Read Mongondow YESAYA 41 Bible Online

YESAYA 41 - Mongondow bible

YESAYA 41

¹Guman i Allah, “Kibio-biómaidon bo indongogai in Akuoi, ei intau mita inta nogutun kon butá mita inta moyayú. Posadiadon in simindog kon pongadilan, bayádon bo potaaudon in pelekaramu. Igai in kita mopoyotantan moyotakin, sin monantú mongo ki ine in banar, bo ki ine in noitaḷá.

²Ki ine in nopotabá kon pongawasa nongkon dotá pomukaan,[59] bo nobogoi kon inia in kauntungan noyo-noyodudui? Ki ine in nomaḻí kon inia nonaḷow kon bangusa mita, bo nopotungkud in datu mita kon inia? Pitownea nomaḻí kon i monia noirarit naonda bo ḷobud, piotnea nopotabud kon i monia naonda bo wawa inirup in tompot.

³Sia in tantú mondudur bo mayá takin diá in moḷamboi; moḻikat in sioḷnea, gogió diá moipuntuk in daḷan.

⁴Ki ine in nogaid kon tua mita? Ki ine in nonantú kon daḷan in bayongan inta nobaḻí? Akuoi, ki TUHAN, Akuoi in inta muna-munamai, bo inta umuran oyúon modapot in imbuitnea.

⁵Intau kon butá moyayú in mokoontong kon onu inta ain inaidan-Ku Moitaḻikokog in mosia bo mourot sin moondok, bo mosipun moyotakin bo mamangoi.

⁶Bayongan in intau mosituḷungan, bo mosirigonan kon gina.

⁷Mogogimok kon kayu moginropot kon gina in intau mongongurig kon buḷawan, intau inta monontaḷ kon logam momaké in dodupá in modayow kon intau inta monontaḷ kon datoḷan. Kainia, ‘Mopia moitutui in oaidanmu’; bodongka inirigonannea in pakú sinbá diá moḻiai.

⁸Táe iko, Israel, mogogundoi-Ku, umat inta piniḻí-Ku, iko in buí i Abraham, yobayat-Ku.

⁹Iko in ginamá-Kudon nongkon popod mita in dunia, Inoiní-Ku nongkon tampat mita inta moyayú totok. Guman-Ku, ‘Iko in mogogundoi-Ku; Akuoi in diábí mondoí kon onu inta piniḻí-Ku.’

¹⁰Dika moondok, sin takinan-Kubí in iko, dika moḻia-ḻiaw in gina, sin Akuoi in ki Allahmu. Iko in irigonan-Ku bo tuḷungan-Ku, Ḻima-Ku inta moroton in pokapit-Ku.

¹¹Indoiai, bayongan intau inta tumorú kon inimu, in taḷowon bo mooyá-oyádon. Intau mita inta moḷawang kon inimu, in moyopú bo modait kosimpatan.

¹²Iko in motayak kon intau mita inta moḷawang kon inimu, táe diá mouḻímu in mosia. Intau mita inta moparang takinmu tanaa in noyopúdon bo nobuḻídon.

¹³Sin Akuoi ki TUHAN, Allahmu, in mokadai kon ḻimamu koḷanan; Guman-Ku, ‘Dika moondok, Akuoi in motuḷungbí kon inimu.’ ”

¹⁴Guman i TUHAN, “Dika moondok, Israel, umpaka in iko mointok bo moyangkó. Akuoibí in ki TUHAN inta motuḷung kon inimu, Inta Totok in mokudus, Allah in Israel in mopoposaḷamatmu.

¹⁵Indoiaidon, iko in baḻíon-Ku naonda bo dopí poḷoḻintog, inta nobagu, moḷanit bo matanea in doyowa notundug. Iko in moḻintogbí kon buḷud mita bo morimumud kon tua; tombuḷudnea mita baḻíonmu naonda bo baḻeká.

¹⁶Uabanmubí in mosia, bo mosia in poḷayugondon in tompot bo potabudon in deḷang. Moḷungangabí in ginamu popisí in Akuoi, ki TUHAN, bo yumunggagá popisí in Akuoi, Allah in Israel.

¹⁷Aka bangusaku inta noiḷaḻe tua motayak kon tubig, bo sigogow monia in moingkag popisí in morogang, dá Akuoi, ki TUHAN, in motubagbí kon sambayang monia; Allah in Israel in diábí monaḷámai kon umat-Nea.

¹⁸Baḻíon-Ku in ongkag mita moiḻig kon tombuḷud mita inta noḷogat; Bokaká in momukábí kon yuak in toba. Padang gurun in baḻíon-Ku tabang; tubig in moitampurangbí nongkon butá inta moingkag.

¹⁹Padang gurun in pomuḷaan-Kubí kon pangkoi in ḷokuyú, pangkoi in zaitun, pangkoi in murad[60] bo pangkoi in akasia. Rawang kayuon in baḻíon-Ku kayuon moromon, kayuon in eru, nunuk bo ḷokuyú.

²⁰Dá bayongan in intau in mokoontongbí kon inia bo monotaau kon Akuoi, ki TUHAN, inta nogaid kon tua. Mosia in monaridibí bo momangaḻe, Ki Allah mokudus in Israel in nonompia kon tua.”

²¹TUHAN, datu in Israel, noguman kon dewa mita, “Pongadudon in pelekaramu, pogumandon in onu kinodoyonannea!

²²Angoidon, bo toḻindapaidon onu in mobaḻí, sinbá kotaauan nami in kopaḷutannea moiduduimai. Potaaudon in bayongan inta nobaḻí koḻipod, insilangai in mangaḻenea sinbá taridian nami.

²³Pogumandon onu in mobaḻí, sinbá kotaauan nami kon moiko in totuu ilahi. Aidaidon onu inta baraguna andeka inta mokorugi, sinbá Moitongau in kami in mokoontong.

²⁴Totuu, moiko bo oaidmu in diábí, bo mososumbamu in tongábí mokorongó.

²⁵Akuoi in nopotabádon kon intau tobatú nongkon dotá pomukaan: Inoiní-Ku in sia sin monubu nongkon dotá in utuan. Mongongawasa mita in ritakannea mangoi naonda bo yoná, naonda bo momomia kon kuyon moritak kon butá ḷamentong.

²⁶Ki ine in kon sigad monimu in ain nonoḻindap kon tua, nodapot in kami motaau mopobanar kon inia? Táe kon sigad monimu diábí in nopotaau, Diábí in nokidongog kon i monimu nosingog.

²⁷Akuoi, ki TUHAN, inta muna-munamai nopotaau kon Sion; Akuoi in nopotabá kon mododia kon habar mopia minayá in Yerusalem.

²⁸Kon tungkuḷ in sinayak-Ku kon sigad in dewa mita, diá tobatúmai in motaau mobogoi in topotundú, diá in mokotubag.

²⁹Totuu, dewa mita tatua diá in baragunanea, mosia tua in tongábí patong pinomia inta diá kodaya, bo diábí mokoaid kon onu bo onu.”