Read Mongondow YESAYA 34 Bible Online

YESAYA 34 - Mongondow bible

YESAYA 34

¹Igaidon moyosipun, ei bangusa mita, bo indongogaidon. Pomayádon mako in sinangkub in dunia bo bayongan inta nobiag kon bonunea mamangoi bo mokidongog.

²Ki TUHAN in tumorú kon bayongan in bangusa bo bayongan in tontara monia. Hukumon-Neabí bo yopúon in mosia.

³Mayat mita monia in diá bidon ḷobongon, táe pomayádon mako moburuk bo mobó. Buḷud mita mobaḻídon mopura popisí in koiḻigan in dugú monia.

⁴Mata in singgai, buḷan bo tundi mita in morimumudbí. Ḷangit in ḻitodon naonda bo karatas. Tundi mita in moḷabúbí naonda bo daun mita inta mototak nongkon pangkoinea.

⁵Ki TUHAN ain nosadia kon pitow-Nea kon soroga, bo tanaa pitow tatua in moiantug kon bangusa in Edom inta ain pinopoḷabúan in hukuman bo yopúondon.

⁶Pitow i TUHAN in mototuyúdon in dugú bo mopuḻingdon in ḷongó monia, naonda bo dugú bo ḷongó in mahaḷuk kuruban. Sin ki TUHAN in moposadiadon in kuruban kon Bozra, bo mogaid kon poyopúan moḷoben kon butá in Edom.

⁷Intau mita in matoibí naonda bo sapi kaḻig bo sapi batánea. Ḻipú monia in mopuradon in dugú bo mopuḻing in ḷongó.

⁸Tuata in wakutu i TUHAN moduḷu kon Sion bo motuḻí kon musung-Nea mita.

⁹Ongkag mita in Edom in mobaḷui mobaḻí aspal, bo butánea in mobaḻí balerang. Imbuitnea sinangkub in butá modokot naonda bo aspal.

¹⁰Doḷom singgai dokot tatua in diá mopiong, bo poyok moidamonik nongkon inia modapot in mononoi. Butá tatua in taḷaan diádon in tombonunea bo moingkag modapot in adí bo ompu, bo diádon tobatúmai in intau in tumaḻib kon tua.

¹¹Ḷagapan undan bo landak in mogutundon kon tua, ḷagapan monikuḷu bo kawag in mogutun kon tua. Ki TUHAN mopobaḻí kon butá tatua modoḻiok bo moingongow naonda bo kon tungkuḷ in diápa pinomaḻían.

¹²Diá in datu in momarenta kon ḻipú tatua, bo bayongan in itoinea komintandon diá [44]

¹³Purinea mita bo kotánea mita inta oyúon in poḷoḷukadan in kobiagandon in bo bonganga bo bonok, bo pogutunan in ungkú in kayuon bo ḷagapan unta.

¹⁴Mahaḷuk moraat in maya-mayá magí mako kon bonunea; dimbuḷó mita moyotubagan, bo dimbuḷó doḷom[45] motayak kon tampat pogogaian.

¹⁵Kon tampat tatua uḷag mobisa in momia kon pugadnea, mononatu, mogoob bo moḷukad kon i adínea mita. Ḷagapan ḻiga-ḻigaga in moyosipun doman takin apangnea-apangnea.

¹⁶Tayakdon bo bacadon kon bonu in Buk i TUHAN: Diábí tobatúmai in nongkon bayongan in biag tatua in mobuḻi andeka diá kogapang. Sin natuata in parenta i TUHAN, bo Sia tontaní inta ain nosipun kon i monia.

¹⁷Ki TUHANbí inta nosilai kon butá tatua kon sigad monia bo kon batúannea notarima kon silainea. Mosia in mogutunbí kon tua modapot in mononoi, bo butá tatua in mobaḻí tonsilai monia modapot in adí bo ompu.