Read Mongondow YESAYA 46 Bible Online

YESAYA 46 - Mongondow bible

YESAYA 46

¹Naa in kopaḷutan in dewa mita in Babel; dungkuḷmai patong i Bel bo i Nebo sinumba, táe tanaa in dinatogdon kon ḻikud in bobiagon, nobaḻí dodiaan in bobiagon inta moḷopí.

²Patong mita tatua in diábí mokotuḷung kon momotaannea, mosia tontaní in inakut nobaḻí inta dinakop. Tuata in kopaḷutan monia.

³Indongogaidon in Akuoi, ei buí i Yakub, moiko komintan inta tonggagat in umat-Ku. Akuoi in nomiagdon kon i monimu pinangkoipamai kon moiko pinononggadí.

⁴Akuoi in umuranbí ki Allahmu modapot in moiko mogoguyang; bo umuran moḷukad kon i monimu modapot in moiko ubanan. Akuoi in nopobaḻí kon i monimu bo umuran moḷukad, Akuoi in motuḷungbí bo moposaḷamat kon i monimu.

⁵Ki ine in popotongkaianmu kon i-Nakó? Oyúon degá in motaau potongkaion kon i-Nakó?

⁶Intau mobuká kon dompet bo mogundak kon buḷawannea bo monimbang kon saḷakanea momaké in simbangan. Monondan in sia kon mononontaḷ kon buḷawan sin momia kon patong berhala, bo mosumba in sia kon patong inta pinomianea tontaní.

⁷Patong tatua in pinakú bo inukat kon tampatnea, patong tatua in simindog mako kon tua bo diá mokopomamping. Aka intau mosambayang kon inia, diábí tubagannea, bo diábí mokoposaḷamat kon inia nongkon roriganea.

⁸Toropdon bo rai-raidon, ei intau mita moraat!

⁹Toropdon in inta nongobaḻí dungkuḷmai; Akudon kon Akuoi in Allah, bo diábí in ibanea mako, Akuoi in Allah, bo diábí in ná Akuoi.

¹⁰Nongkon pinomangkoianmai pinotaau-Kudon in onu inta mobaḻí kon singgai moiduduimai, nongkon dungkuḷpabímai ain sinoḻindap-Ku onu in mobaḻí. Guman-Ku: Onu inta ain sinantú-Ku in mobaḻíbí, onu in koibog-Ku in notantúbí kon aidan-Ku!

¹¹Akuoi in mogoiní kon mongongawasa tobatú nongkon dotá in pomukaan[66] sia in mamangoi naonda bo ḷagapan turá sin mopobayá in onu inta ain siningog-Ku Onu in inta ain siningog-Ku notantúbí kon aidan-Kubí, onu in sinomayá-Ku notantú bidon kon pomiaan-Ku.

¹²Indongogaidon in Akuoi, ei intau mita moḷoḷatú, moiko inta noguman kon kauntungan in noyayúpabí.

¹³Akuoi in mopodiug bidon kon singgai popoḷuatan, kasaḷamatan inta ogoi-Ku in diá bidon mobaḷui. Akuoi in moposaḷamatbí kon Yerusalem, bo mobogoi in kahoromatan kon Israel.”