Read Mongondow YESAYA 44 Bible Online

YESAYA 44 - Mongondow bible

YESAYA 44

¹Ki TUHAN in noguman, “Indongogaidon, ei Yakub mogogundoi-Ku, ei Israel, umat inta piniḻí-Ku!

²Akuoibí in ki TUHAN inta nomaḻí kon inimu, inta nomia kon inimu nongkon bonupa in sian, bo inta notuḷung kon inimu. Dika moondok, iko in mogogundoi-Ku, umat inta piniḻí-Ku inta kinotabi-ku.

³Sin Akuoi in mopobutakbí in tubig kon butá inta noingkag, bo mopoiḻig in ongkag mita kon butá inta nongoguang. Akuoi in mobogoibí in kawasa-Ku kon buímu, bo momarakat kon adí bo ompumu.

⁴Mosia in mobiagbí moḷumbá naonda bo bonok kon diug in tubig, naonda bo pangkoi in gandarusa kon bingkí in ongkag.

⁵Mopobatu-batúandon inta mongaku kon Akuoi in kitogi kon inia, bo mamangoi dumugang kon buí i Yakub. Mopobatu-batu in momais kon ḻimanea: Kapunyaan i TUHAN, bo tumangoi noituot kon umat i Allah.”

⁶Naa in guman i TUHAN Inta Totok in Mokawasa, Datu bo moḷoḷukad in Israel, “Akuoi in Allah inta tongá totobatú, Inta muna-munamai bo inta imbuitnea totok.

⁷Ki ine in ná Akuoi? Pokipongakuaidon in sia! Pomayádon mako in sia mopotaau bo moponiata kon i-Nakó! Ki ine in nonoḻindapdon kon onu in mobaḻí kon singgai moiduduimai nongkon pinomangkoian nodapot in singgai imbuitnea?[65]

⁸Bangusa-Ku, dika moondok andeka moitaḻikokog; sin nongkon dungkuḷmaipabí nodapot in tanaa Akuoi in nonoḻindapdon kon onu in mobaḻí? Moiko in sakusi-Ku mita. Moḷoḷukad ibanea in diábí bo diábí kinotaauan-Ku.”

⁹Intau mita inta nogaid kon patong berhala tua in diábí in mangaḻenea, bo dewa mita inta sinumba monia tua diá in baragunanea. Intau mita inta mosumba kon patong tatua in bilog bo diá nonotaau in onu bo onu, tuamai mosia in mooyábí.

¹⁰Diábí in baragunanea in mogaid kon patong pinomia inta iḷoḷang bo sinumba nobaḻí dewa!

¹¹Totuu, bayongan in intau inta nosumba kon patong in mooyábí. Intau inta nogaid kon patong tua in intaubí doman biasa. Pokisindogaidon in mosia moyotakin; yo notantú bidon kon mosia in moondokbí bo mooyá.

¹²Mononontaḷ in mogamá kon logam topongkó bo tubáannea dongka tontaḷon in bobibil. Tua in inaidannea takin bayongan in ropot kon inia. Koyogot in mogaid, gogoyon in sia, morogang bo moḷopí.

¹³Mogogimok kon kayu in mogukur kon kayu. Gambaronnea in kapur onu in aidannea bo kurigonnea in pakakatnea bo aidannea patong in intau inta moḷunat, bo ukatonnea kon bonu in baḷoinea.

¹⁴Dika-dika bo kayu inta pinakénea in kayu ḷokuyú, pangkoi in eru andeka pangkoi in terpentin inta pinupuḷnea kon kayuon. Degá nomuḷa doman in sia kon pangkoi in salam, bo nogoḷat kon uyan inta mopobiag.

¹⁵Tongosilai in pangkoi in kayu tatua pinomia kayu pondungú sin ponayangan bo potubáan kon roti bo pogangagan kon ponoyá, bo mopuasdon in sia. Sia in monayang bo moguman, “O, mopiabí totok bo moanai! Totuu mokosanang in tuḷú tanaa!” Ki agat in kayu tatua in inaidannea patong. Sia in kumudung mosumba bo mosambayang, “Ikobí in ilahku, posaḷamatdon in Akuoi!”

¹⁸Totuu mobodok in intau mita ná tatua! Mosia in momilog kon mata bo gina monia dá diá momangaḻe kon onu bo onu.

¹⁹Mogogaid kon patong tatua in diábí norai, “Kayu tatua topongkó in sinubáku, bo buingnea in pinakéku pinotubáan kon roti bo pinoangagan kon ponoyá sin kaanonku. Bo kiagat in kayu tatua in inaidanku patong. Dá tanaa akuoi in nosumbabí kon kayu topongkó!”

²⁰Aid natua in notongkaibí in nokaan kon ḷobud. Intau tatua in pinoḷaḻe in raiannea inta bodok, nodapot in sia in diádon kinotuḷungan bui. Sia in diábí mokopongaku kon patong inta kinadaiannea tatua in tongábí pongakaḷ.

²¹Ki TUHAN in noguman, “Toropdon in naa komintan, ei Israel, sin iko in mogogundoi-Ku. Akuoi in nomia kon inimu, bo iko in mogogundoi-Ku, Israel, diábí koḻiongan-Ku in iko!

²²Taḷámu in buntunon-Ku naonda bo goḷom, dosamu in untunon-Ku naonda bo topuot. Pobuidon mangoi kon i-Nakó, sin iko in pinoḷuat-Kudon!”

²³Porogiowdon moḷunganga, ei ḷangit, porogiowdon, ei bonu in butá! Porogiowdon takin ḷunganga in gina, ei buḷud mita! Natua doman in kayuon bo bayongan in pangkoi in kayu kon bonunea! Sin ki TUHAN in nopoontongdon in kamuliaan-Nea pinongin notobut kon Israel umat-Nea.

²⁴Nanaa in guman i TUHAN mopoposaḷamatmu inta nomia kon inimu pinangkoi kon bonupa in sian, “Akuoibí in ki TUHAN inta nomia kon bayongan yagi-yagi, inta tongá aku-akuoi mita in nosongká kon ḷangit, bo diábí in noduḷu nomaḻí kon butá.

²⁵Akuoibí naa inta noḷamboi kon toḻindap in mononoḻindap, bo inta nopoyambá kon mogogoiní mita. Tosingogon mita in intau mobijak binayowan-Ku, kabijaksanaan monia binaḻí-Ku kabodokan.

²⁶Akuoibí in noginrigon kon tosingogon in mogogundoi-Ku, bo nopobayá in tomayá inta pinoniata in totabá-Ku, Akuoi in noguman kon Yerusalem in pogutunanbí bui, bo kotá mita in Yohuda in posindogon-Kubí bui; rumbunnea mita in buibí tompiaan.

²⁷Akuoibí inta noguman kon apad in dagat: Kogiotdon! Moibog in Akuoi monggiot kon ongkagmu mita.

²⁸Akuoibí inta noguman kon i Kores, ‘Ikobí inta momarenta sin kopontingan-Ku, bo mogaid kon bayongan inta kinoibog-Ku. Parentadon sinbá Yerusalem posindogon bui, bo Baḷoi TUHAN aidandon in kinodoyonannea.’ ”