Read Mongondow YESAYA 21 Bible Online

YESAYA 21 - Mongondow bible

YESAYA 21

¹Naa in koyow kon Babel: Ná uḷu in tompot motoninsing moitaḻib kon padang gurun, natuata in koangoi in bodito nongkon butá inta motoyang.

²Akuoi in nokoontong kon oontongon onu mita inta mobaḻí inta mokoondok; soaḷ pomaḷidawaan bo pomutúan. Monikdon, tontara in Elam, tubudon! Ei tontara in Madai, kopungdon! Ki Allah in mogimpaḷutbí kon bayongan in roriga inta pinopisí in Babel.

³Oontongon tatua nokotoboḻingo kon inakó nodapot in diá in nokoontong andeka mokodongogpa. Akuoi in inagían in ondok bo nakit, naonda bo bobay tobatú inta koyogot in mononggadí.

⁴Moḻia-ḻiaw in ginaku; porasaan moondok nokourot kon awakku. Doḷom inta kinotanobanku tongá nokopoangoi kon ondok.

⁵Inontongku doman in pinongaanan bobutungan inta ain sinadia; ḷoḻitúan in intau mita inta sinoko oiní ain sinadia. Mosia in nongaan bo nonginum. Bo daḻídon kinodongogan in parenta: “Ei porwira mita! Sadia in kaḻeawmu!”

⁶Bo ki TUHAN in noguman kon inakó, “Bayádon pokiḷukadai in moḷoḷukad tobatú bo poguman kon inia kon poguman onu in inontongnea.

⁷Aka sia in mokoontong kon tontara mita inta sinumakoi kon kabaḷo mamangoi tumododoyawa, tontara inta sinumakoi kon keledai bo unta, yo mustibí taridiannea kopiaan.”

⁸Onda intua moḷoḷukad tatua[31] nomaḷú, “Tuang, akuoi ain noḷukad pomuḷoi in singgai bo doḷom.”

⁹Indoiaidon, tuata in mosia! Tontara inta sinumakoi kon kabaḷo inta namangoi tumododoyowa. Onda intua moḷoḷukad tatua nopotaau, “Babel ain noḷabú! Patong mita inta sumbaanmai monia norimumud positabud kon butá.”

¹⁰Bangusaku Israel! Iko ain iyunta-yuntai bo irita-ritakan mako naonda bo batoḷ in gandum. Tanaa in potaaukudon kon inimu in habar mopia inta dinongogku nongkon i TUHAN Inta totok in mokawasa, Allah in Israel.

¹¹Naa in koyow kon Edom. Oyúon in intau in momaḷú kon i-Nakó nongkon Edom, “Ei, moḷoḷukad, moonggotpa degá in doḷom tanaa? Tongonupa nojam bo mobayag?”

¹²Tubagku, “Doḷo-doḷom in moiangoibí táe doḷombí doman. Aka moibog moḻibó, yo angoidon bui bo poḻibó.”

¹³Naa in koyow kon Arab: Ei intau in Dedan, kapilah-kapilahmu nononḷoḷaigan kon siungonmai in bo bonganga kon butá in Arab.

¹⁴Ei intau kon butá in Tema, ogoiaidon in inumon kon intau mita inta irumogang inta namangoi kon inimu, bo ogoiaidon in kaanon kon intau mita inta noroḷagui mangoi.

¹⁵Sin mosia in noḷaguidon kon pitow inta ain irabut, bo nongkon piot inta ain pinopopiot, bo nongkon parang inta koyogot mobaḻí.

¹⁶Bo ki TUHAN in noguman kon inakó, “Noitongkaná in totaongpa bo kotoyangan in suku mita Kedar in mopaḷutdon.

¹⁷Momomiot mita in Kedar in intau inta totok in motorindog. Táe tongábí topiḻik nongkon i monia in mosaḷamat. Akuoi, ki TUHAN Allah in Israel ain nosingog.”