Read Mongondow YESAYA 2 Bible Online

YESAYA 2 - Mongondow bible

YESAYA 2

¹Naa in koyow i Allah kon Yohuda bo Yerusalem inta sinarima i Yesaya ki adí i Amos:

²Kon singgai mita moiduduimai buḷud kinoḻitúan in Baḷoi TUHAN inta moḷantud bo inta noisindog moroton kon tudu in buḷud mita bo tombuḷudnea mita. Bayongan in bangusa moyotakinbí in mayá intua,

³mosia komintan in moguman, “Igai in kita mayá motakod kon Buḷud i TUHAN,[3] mayá in baḷoi Allah in Israel. Sia in motundúbí kon i naton onu in musti aidan naton. Kita in dumuduibí kon daḷan-Nea, sin totundú i TUHAN in mamangoi nongkon Yerusalem, Sia in mosingog nongkon Sion.”

⁴Sia in mohakimbí kon sigad in bangusa mita, bo momontow kon pelekara kon sigad in suku mita in bangusa. Pitow in tontaḷon pomiaan pajeko, bo ginubat aidan roratab. Bangusa mita in diábí mositubuan, diábí domandon mosadia moparang.

⁵Ei, buí i Yakub, igai in kita dumudui kon bayag i TUHAN!

⁶O Allah, Iko in nonaḷádon kon umat-Mu, buí i Yakub! Sin kon ondakabí kon butá tanaa intau in mopomaké in ilimu sinotaau monia inta nongkon pomukaan bo nongkon Pilistin.[4] Intau mita dumudui kon adat in intau ibanea.

⁷Ḻipúnea nopuḻing in saḷaka bo buḷawan, bo kapunyaannea diá koiapan. Kabaḷonea mobayong totok, bo keretanea diádon koiapan in kobayongnea.

⁸Kon bayongan tampat oyúon in berhala, bo mosia in mosumba kon patong mita inta pinomia monia tontaní.

⁹Batúan in intau in singkuḻeonbí bo poompáan. Dika mongampung kon i monia o TUHAN!

¹⁰Mosia in tumuot kon bonu in angob mita kon buḷud mita in karang, andeka mongaḻi kon bubú kon bonu in butá sinbá moiḷagui kon torú i TUHAN bo nongkon kawasa-Nea inta moḷantud.

¹¹Intau moḷoḷatú in poompáanbí bo intau mododia potungkudon. Tongá ki TUHAN tontaní in poḷantudon.

¹²Kon singgai tatua ki TUHAN Inta Totok in mokawasa in mopoompámai kon bayongan inta motosiḷantud bo mohukum kon bayongan inta moḷoḷatú bo inta mododia.

¹³Pangkoi mita in ḷokuyú inta moḷantud kon Libanon bo bayongan in pangkoi in kayu moḷoben kon Basan in tokoyompaton.

¹⁴Buḷud mita bo tombuḷudnea mita inta mogaga in tondodaion.

¹⁵Ḷangkeang mita inta moḷantud bo dinding mita in poḷoḷukadan in umpagon.

¹⁶Kapaḷ mita inta totok in moḷoben bo inta totok in mogaga in potaḷomonbí.

¹⁷Intau moḷoḷatú in poompáan, bo intau mododia in potungkudon. Tongá ki TUHAN tontaní in poḷantudon.

¹⁸Berhala mita in moinggamádon komintan.

¹⁹Kon dodai in ki TUHAN simindog bo modandú kon butá, intau in tumuotbí kon bonu in angob mita kon buḷud mita in karang andeka mongaḻi kon bubú kon bonu in butá sinbá moiḷagui kon torú i TUHAN bo nongkon kawasa-Nea inta moḷantud. Aka singgai tatua in moiangoi, berhala mita saḷaka bo buḷawan inta pinomia bo sinumba monia tua in taḷaanbí mako natua ogoi kon boyod bo poniki.

²²Dá, dikabí umandoḷ kon intau inta mato-matoi naa, sin sia in diábí in mangaḻenea.