Read Mongondow YESAYA 40 Bible Online

YESAYA 40 - Mongondow bible

YESAYA 40

¹Nanaa in tosingogon i Allahmu, “Ḻipoidon, ḻipoidon in bangusa-Ku!

²Poonowdon in gina in intau in Yerusalem, pogumandon kon pononggataan kon i monia in nopaḷutdon. Taḷá monia in inampungan-Kudon,[54] dosa mita monia in ihukum-Kudon kodua noguntuḷ.”

³Oyúon in singog in nopobaḷú, “Sadiadon in daḷan kon padang gurun kon i TUHAN. Tuḻidon in daḷan kon rawang kayuon kon i Allah naton!

⁴Bayongan in oyuknea musti bumbunan, buḷud bo tombuḷudnea in tondodaion. Butá inta notombuḷud in motonḷopá, bo inta nongotangkaḻembong in ḷamagon.

⁵Dá kamuliaan i TUHAN in poniatadon; bayongan in umat in mokoontongdon. Totuu, ki TUHAN tontaní in nopodandi kon tua!”

⁶Oyúon in singog in noguman, “Popotaaudon!” Akuoi in noḻibó, “Onu in musti potaauku?” “Potaaudon kon intau tua in naonda bo bonok, naonda bo bungang inta tongá motoyong in kogaganea.

⁷Bonok in moingkag bo bungang in moḷaḷow, aka ki TUHAN mopoirup in tompot inta mopatú. Totuubí kon bangusa tatua in naonda bo bonok.

⁸Bonok in moingkag bo bungang in moḷaḷow, táe tosingogon i Allah naton in mononoibí.”

⁹Potakodon kon tudu in buḷud inta moḷantud, bo pobaḷúdon in habar mopia kon Yerusalem! Pomaḷúdon koropot, bo pobaḷúdon in habar mopia kon Sion![55] Pogumandon kon kotá mita in Yohuda kon ki Allah monia in mamangoi!

¹⁰Indoiai, ki TUHAN Allah in namangoi takin kawasa sin mogaid kon oaidan pongin ropot-Nea. Sia in sinakinan in intau mita inta ain pinoḷuat-Nea.[56]

¹¹Naonda bo gombala Sia in noḷukad kon paanan-Nea; Sia tontaní in mosipun kon i monia. Ki adí mita in domba koyotan-Nea, takin moḷukó in tosingogon Sia in modia kon i indenea mita.

¹²Ki ine in mogukur kon baḷangon takin mopomaké in ḷogú in ḻimanea, andeka mogukur kon ḷokutoi momaké in yangow? Ki ine in mogukur kon butá in dunia naa takin simbangan andeka monimbang kon buḷud bo tombuḷudnea mopomaké in simbangan bambéon?

¹³Ki ine in modia kon i TUHAN, andeka motundú kon i-Nia mobaḻí monononggina-Nea?

¹⁴Ki ine in poḻibóan i TUHAN sinbá mokouḻí kon totaau bo komangaḻean? Ki ine in mobogoi in totundú kon i-Nia sinbá mogaid moitombutung?

¹⁵Kon i TUHAN in bangusa mita in naonda bo tubig tongo totuyú kon bonu in totayuk, naonda bo ḷobud tougat kon pononimbangan; ḻibuton mita notongkai in kogaannea in ḷobud moaḷus.

¹⁶Bayongan in biag kon kayuon in Libanon diá tugat baḻíon kuruban payongon; pangkoinea mita totuu moyakag baḻíon kayu pondungú.

¹⁷Bayongan in bangusa diábí in mangaḻenea kon i-Nia, naonda bo diábí in kon tayowon-Nea.

¹⁸Dá ki ine in popotongkaianmu kon i Allah? Ki ine in inanggapmu notombatangan-Nea?

¹⁹Sia in deemanbí ná patong mita inta pinomia in mongongurig, patong inta inoḻitan in buḷawan bo pinoḻitú kon saḷaka.[57]

²⁰Intau inta diá mokotaḷui kon buḷawan andeka saḷaka,[58] momiḻí kon kayu inta diá mogampang mogoguyaat. Sia in notayak kon mogogimok inta mopia totok sin mogaid kon patong inta diá mogampang modandú.

²¹Umpaka yo diá kinotaauanmu bo diá nokodongog, bo diá pinopotaau kon inimu nongkon dungkuḷmai? Umpaka yo iko in diá momangaḻe nongkon pinomangkoianmai naonda in pinomangkoian in dunia?

²²Inta nomaḻí in nomarenta kon tudu in butá noḻimbatu, intau mita inta nogutun kon dunia naa in ontongon mongointok naonda bo pangkoḷá. Sia in nosongká kon ḷangit naonda bo daing, bo nopoatop naonda bo ḷoḷaigan sin pogutunan.

²³Binaḻí-Nea in mongongawasa mita diá kodaya, bo intau mita moḷoben kinobuḻian in kawasanea.

²⁴Mosia tua in naonda bo pinomuḷa noguod inta bagu momuká in uakatnea. Aka ki TUHAN mopoirup in tompot, moingkag in mosia bo poḷayugon naonda bo wawa.

²⁵Ki ine in inanggapmu notombatangan i Allah Inta Totok in mokudus? Ki ine i popotongkaianmu kon i-Nia?

²⁶Ḷangagdon kon ḷangit, bo taridika! Ki ine in nomaḻí kon tundi mita? Sia inta nonompia kon i monia naonda bo tontara, kinotaauan-Nea in kobayong monia, bo mogoiní kon batúannea podudui in tangoinea-tangoinea. Diábí tobatúmai in mobuḻi, popisí in moḷoben totok in kawasa i TUHAN!

²⁷Dá Israel, nongonu sin iko in mogamuibí, naonda bo ki TUHAN Allahmu in diá nonotaau kon rorigamu? Naonda bo diá indoian-Neamai in kobiaganmu, bo diá noindoimai kon hakmu?

²⁸Umpaka dá iko in diá nonotaau bo diá nokodongog? Ki TUHANbí in Allah inta mononoi, inta nomaḻí kon sinangkub in dunia. Sia in diábí kon dodai in onda in moḷopí andeka moḷungkoyó; raian-Nea in diábí motaau doḷopon.

²⁹Sia in moginropot kon intau inta moḷopí, moporigon kon gina monia inta diá kodaya.

³⁰Tayow mobiag mita in moḷopí bo moḷungkoyó ede mita in tayow mobiag in moḷabú moipintud.

³¹Táe intau inta mopongata kon i TUHAN, in mokouḻí kon ropot mobagu. Mosia in naonda bo ḷagapan boniá inta ḷumayug moonik mopongata in koḻikipnea. Mosia in moribatuk bo diábí moḷopí, mosia in mayá bo diábí moḷungkoyó.