Read Mongondow YESAYA 26 Bible Online

YESAYA 26 - Mongondow bible

YESAYA 26

¹Kon dodai intua intau mopodondong in dondong tanaa kon butá in Yohuda “Totuu moroton in kotá naton; ki Allah tontaní in noposindog in benteng-Nea, kon naa mosaḷamat in kita.

²Bukádon in bonawang mita, sinbá tumuot in bangusa inta motoindudui, bangusa inta nogaid kon onu in kinoibog i Allahnea.

³TUHAN, Iko mobogoi in dodamean bo kobiagan motompia kon intau inta moroton in ginanea, sin mopirisaya in sia kon ini-Mu.

⁴Umurandon popirisaya kon i TUHAN, sin ki TUHAN Allah tantú moḷukad kon i naton.

⁵Ki TUHAN mopoonag kon intau inta moḷoḷatú; Sia in morimumud kon kotá monia inta dininding, bo potondodaion-Nea in butá.

⁶Intau mita bogá bo inta mororiga in moritakbí kon inia.”

⁷Intau inta motuḻid in gina in mongin daḷan inta motuḻid, sin Iko, TUHAN in nomontang kon daḷan bayáannea.

⁸Kami in dumudui kon onu inta sinantú-Mu, o TUHAN, bo tantú mogoḷat mako kon ini-Mu; Ikobí in dayowon bo inta tano-tano bo in gina nami.

⁹Dimukudku in mokotanob kon ini-Mu kon dodai in doḷom, ginaku in mogoḷat mako kon ini-Mu kon dodai in doḷo-doḷom. Aka Iko in monisig kon dunia naa, intau mita kon dunia naa in monotaaudon kon onu inta moitutui.

¹⁰Umpaka intau moraat pinopoaidan in inta mopia, diábí doman in sia mobalajar kon onu inta mobanar. Kon negara inta oyúon in hukum sia in mopoaidbí doman kon inta motombogá, bo doíbí motarima kon kawasa i TUHAN.

¹¹TUHAN, Iko in nogoḷatdon mohukum kon musung-Mu mita, táe diábí kinotaauan monia. Pomayádon mako mosia in mooyá in mokoontong kon tabi-Mu kon umat-Mu. Pomayádon mako modait in mosia moyopú pongin hukuman inta ain pinopooḷat-Mu mako kon i monia.

¹²TUHAN, Iko in mopobaḻíbí kon inami mobiag motompia; bayongan inta inaidan nami, Ikobí in nopoaid kon inami.[36]

¹³Kami in nokoimontandon in kinawasa in tuang mita ibanea, táe tongábí Iko in ináku nami, o TUHAN Allah nami!

¹⁴Mosia tua in minatoi bidon bo diábí mobiag bui, dimukudnea in diábí mobiag bui. Sin mosia in nodaitdon iyopú-Mu bo pinopatan-Mudon kon bonu in gina.

¹⁵Binaḻí-Mudon kami umat-Mu nobayong totok, o TUHAN, bo pinooḷad-Mudon in butá nami, tuamai Iko umuran inuntu.

¹⁶Iko ain nohukum kon i nami; kon bonu in roriga kami in nobui mangoi kon ini-Mu, bo nosambayang kon ini-Mu, TUHAN.[37]

¹⁷Naonda bo bobay inta mononggadídon monahang kon monakit bo momaḷú sin monakit, natuata in kami kon tayowon-Mu, TUHAN.

¹⁸Kami in sidia bo monahang kon monakit, táe diábí nopononggadí in onu bo onu; kami in diábí nobogoi in kasaḷamatan kon dunia, diábí doman nodugang kon kobayong in intaunea. [38]

¹⁹Umat-Mu inta ain minatoi in mobiagbí bui, awak mita monia in mobiagdon bui. Intau inta ain iḷobong kon bonu in butá in mobiagbí bo morogiow. Naonda bo oḷú inta mokoonow kon butá, Iko in momiag kon umat-Mu inta ain noonggot in minatoi.

²⁰Tuotdon kon bonu in baḷoimu, ei bangusaku, bo ḻingkopaidon in ngara. Pogadopdon motoyong modapot in torú i TUHAN mooyongdon.

²¹Ki TUHAN in moponagbí nongkon tampat-Nea kon soroga sin mohukum kon intau kon dunia sin dosa monia. Pinoḻimodan inta inaidan monia inumado-adop in poniatabí. Butá in diábí momumbun kon intau mita inta minatoi iḻimod.