Read Mongondow YESAYA 30 Bible Online

YESAYA 30 - Mongondow bible

YESAYA 30

¹Ki TUHAN noguman, “Mobodito in intoi mita in Yohuda, sin mosia in momarontak kon i-Nakó. Mosia in dinumudui kon tomayá mita inta deeman tomayá-Ku. Mosia in notekeng kon dodandian inta noyoposi in ibog-Ku. Dá moguntu-guntuḷdon in dosa monia.

²Mosia minayá in Mesir takin diá nopoigum in kinotantúan in tosingogon-Ku. Mosia in nokioḻiung kon Mesir bo moharap mako kon totuḷung in datu in Mesir.

³Táe datu tatua in mopokuyangbí kon gina monia, bo oḻiung inta inoḷat mako nongkon Mesir diábí mouḻí.

⁴Umpaka totabá mita in Yohuda ain noiyaput kon kotá mita in Zoan bo Hanes kon Mesir,

⁵bayongan in intau mooyábí popisí in nopongatadon in bangusa inta diá in mangaḻenea kon i monia. Inta nouḻí monia in deemanbí kauntungan andeka totuḷung, táe singkuḻebí.”

⁶Nanaa in koyow i TUHAN soaḷ mahaḷuk mita inta kon butá in toḷatan, “Totabá mita nopodatog kon keledai bo unta monia in tombuinag mita, bo nongin butá inta nopuḻing in inta mokoondok inta pinogutunan in singa, uḷag mobisa bo naga kokoḻikipan. Tombuinag mita tatua pinosumba monia kon bangusa tobatú inta diá mokotuḷung kon i monia.

⁷Totuḷung in Mesir diábí in mangaḻenea. Tuamai Mesir sinangoian-Ku, ‘Naga inta diá mokobahaya’.”

⁸Ki Allah in nopotabá kon inakó nomais kon aid moraat in umat-Nea kon bonu in buk tobatú nobaḻí tompoingat mononoi.

⁹Sin, mosia tua in bangusa inta moibog momaḷawang kon i Allah, moibog monguboḷ bo diá kon dodai in onda in moibog mokidongog kon totundú i TUHAN.

¹⁰Mosia in moguman kon nabi mita, “Kintum in bibig! Dika mopoguman kon inami onu in totuu, táe onubí in koibog nami indongogan. Pomayádon mako in kami umuran morai podudui in koibog nami.

¹¹Bayádon, bo pongin daḷandon ibanea. Dika ponuyayow kon inami in Allah mokudus in Israel.”

¹²Tuamai Allah mokudus in Israel moguman nanaa, “Moiko in doí motarima kon tosingogon-Ku bo mopongata in aid mondorot bo mouboḷ.

¹³Manangka intua moiko in kotaḷá. Moiko in naonda bo dinding moḷantud inta noḷau nongkon omonikan bo namonag; daḻí-daḻídon moumpag in moiko.

¹⁴Moiko in morimumudon naonda bo kuyon butá inta morumog posirarit, dá kon sigad in rimumudannea diádon in motaau pakéon pogamá kon baga nongkon doḷuong andeka ponayuk kon tubig nongkon bonu in bak.”

¹⁵Ki TUHAN Inta Totok in moḷantud, ki Allah mokudus in israel, noguman kon umat-Nea, “Pogogaidon mogaid kon diá mopia bo tantúdon koonow in gina, dá moiko in posaḷamaton-Ku. Popirisayadon kon i-Nakó pongin gina inta moodom, dá moiko in iropotan-Ku.” Táe moiko in doíbí!

¹⁶Nodapotbí in moiko nomiabí kon tomayá sin moḷagui nongkon musung tumakoi kon kabaḷo inta moḻikat. Mopia! Totuu moiko in mustibí moḷagui! Kai monimu kamai dá kabaḷomu tua in tugatbí in koḻikatnea, bokaka mogogaḷumubí in moḻika-ḻikat nongkon i monimu.

¹⁷Toribu in intau in moḷagui mokoontong kon gogondok in musung tobatú, bo gogondok in intau ḻima mokopopisí kon i monimu moḷagui komintan. Nongkon tontaramu mita tongádon tobatú in oigi in bandera kon tudu in buḷud.

