako in bangusa in Moab mosiamuian. Pomayádon mako in mosia in mongombaḷ aka mokotorop kon kaanon mopia inta kaanonmai monia kon kotá in Kir-Hareset. Pomayádon mako in mosia in kobuḻian in kamang bo mogamui.

⁸Gobá mita kon diug in Hesybon bo gobá mita in anggur Sibma ain iyompat, gobá mita inta biasamai mopomungai in anggur inta totok in mopia kon mongongawasa mita bo mokopopisí kon i monia moḷoḷangu. Dungkuḷmai gobá mita in anggur tatua nobuká nodapot kon kotá in Yaezer; bo nopobayá in pomukaan nodapot kon rawang in bungaion, bo kon dotá in toyopan dapot in ḷoḷan in Laut Mati.

⁹Tanaa inombaḷanku in pangkoi in anggur Sibma ná pinongongombaḷku kon Yaezer. Akuoi in nononggoḷuá kon Hesybon bo Eleale, sin bungai in pinomuḷanea kinaan komintan in musung.

¹⁰Diá tobatúmai in noḷunganga in gina kon gobá mita inta noḷumbá tatua. Diá in nomaḷú nopia-pia in gina andeka nodondong kon gobá in anggur. Diá in nomugut kon anggur sin pomiaan tubig in anggur. Akuoi in nopogogaidon kon goḷokap pia-pia in gina monia.[27]

¹¹Ginaku in kinumarak bo nogoguyaat in nokoontong kon kaadaan in Moab bo Kir-Heres.

¹²Intau in Moab iyumoyiga in notakod kon buḷud pobobogoian kon kuruban kon tampat pooibadaan monia sin mosambayang, táe diá in mangaḻenea.

¹³Tuata in koyow inta koḻipod inogoi i TUHAN soaḷ Moab.

¹⁴Bo tanaa in ki TUHAN in noguman, “Toḷupa notaong naa, bayongan in kaoyúonan inta pinoyunggaga in Moab in moinggamádon. Rayatnea inta mobayong in mobaḻídon moyakag bo moyangkó.”