Read Mongondow YESAYA 27 Bible Online

YESAYA 27 - Mongondow bible

YESAYA 27

¹Kon dodai intua ki TUHAN in momakébí in pitow-Nea inta moropot bo moḷanit sin mohukum kon Lewiatan, [39] uḷag inta ḷumandai bo iḻimibo-ḻibod tua, bo moḻimod kon naga in dagat.

²Kon dodai intua ki TUHAN in moguman, “Podondongdon soaḷ gobá in anggur-Ku inta mogaga.

³Akuoi, ki TUHAN, moḷoḷukad-Nea; pomuḷoi mako butakanku intua, singgai doḷom ḷukadanku intua, sinbá diá in monuyayow kon inia.

⁴Diá bidon in porasaan-Ku tumorú. Aka kuma bo oyúon in bonok andeka bo bonganga, yo putúan-Kubí intua, bo momokak kon tua komintan.

⁵Táe aka musung mita in umat-Ku mokiḷukad kon i-Nakó, pomayádon mako in mosia moyodame takin-Ku, oo, moyodame takin-Ku.”

⁶Kon singgai moiduduimai, bangusa in Israel in mobaḻídon naonda bo pangkoi in kayu inta nonguakat bo modugang, bo momuḻing kon dunia pongin bungainea mita.

⁷Ki TUHAN in mohukum kon umat-Nea diábí ná kobogat in pohohukum-Nea kon bangusa mita inta nosaturu kon i monia. Sia in diábí moḻimod kon umat-Nea ná pinoḷoḻimod-Nea kon musung-Nea.

⁸Ki TUHAN in nohukum kon umat-Nea pinongin noḷumbú kon i monia kon butá in intau. Inuntun-Nea in mosia pinongin tompot moraat nongkon dotá in pomukaan.[40]

⁹Táe dosa mita in Israel in tongábí motaau ampungan aka mezbah in dewa mita giḻingon koyimokon naonda bo silon. Bayongan in pototubáan kon dupa bo lambang i Dewi Asyera in rimumudon doman.

¹⁰Kotá inta dininding tatua noingongowdon bo sinaḷáan naonda bo rawang noingkag inta diá koonu bo onu. Paanan in bobiagon mokaan kon bonok bo mogogai kon tua poḷat mokopodait kon daun mita inta kon tanga mita in kayu.

¹¹Aka tanganea mita moingkagdon bo moputoḷ, bobay mita in mamangoi mogamá sin pondungú. Bangusa tatua in diábí nonotaau in onu bo onu, dá ki Allah inta nomaḻí kon inia in diábí motabi andeka monotabi kon i monia.

¹²Kon dodai intua ki TUHAN in mosipun kon bangusa-Nea kon batúannea nongkon Ongkag in Eprat nodapot kon pinosigadan in Mesir. Sia in mopotondíbí kon i monia naonda bo intau inta mopotondí kon batoḷ in gandum nongkon kepanea.

¹³Kon dodai intua posingogonbí in torompet moḷoben sin mogoiní bui kon bayongan intau in Israel inta iḷumbú kon Asyur bo kon Mesir. Mosia in mamangoibí in Yerusalem sin mosumba kon i TUHAN kon buḷud-Nea inta motusi. [41]