Read Mongondow YESAYA 42 Bible Online

YESAYA 42 - Mongondow bible

YESAYA 42

¹Guman i TUHAN, “Naa in mogogundoi-Ku inta binaba-Ku, intau inta piniḻí-Ku inta mokosanang kon gina-Ku. Akuoi ain nobogoi in kawasa-Ku kon inia, sin modia kon koadilan kon batúan in bangusa.

²Sia in diábí kumarak andeka momaḷú moropot, singognea in diábí kodongogan kon daḷan.

³Aog inta noikoḷungdon diábí putoḷannea, togá inta nokuyoyowdon diábí piongannea. Takin satia in sia in moponiata kon inta totuu,

⁴Diá in gagawang andeka kobuḻian in kamang, modapot in inta moadil in posindogon kon dunia. Ḻipú mita inta moyayú mokotanob kon totundúnea.”

⁵Ki TUHAN Allah in nomaḻí bo nosongká kon ḷangit; Sia in nomia kon butá bo bayongan inta nobiag kon tudunea. Sia in nobogoi kon intau in poginaan kobiagan bo nyawa. Sia in nopotaau in koyow tanaa kon mogogundoi-Nea mita,

⁶“Akuoi, ki TUHAN, in mogoiní bo mopotabá kon inimu sin mopobayá in inta moadil iko in kapiton-Ku bo ḷukadan-Ku sin mobaḻí dodandian kon umat intau, bo sindar kon bayongan in bangusa.

⁷Sin mobuká kon mata in intau bilog, bo mopoḷuat kon intau nongkon sindip in ponjara.

⁸Akuoibí in ki TUHAN, tuata in tangoi-Ku; Koagungan-Ku in diábí ogoi-Ku kon i ineka; Tangoi-Ku inta ponango-nangoian in diábí ogoi-Ku kon patong.

⁹Tanaa in inta sinoḻindap-Ku in noniatadon; Akuoi in moibog mopotaau in onu inta mobagu; kon dodai intua diápa mobaḻí, aindon muna pinoguman-Ku kon inimu.”

¹⁰Podondong in dondong mobagu kon i TUHAN, dayowdon in Sia ei sinangkub in dunia! Ponggonugurdon, ei dagat[61] bo bayongan in tombonunea, ḻipú mita inta moyayú bo bayongan in intau inta nogutun kon tua!

¹¹Pomayádon mako in padang gurun bo kotánea mita in modayow kon i TUHAN, bo intau in Kedar modayow kon i-Nia! Porogiowdon in intau mita kon kotá in Sela, bo morobaḷú nongkon tudu totok in buḷud!

¹²Yo mosia in mohoromatdon kon i TUHAN, bo mopotaaudon in tangoi-Nea kon ḻipú mita moyayú.

¹³Ki TUHAN in mayá in muna moparang naonda bo pahlawan tobatú, naonda bo tontara tobatú inta moibog totok moparang. Sia in modidí in kokow in parang, bo mopoontong in kotoyang-Nea kon musung.

¹⁴Ki Allah in noguman, “Noonggotdon in Akuoi in diá moposingo-singog; kibio-biómai in Akuoi bo nonahang kon gina. Tanaa in wakutuneadon akuoi mogaid kon oaidan-Ku, Kumarak in Akuoi naonda bo bobay inta mononggadí.

¹⁵Buḷud bo tombuḷudnea in baḻíon-Ku moḷogat, bayongan in pinomuḷanea iḷaḷowan-Ku. Ḷopá mita in ongkag binaḷuian-Ku nobaḻí padang gurun,[62] Bayongan in danow iningkagan-Ku.

¹⁶Bangusa-Ku inta bilog in kapiton-Ku pongin daḷan inta diá kinotaauan monia; mosia in diaan-Ku kon daḷan mita inta diá kinotaauan monia. Sindip baḻíon-Ku bayag kon i monia, bo daḷan inta notangkaḻembong in tondodaion-Ku. Tuata in aidan-Ku kon i monia, bo notantú bidon kon aidan-Ku.

¹⁷Intau inta mopirisaya kon patong berhala bo akúon monia nobaḻí ilah monia, in poompáanmai bo pokopooyáanmai.”

¹⁸Ki TUHAN in noguman, “Indongogaidon ei intau mita bongoḷ! Indoiaidon, ei intau mita bilog!

¹⁹Ki ine degá in mobilo-bilog nongkon Israel mogogundoi-Ku? Ki ine degá in mobongom-bongoḷ nongkon totabá-Ku?

²⁰Israel, nobayong in inontongmu, táe diá sinaridianmumai, bongoḷanmu in nobuká, táe iko in diá nokidongog.”

²¹Ki TUHAN in moibog moposaḷamat; Ibogon-Nea hukum-Nea in horomaton bo untuon.

²²Táe bangusa tatua in nodaitdon inagow; mosia in dinakop kon bonu in yuang mita kon bonu in butá, bo binuni kon bonu in ponjara mita mosia in nobaḻí kuruban pinogagowan, bo diá in namangoi notuḷung.

²³Ki ine in kon sigad monimu in moibog mokidongog kon tanaa, bo monaridi kon singgai moiduduimai?

²⁴Ki ine in nokiagow kon Israel? Ki TUHANbí tontaní! Kita naa in binaradosa kon i-Nia, Kita in diá nobiag podudui in parenta-Nea, bo diá dinumudui kon totundú-Nea.

²⁵Dá binaḻí-Nea in kita notarima kon torú-Nea inta motoyang, bo nororiga popisí in parang inta motoyang. Torú-Nea nomokak kon Israel naonda bo tuḷú, táe diá kinotaauan naton, bo diá nobalajar nongkon onu inta ain kinorasaan naton.