Read Mongondow YESAYA 24 Bible Online

YESAYA 24 - Mongondow bible

YESAYA 24

¹Ki TUHAN in moyompatbí kon dunia, modapot in mobaḻídon moḷogat bo moingongow. Baḻintuangon-Neabí in tudunea bo poyayiton in intaunea mita.

²Bayongan intau in moiḷampangbí kon ukur inta motongkai: imang mita bo rayat, ata bo tuangnea, mopopotaḷui bo mototaḷui, moḷoḷuan bo inta nopoḷuan, nooyúon bo nobogá.

³Butá in moiraritdon bo rimumudon. Ki TUHAN ain noguman, bo tua in notantú bidon kon mobaḻí.

⁴Butá mobaḻí moingkag bo moḷaḷow, sinangkub in dunia morobonoḷ in gina. Ḷangit bo butá tumpaḷa morobonoḷ.

⁵Butá mobaḻí mokotor popisí in intaunea iḻimimpat kon parenta mita i Allah, nomaḷui kon inta ain sinantú-Nea mita bo nonoḻikud kon dodandian inta pinomia-Nea noyotakin monia modapot in mononoi.

⁶Tuamai in ki TUHAN ain nongutuk kon butá bo nohukum kon intaunea popisí in aid monia. Mosia in pinokak bo tongá topiḻik in nongkon i monia in nosaḷamat.

⁷Pangkoi in anggur mosingkian bo tubig in anggur moingkag. Intau inta dungkuḷmai noḷunganga in gina tanaa norobonoḷ in dodob.

⁸Diá bidon in kodongogan in pokutian kon kecapi inta mokosanang bo pobongkugan kon rebana inta morame. Kororame in intau inta kinoḷungangaan in gina in noigogaidon.

⁹Diádon in monginum kon anggur sindaḷan modondong, diádon in mokonanam kon kopia in oinumon inta mokoḷoḷangu.

¹⁰Sinangkub in kotá noropatoi; bayongan in ngara in ḷoḻingkop in baḷoi kinunsían sin kitogi baḷoi moondok.

¹¹Intau mita nomaḷú kon daḷan mita popisí in kinodaitan in tubig in anggur. Diádon in mokosanang kon butá tatua modapot in mononoi.

¹²Kotá ain norimumud totok, bo bonawangnea mita noumpag posiyayit.

¹³Tuata in mobaḻí kon sinangkub in dunia kon batúan in bangusa. Notongkai ná kon sempo in posipunan kon bungai in boyó, kon dodai in bungai in zaitun ginamá nodapot in nodait bo bungai in anggur inta imbuitnea sinipú nongkon pangkoinea.

¹⁴Intau mita inta mosaḷamat in modondong takin pia in gina. Intau kon toyopan in mopotaaubí in koagung i TUHAN

¹⁵bo intau mita kon dotá in toyopan in modayowbí kon i-Nia. Intau mita inta kon bingkí in dagat in mopoḷantudbí kon i TUHAN Allah in Israel.

¹⁶Nongkon popod in dunia kodongogandon in dondong dodayow kon Israel, bangusa inta motoindudui. Táe moboditodon in akuoi! Moajar in ginaku! Momomaḻidawan tantúpabí momaḻidawan, modapot in modugangdon in toḻidawan monia.

¹⁷Indongogaidon, ei bayongan in intau kon dunia! Kodoḻiokan, poyogaḷap bo potait mogoḷatdon mako kon i monimu.

¹⁸Intau inta moḷagui nongkon kodoḻiokan in moibonubí kon poyogaḷap, bo intau inta diá kodomokan in poyogaḷap moibaaḷbí kon potait. Uyan morogot in moḷabúbí nongkon ḷangit, bo apad in butá in modandúbí.

¹⁹Butá naa in moḷau, moromput bo moḻiai.

²⁰Bal in dunia moikuyung mako naonda bo intau noḷoḷangu bo moandag magí-mako naonda bo ḷaig inirup in deḷang. Dunia noumpag popisí in nobogat in dosanea. Norimumud in sia bo diá bidon moisindog bui.

²¹Kon dodai intua ki TUHAN in mohukumbí kon mongongawasa mita in ḷangit bo datu mita kon dunia.

²²Mosia in sipunonbí moyotakin naonda bo intau mita in ponjara kon bonu in bubú, bo pobonu kon ponjara modapot in moiangoi in wakutunea hukumon.

²³Buḷan in simindip bo mata in singgai in diá bidon monindar, sin ki TUHAN Inta Totok in mokawasa in momarentabí mobaḻí datu. Sia in momarentabí kon Yerusalem, kon tudu in Buḷud in Sion, bo mopoontong in koagung-Nea kon itoi mita in umat-Nea.