Read Mongondow YESAYA 35 Bible Online

YESAYA 35 - Mongondow bible

YESAYA 35

¹Padang gurun bo butá noingkag in moḷungangadon, bungang mita in komintan momungai kon rawang kayuon.

²Padang gurun in kobiagandon in yagi-yagi, bo mopodondong in dondong mita mosanang. Kogaganea in naonda bo Buḷud in Libanon, koḷoḷumbánea in naonda bo Ḷopá in Karmel bo Saron. Dá bayongan in intau in mokoontongbí kon kawasa i TUHAN, bo kamuliaan i Allah naton.

³Koropot in ḻima inta moyangkó, koroton in duḷud inta mourot.

⁴Poguman kon i monia inta mointok in gina, “Korigon in ginamu, dika moondok, ki Allahmu in mamangoi mohukum kon musung, Sia in mamangoi sin moposaḷamat kon i monimu.”

⁵Kon dodai intua intau bilog in mokoontongdon, bo intau bongoḷ in mokodongogdon.

⁶Intau ḻempeng ḷumanduk magí-mako naonda bo rusa, intau bobó morogiow moḷunganga. Sin bokaká moitoput nongkon padang gurun, ongkag moiḻig kon rawang kayuon.

⁷Bungaion inta mopatú in mobaḻí tabang, butá inta mobota-botak, pomukáan in bokaká. Tampat inta dungkuḷ pinogutunan in ungkú in kayuon, in kobiagandon in utó bo bakung.

⁸Kon tua in oyúondon in daḷan moḷoben, “Daḷan mokosaḷamat” in tangoinea. Intau binaradosa in diábí moitaḻib kon tua, Intau bodok in diábí mopoḷaḻe kon intau inta tumaḻib kon tua.[46]

⁹Kon tampat tatua in diábí in singa, andeka mahaḷuk moraat ibanea. Intau mita inta pinosaḷamat i TUHAN in mayá mongintua.

¹⁰Intau mita inta pinoḷuat i TUHAN in mobuibí; mosia in tumuot kon kotá in Yerusalem takin giow, pogot monia in moḷumbá popisí in ḷunganga in gina inta mononoi. Mosia in moḷunganga in gina bo morame; robonoḷ in gina bo amui moinggamádon komintan.