Read Mongondow YESAYA 38 Bible Online

YESAYA 38 - Mongondow bible

YESAYA 38

¹Kon dodai intua doman ki Hizkia notakit gogió bo minatoi. Ki Nabi Yesaya ki adí i Amos, minayá nokipodungkuḷ kon inia bo noguman, “Ki TUHAN in nongoyow kon ki Tuang datu in moginḷapatdon kon bayongan in oaidan, sin ki Tuang datu in diádon mopia bui. Diádon moonggot in ki Tuang datu bo matoi.”

²Ki Hizkia in nomurow sinumayow kon dinding, bo nosambayang,

³“TUHAN, toropdon kon akuoi in nogundoidon kon ini-Mu takin motoindudui bo motuḻid in gina. Akuoi in umuran moḷongasi dumudui kon ibog-Mu.” Bo ki Hizkia in nongombaḷ totok.

⁴Naonda in ki Yesaya minaya, ki TUHAN in nopotabá kon inia

⁵mayá bui kon i Hizkia bo mopotaau in koyow tanaa, “Akuoi, ki TUHAN, Allah inta sinumba i Daud mogoguyangmu, nokodongogdon kon sambayangmu bo nokoontongdon kon ḷuámu. Dugangan-Kudon in umurmu mopuḷúpa bo ḻima notaong.

⁶Iko bo kotá in Yerusalem poḷuaton-Kudon nongkon i datu in Asyur. Kotá tanaa in tantú-Kubí ḷukadan.” Bo ki Yesaya in nopotabá in intau nododok kon bungai in ara kinorimok bo pinoḻeponea kon bituḷ i Hizkia sinbá mopia. Ki Datu Hizkia in noḻibó, “Onu in mobaḻí tomponuot kon ki TUHAN in mongundam kon inakó bo akuoi in motaaudon mayá kon Baḷoi TUHAN bui?”[48]

⁷Ki Yesaya in notubag, “Naa in tomponuot inta ogoi i TUHAN kon i Tuang datu kon intompodan-Neabí in dandi-Nea.

⁸Kon totundú in jam mata in singgai inta inaidan i Datu Ahas, aidan i TUHAN in oḻinownea umundok mopuḷú nogares.” Dá inumundokdon in oḻinow tatua mopuḷú nogares.

⁹Naonda in nopia mako in ki Hizkia, nomais in sia kon dondong dodayow tanaa:

¹⁰“Gumanku, bagu notombotak in umur akuoi in mustidon mayá, monimpod kon ki agat in kobiaganku kon dunia in intau minatoi.

¹¹Gumanku, akuoi in diádon mokoontong bui kon i TUHAN kon dunia, andeka moindoi kon intau kon dunia naa.

¹²Nyawaku nobontow, nodapotdon in wakutuku, ná ḷoḷaigan in gombala inta kinokai; ná didit pinongkó nongkon pakakat gogaboḷan; kon inakó kamai simpodandon i Allah in kobiaganku.[49]

¹³Kino ouput in doḷom momaḷú in akuoi mogigon kon monakit, tuḷanku naonda bo butukon in singa tobatú; kon inakó kamai ki Allah monimpodon kon kobiaganku.[50]

¹⁴Singogku in motoyokdon bo moyangkó, naonda bo ḷagapan tarangkuku mogamui. Mataku in moḷopí popisí in ḷumangag kon ḷangit, TUHAN, poḷuatdon in akuoi nongkon roriga tanaa.

¹⁵Onu in motaauku singogon? Naa in aidbí i TUHAN; diá mokosiug in akuoi popisí in morobonoḷ in gina.

¹⁶Oo TUHAN, ogoiaidon in akuoi in kobiagan in tosingogon bo aid-Mu, biódon mako akuoi mobiag tongádon kon ini-Mu.[51]

¹⁷Robonoḷ in ginaku in mobaḷuibí mobaḻí ḷunganga in gina, Iko in moposaḷamat[52] kon inakó nongkon anib; dosaku mita inampungan-Mudon komintan.

¹⁸Kon bonu in popatoi diábí in modayow kon ini-Mu, intau minatoi in diábí umandoḷ mako kon kososatia-Mu.

¹⁹Tongábí intau nobiag in modayow kon ini-Mu, ná inta inaidanku singgai in naa. Guyanga in mongonguman kon i adínea kon totuubí kon mosatia totok in Iko, o TUHAN.

²⁰TUHAN, Iko in nongundamdon kon inakó, dá kami in nopodondongdon in dodayow kon Baḷoi-Mu pinongin mokuti kon kecapi, kino ouput in kobiagan nami.”[53]