Read Mongondow YESAYA 23 Bible Online

YESAYA 23 - Mongondow bible

YESAYA 23

¹Naadon in koyow soaḷ Tirus. Ei ḷoḷumeag mita in Spanyol inta noḻibu kon baḷangon, pogamuidon! Kon dodai in iḷumeag nobui nongkon Siprus, moiko in pinopotaauan kon kotá in Tirus ain norimumud. Totubuan bo baḷoimu mita ain nobaḻí apat.

²Pogamuidon, ei intau inta nogutun kon bingkí in dagat, mododagang mita in Sidon! Sin biasamai moiko in mopotabá kon intau mita mayá in ḷoḷan in dagat sin mopotaḷui bo motaḷui kon gandum in Mesir bo modagang takin bayongan in bangusa.

⁴Ei kotá in Sidon, kahoromatanmu ain nobuḻi! Baḷangon inta modaḷom diádon akuonnea in iko, gumannea, “Akuoi in diápabí kon dodai in onda in nononggadí, diápa kon dodai in onda nomiag kon adí ḷoḷaki andeka bobay.”

⁵Nodapot in intaupa in Mesir moitaḻikokogbí bo modoḻiok aka mokodongog kon Tirus in iyopúdon.

⁶Pogamuidon, bo poḷaguidon bayá in Spanyol, ei intau inta nogutun kon bingkí in dagat!

⁷Indoiaika in kotámu Tirus inta oyúondon nongkon dungkuḷpamai. Naa degá in kotá inta biasamai mobarasanang? Naa degá in kotá inta nopotabá in intau mita minayá in ḷoḷan in dagat sin morantau mayá in tua?

⁸Deemanbí mododagangnea mita degá inta intau mita moḷoben inta totok in ihoromat kon dunia? Ki ine in nonantú kon mopoḷabú kon Tirus, kotá inta totok in mokawasa tanaa?

⁹Ki TUHAN Inta Totok in mokawasa, Siabí inta ain nonantú tatua. Sia in nonantú kon momaḷutdon kon kaḷakuang in intaunea kon bayongan inta bungai in oaidan inta ain nouḻí monia, bo mopoompá kon intau mita inta ihoromat kon dunia.

¹⁰Bayádon pononggobá kon gobámu, ei intau in Spanyol, sin tampat pomomiaan kon kapaḷ in diádon.[33]

¹¹Ki TUHAN ain nopoyopa in ḻima-Nea kon ḻimonikan in dagat bo mopoḷabúdon kon dodatuan mita. Sia in nomarenta sinbá poḷoḷukadan mita kon Penisia in yompatondon.

¹²Guman i TUHAN, “Ei kotá in Sidon! Iko in diá bidon mobarasanang bui. Intaumu mita in dinorotan. Umpaka in mosia noḷagui minayá in Siprus, diábí in mosia moaman.” (

¹³Deemanbí bangusa in Asyur, táe bangusabí in Babel inta nopomayá mako in kotá in Tirus kinawasa in mahaḷuk moraat. Mosiabí doman inta noposindog in ḷangkeang mita pongongopungan, nogumpag kon poḷoḷukadannea mita bo nomaḻí kon kotá tatua norumbun.)[34]

¹⁴Pogamuidon, ei ḷoḷumeag mita! Kotá inta pongata-ngata monimu ain norimumud.

¹⁵Moiangoibí in wakutunea Tirus in koḻiongan kon bonu in pitu nopuḷú notaong, notongkai in umur in datu tobatú. Aka moitaḻibdon in sempo tatua, Tirus in nádon onda bo bobay sundaḷ kon bonu in dondong tanaa:

¹⁶Gamádon in kecapi, ḻibudon in kotá, ei sundaḷ ḷaḻe inta kinoḻiongan! Kutidon in kecapi, podondongpa bui, sinbá iko in kotoropandon bui.

¹⁷Mopaḷut mako in pitu nopuḷú notaong tatua, ki TUHAN in monoropdon bui kon Tirus bo mobogoidon kon inia mogaid kon oaidannea dungkuḷmai. Sia in modagangdon takin bayongan in dodatuan kon dunia naa.

¹⁸Kauntungan bo boḻi in pinogaidan inta nouḻínea in diábí tagúonnea, táe posumbaneabí kon i TUHAN. Intau mita inta nosumba kon i TUHAN in mopomakébí in doit tatua sin potaḷui kon kaanon bo pakéon kon inta paraḷu monia.