Read Mongondow YESAYA 43 Bible Online

YESAYA 43 - Mongondow bible

YESAYA 43

¹Israel, nanaa in guman i TUHAN, “Akuoibí in inta nomaḻí bo inta nomia kon inimu, dika moondok, iko in notantú bidon kon posaḷamaton-Ku! Akuoi in nogoinídon kon inimu pinongin tangoimu, iko in Akuoi in kitogi.

²Aka iko ḷumoḷan kon tubig yo takinan-Ku in iko, iko in diábí moḷomot kon bonu in rorigamu mita. Aka mongin tuḷú, diábí in iko mopokak, totungkuḷ mita inta mobogat in diábí mokobodito kon inimu.

³Sin Akuoibí, in ki TUHAN, Allahmu, ki Allah mokudus in Israel, mopoposaḷamatmu. Mesir in ogoi-Ku nobaḻí tontobutmu, Sudan bo Syeba in nobaḻí toḻiumu.

⁴Moḷoben in mangaḻemu kon tayowon-Ku, Akuoi in mohoromat bo motabi kon inimu; dá ogoi-Ku in intau nobaḻí toḻiumu, bangusa mita in nobaḻí toḻiu in nyawamu.

⁵Dika moondok, sin Akuoi in moḷukad kon inimu. Nongkon toyopan bo nongkon dotá in pomukaan pinotabá-Ku in ki adí bo ki ompumu mamangoi moyosipun.

⁶Pinarenta-Ku kon i utuan bo kon i toḷatan, sinbá mosia in ḷagidon buḻian. Bá ki adímu mita ḷoḷaki in mobuidon nongkon moyayú, bo ki adímu mita bobay in mobui nongkon popod mita in dunia.

⁷Sin mosia komintan ain inoiní pinodoyon kon tangoi-Ku. Mosia in binaḻí-Ku sin mohoromat kon i-Nakó.”

⁸Ki Allah in noguman, “Potabádon in mosia mamangoi in muna bangusa-Ku inta bilog, umpaka komata; inta bongoḷ, umpaka kobongoḷan.

⁹Potabádon in bayongan bangusa moyosipun bo bayongan in suku moyodondon. Ki ine in kon sigad in dewa mita monia in nopotaaudon muna kon onu inta nobaḻí tanaa? Ki ine in kon sigad monia in mokotoḻindap kon kobiagan moiduduimai? Pomayádon mako in sakusi mita monia mamangoi in muna, bo moponiata kon mosia in totuu, sinbá bayongan inta nokodongog kon i monia in moguman, kon totuubí in natua!

¹⁰Ei umat-Ku, moikobí in sakusi-Ku mita, moiko in piniḻí-Ku nobaḻí mogogundoi-Ku mita, sinbá monotaaudon kon i-Nakó bo mopirisaya kon i-Nakó, bo momangaḻedon kon Akuoibí naa in Allah. Akuoi in Allah inta totobatú tua. Diábí in ibanea mako in noiuna bo inta moiduduimai kon i-Nakó.

¹¹Akuoibí in TUHAN inta tuḷong tua, koḻikud in Akuoi diábí in moposaḷamat.

¹²Akuoi in nopotaaudon kon inimu, Akuoibí in inta moposaḷamat kon i monimu, bo deemanbí ilah ango-angoi inta kon sigad monimu; moikobí in nobaḻí sakusi-Ku mita. Bo Akuoi, Akuoi naa in Allah,

¹³modapot in mononoi Akuoi in umuranbí Allah. Diábí in mokoḷagui nongkon kawasa-Ku, andeka moḷamboi kon tomayá-Ku.”

¹⁴Ki TUHAN in mopoposaḷamatmu, Inta Mokudus Israel, noguman, “Popisí in moiko, Akuoi nopotabá in tontara minayá in Babel, bo dinangatan-Ku in bonoboi mita in ngara mita in ponjara; giow mita in intau in Kasdim binaḷuian-Ku nobaḻí amui.

¹⁵Akuoibí in TUHAN, Allahmu Inta Mokudus, Datumu, inta nomaḻí kon inimu, ei Israel!”

¹⁶Ki TUHAN in nomiadon kon daḷan tobatú nongin dagat, nongin tubig inta nobokoḷ.

¹⁷Sia in nopotabá in tontara bo porwira-Nea mita noparang, bo mosia in minayá nomaké in kereta inugut in kabaḷo. Táe noḷabú in mosia, diádon nokobangon bui, mosia in minatoi naonda bo sumbu inta nopiong.

¹⁸Ki TUHAN in noguman, “Diá in mangaḻenea in monorop kon sempo inta ain kinotaḻiban, diábí in mangaḻenea in monorop kon inta ain noiuna.

¹⁹Taridiaika, Akuoi in nogaidon kon inta mobagu; tanaa in momangkoidon, diá degá inontongmu? Akuoi in momiabí kon daḷan kon padang gurun, bo ongkag mita kon rawang kayuon.

²⁰Biag kaḻig in mohoromatbí kon i-Nakó; serigala bo ḷagapan unta in modayowbí kon i-Nakó sin Akuoi in nogiḻig kon tubig kon padang gurun, bo ongkag mita kon rawang kayuon sin mopoinum kon umat inta piniḻí-Ku.

²¹Mosiabí tua in bangusa inta binaḻí-Ku kon i-Nakó: sinbá motaau mopotaau in dodayow kon i-Nakó.”

²²Ki TUHAN in noguman, “Táe iko Israel, diá nosumba kon i-Nakó, bo diádon nogundoi kon i-Nakó.

²³Iko in diábí nodia kon domba sin ogoi mobaḻí kuruban payongonmu, diá nohoromat kon i-Nakó takin nobogoi in sosumbamu. Bokaka Akuoi in diábí nopororigamai kon inimu pinongin kuruban, andeka nopororigamai kon inimu pinongin noigum kon kamania.

²⁴Iko in diábí notaḷui kon dupa mobondu ogoi kon i-Nakó, diá nopoguḻí kon i-Nakó in ḷongó in kuruban inta iratámu. Táe noyoḻiudon, iko in nokibabadon kon i-Nakó in dosamu mita, nopororigamai kon i-Nakó takin taḷámu mita.

²⁵Táe Akuoi in ki Allah inta nomopat kon dosamu, Inampungan-Ku in iko sin natuabí in sipat-Ku; Akuoi in diá bidon tantú monorop kon dosamu mita.

²⁶Poponoropdon kon i-Nakó, igai in kita mayá in pongadilan, pongadudon in pelekaramu sinbá moniatadon kon iko in totuu.

²⁷Mogoguyangmu inta muna[63] aindon binaradosa, itoimu mita in nomarontakdon kon i-Nakó,

²⁸Imangmu mita in nopokotordon[64] in baḷoi-Ku. Dá Israel in inogoi-Ku sin poompáanmai, buí i Yakub in pinomayá-Kudon mako iyompat.”