Read Mongondow YESAYA 36 Bible Online

YESAYA 36 - Mongondow bible

YESAYA 36

¹Kon taong impuḷú bo opatnea kon pinomarentaan i Hizkia datu in Yohuda, kotá mita in Yohuda inta dininding sinubu bo sinaḷow i Sanherib, datu in Asyur.

²Nopaḷut mako kon tua sia in nopotabá kon porwiranea moḷantud nongkon Lakhis minayá in Yerusalem moyotakin in tontara mobayong sin monuntut sinbá ki Datu Hizkia in tumungkud. Mosia in noiyaput in kotá tatua bo nogamá kon tampat kon gobá inta sinangoi Gobá in Momomatá, kon diug in got inta mogiḻig kon tubig nongkon tabang kon ḻimonikan.

³Bo pogawai i Hizkia toḷu namangoi nokipodungkuḷ kon porwira in Asyur tatua. Pogawai taya toḷu tatua in ki Elyakim ki adí in Hilkia tongguḷu in motoḷuadí in komaḻig, ki Sebna momomais in negara, bo ki Yoah ki adí i Asap, momomais in komaḻig.

⁴Porwira in Asyur noguman kon i monia, “Potaaudon kon i Hizkia in tosingogon i datu Asyur tanaa, ‘Nongonu sin moyakinbí totok in iko kon moropot

⁵kainimu kamai tongá tosingogon mokobaḷui kon akaḷ bo ropot in tontara? Ki ine in pongatamu modapot in iko in mokobaḻí monayow kon Asyur?

⁶Totuu kon iko in umandoḷ mako kon totuḷung in Mesir, táe tua in notongkaibí in moponungkud in pangkoi in padang; — bá moputoḷ in tungkud tatua bo ḻimamu in moiturak. Natuata in aid in datu in Mesir kon bayongan intau inta umandoḷ mako kon inia.’ ”

⁷Noiduduimai kon tua porwira in Asyur tatua noguman, “Andeka degá moiko in moguman kon moiko in umandoḷ kon i TUHAN Allahmu? Kon dodai in ki Hizkia nomarenta sinbá intau in Yohuda bo Yerusalem tongá moibada kon tayowon in mezbah kon Yerusalem, yo inta iyompatnea tua in mezbahbí bo tampat mita pososumbaan kon i TUHAN tontaní?

⁸Tanaa in akuoi podoyon kon tangoi in datu in Asyur mokobaḻí mobataru kon aka moiko ogoian in kabaḷo doyowa noribu, yo notantú bidon kon diábí tugat natua in kobayong in intaumu inta tumakoi kon kabaḷo tatua.

⁹Umpaka tongá monayow kon porwira in Asyur inta totok in moompá yo moiko nion in deemanbí ḷawangnea. Tongá moiko in moharap doman mako kon Mesir in mokidia in bantungan kereta in parang bo tontara mita inta tumakoi kon kabaḷo!

¹⁰Kaimonimu kamai yo kami in monubu bo monaḷow kon butámu takin diá in totuḷung i TUHAN? Ki TUHANbí tontaní in nopotabá kon inami monubu bo morimumud.”

¹¹Bo guman i Elyakim, i Sebna bo i Yoah kon porwira in Asyur tatua, “Tuang, poyosingogdon nami tumon singog in Aram, komangaḻean nami. Dika momaké in singog in Ibrani, sin komangaḻeandon in rayat kon tudu in dinding in kotá tatua.”

¹²Tubag in porwira in Asyur tatua, “Eta tongá kon i monimu bo kon i datumu tontaní in pinopotabáan i datu in Asyur kon inakó sin mopotaau in bayongan naa? Akuoi in mosingog doman kon rayat inta iḻimitú kon dinding tatua, inta moyotakin monimu mokaan kon taai monia tontaní bo monginum kon tapangnea tontaní.”

¹³Onda intua porwira moḷantud tatua in sinimindog bo nomaḷú kon bonu in singog in Ibrani, “Indongogaidon onu in pinoguman i datu in Asyur,

¹⁴‘Dika moibog uboḷan i Hizkia! Sia in diábí mokoposaḷamat kon i monimu!

¹⁵Dika indongogan in dondouḷug kon moharap kon i TUHAN. Dika morai kon ki TUHAN in moposaḷamatbí kon i monimu andeka moḷamboi kon tontara in Asyur mogagow kon kotámu.

¹⁶Dika indongogan in ki Hizkia! Akuoi, ki datu in Asyur moguman kon i monimu sinbá ḷumuai nongkon kotá bo tumungkud. Bain moiko motaau mokaan kon bungai in anggur nongkon gobámu tontaní, bo mokaan kon bungai in ara nongkon pangkoi in aramu tontaní, poḷat doman monginum kon tubig nongkon parigímu tontaní,

¹⁷modapot in moiko pampingonku kon ḻipú tobatú inta notombatangan in ḻipúmu tontaní. Kon tua oyúon in gobá in anggur inta mopomungai in anggur kon inimu, bo gobá in gandum inta mobogoi in topong baḻíon kaanonmu.

¹⁸Dika indongogan in ki Hizkia! Sia in tongábí monguboḷ kon i monimu takin moguman kon ki TUHAN in moposaḷamatbí kon i monimu. Degá nokoimontandon in dewa in bangusa ibanea in nokoposaḷamat kon ḻipúnea nongkon kawasaku?

¹⁹Kon onda degá in dewa mita in ḻipú in Hamat bo Arpad? Kon onda degá in dewa mita in Separwaim? Oyúon degá in namangoi noposaḷamat kon Samaria?

²⁰Dewa degá táonda in nokoimontan nopoḷuat kon ḻipúnea nongkon kawasaku? Umpaka dá ki TUHAN in mokoposaḷamat kon Yerusalem!’ ”

²¹Nokodongog kon tua, intau mita in Yerusalem diábí notubag, sin ki Datu Hizkia ain nomarenta sinbá mosia kibio-biómai.

²²Dá ki Elyakim, ki Sebna bo ki Yoah nomerak kon ḷambung monia nobaḻí tomponuot moajar in gina, bo minayá nopotaau kon i datu onu inta ain pinoguman in porwira in Asyur tatua.