Read Mongondow YESAYA 39 Bible Online

YESAYA 39 - Mongondow bible

YESAYA 39

¹Kon dodai intua, ki datu in Babel, inta ki Merodakh Baladan ki adí i Baladan, nokodongog kon ki Datu Hizkia in bagupa nopia nongkon takit. Dá nopotabá in sia kon intau sin modia kon surat bo tombuinag kon i Hizkia.

²Ki Hizkia notomu kon totabá mita tatua takin pia in gina bo nopoontong kon i monia in bayongan in kaoyúonannea, inta buḷawan bo saḷaka, toyokayu mita bo ḷana mobondu, bo bayongan touḷut in tontaranea. Diábí in onuka in kon komaḻig bo kon sinangkub in dodatuan in diá pinoontongnea kon i monia.

³Onda intua ki Nabi Yesaya minayá nokipodungkuḷ kon i Datu Hizkia bo noḻibó, “Nongkon onda in intau mita tatua? Onu in pinoguman monia?” Ki Hizkia in notubag, “Mosia in nongkon Babel, butá moyayú.”

⁴“Moindoi kon onu in mosia kon komaḻig?” iḻibó bui i Yesaya. “Bayongan yagi-yagi,” tubag i Hizkia. “Diábí in pakakat kon bonu in pototagúan in komaḻig in diá pinoontongku kon i monia.”

⁵Bo ki Yesaya in noguman kon i datu, “Ki TUHAN Inta totok in mokawasa, noguman,

⁶‘Moiangoi in wakutunea kon bayongan in kaoyúonan kon bonu in komaḻigmu, bo inta ain sinipun in mogoguyangmu nodapot in singgai naa, diaan mayá in Babel. Diábí in kotaḷáan.

⁷Nongkon i adí bo ompumu oyúon in gamáan bo baḻíon pogawai in komaḻig sin mobantung kon i datu in Babel.’ ”

⁸Ki Datu Hizkia in notubag, “Mopia doman in koyow i TUHAN inta pinotaaumu kon inakó.” Sia in notubag natua sin irainea: “Asaḷ bo dodatuanku in umuran moaman bo modame kon bonu in akuoi mobiagpa.”