¹⁸Umpaka natua, ki TUHAN in mogoḷatbí mako kon wakutunea mopoontong in totabi-Nea kon inimu. Sia in tantúbí nosadia in monotabi kon inimu. Sin ki TUHAN in Allah inta nogaid kon onu inta noitutui. Pia in kamang in intau inta inumandoḷ mako kon i-Nia.

¹⁹Ei moiko inta nogutun kon Yerusalem, moiko in diábí tantú mongombaḷ. Ki TUHAN in monotabibí, bo ḷagidon motubag kon i monimu aka moiko mokuani mokituḷung kon i-Nia.

²⁰Ki TUHAN in nobogoi in wakutu ponungkuḷan kon i monimu inta mobogat sin motundú kon i monimu. Táe tanaa Siadon tontaní in noyotakin monimu dá moiko in mokorasadon kon koangoian-Nea.

²¹Aka moiko bo tumabat nongkon daḷan, kon tumimu kodongogan in singog-Nea inta moguman, “Naa in daḷannea; pongin daḷan tanaa.”

²²Patong mita in berhalamu inta inoḻitan in saḷaka bo buḷawan in ḷumbúonbí monimu naonda bo apat, poḷat moguman, “Bayádon nongkon tayowonku!”

²³Aka moiko bo momunak, ki TUHAN in mopoangoi in uyan sinbá mobiag in pinomuḷamu tatua bo mobogoi in bungainea inta mobarong totok. Bo kon bobiagonmu in sadiaandon in bonok pongaanan monia inta mobendar.

²⁴Sapi koḷakian bo keledai inta pinaké nomajeko kon gobámu in mokaanbí kon kaanon in bobiagon inta totok in mopia inta ain sinadia tontaní.

²⁵Kon singgai benteng mita in musungmu kinopung bo intaunea mita iḻimod, batúan in buḷud bo tombuḷudnea mopoḷuaidon in tapá mita.

²⁶Buḷan in monindarbí ná kobayag in mata in singgai, bo mata in singgai in mobayagdon kopitu in kobayagnea ná biasamai, naonda bo bayag in pitu nosinggai sinipun nobaḻí tosinggai. Tua komintan in mobaḻíbí kon tungkuḷ in ki TUHAN mobakut bo mongundam kon kekeb mita in umat-Nea inta ain binibilnea.

²⁷Kawasa bo kamuliaan i TUHAN koontongan nongkon moyayú. Tuḷú bo poyok moponiata kon torú-Nea. Sia in moyosingog takin i monia, bo tosingogon-Nea mita momokak naonda bo tuḷú.

²⁸Sia in nopotabá in tompot umuna kon i-Nia naonda bo ḷunud modapot in sigogow inta mokoiḻig kon bayongan yagi-yagi. Sia in moyopú kon bangusa mita, bo diá mopotuoi kon tomayá mita monia inta moraat.

²⁹Táe moiko, umat i Allah, in moḷungangabí in gina bo modondong naonda bo kon dodai in doḷom poramean kon agama. Moiko in totokbí in mopia in gina naonda bo intau mita inta minayá bo sinakinan in bansí mopobayá in Baḷoi TUHAN, mododuḷu in Israel.

³⁰Ki TUHAN mopodongogbí in singog-Nea inta momulia, bo pomuḷoi in intau in mokorasabí kon kawasa-Nea inta motoyang. Torú-Nea in mokopoangoibí kon tuḷú inta mokopokak, uyan morogot, uyan batu bo deḷang.

³¹Intau in Asyur in modoḻiokbí aka mokodongog kon singog i TUHAN bo mokorasa kon hukuman-Nea inta mobogat.

³²Kon dodai in mosia mokorasa kon sambok-Nea mita, umat i TUHAN mobarasanang takin musik gimbaḷ bo kecapi. Ki Allah tontaní in moparang monayow kon intau in Asyur.

³³Nongkon koḻipodpabímai ain sinadia in tampat potubáan kon i datu in Asyur. Tampat tatua modaḷom bo mooḷad, binonuan in kayu pondungú inta noyoguntuḷdon. Ki TUHAN in mopoyongkitdon intua pongin mopoirup in poginaan-Nea ná ongkag in balerang.