Read Mongondow YESAYA 47 Bible Online

YESAYA 47 - Mongondow bible

YESAYA 47

¹Ki TUHAN in noguman, “Ei, Babel, poponagdon nongkon pomomarentaanmu, bo ḻitúdon kon tudu in ḷobud. Iko in diá bidon mosoing bo mopia ná dungkuḷmai.

²Giḻingdon in topong bo batu; bukádon in koḷubungmu, bingkatdon in ḷambungmu modapot in koontongan in bosiotmu, bo ḷoḷanaidon in ongkag mita.[67]

³Intau in mokoontongbí kon inimu momilang, singkuḻeon bo pokopooyáanmai Akuoi in totuubí kon motuḻí kon oaidmu, bo diábí in tobatúmai in taḻiban-Ku.”

⁴Ki Allah mokudus in Israel in mopoḷuat kon i naton, tangoi-Nea in ki TUHAN Inta Totok in mokawasa.

⁵Ki TUHAN in noguman kon Babel, “Kibio-biómaidon, bo tuotdon kon bonu in sindip. Iko in diá bidon bui tangoion ‘Bokí in dodatuan mita.’

⁶Koḻipod in Akuoi in sinumorú kon umat-Ku, mosia in inanggap-Kudon deeman Akuoi in kitogi. Mosia in inogoi-Kudon kon inimu, bo iko in diábí notabi kon i monia, nodapot inta nongogoguyangdon totok in dinorotmu takin diá in tabi.

⁷Kainimu kamai dá iko in mobaḻíbí bokí kinoouput in kobiagan, bo diábí kinotaauan andeka diá norai kon kopaḷutannea.

⁸Tuamai in indongogaidon in Akuoi, ei iko inta moibog momatuk kon kasanangan! Kainimu kamai dá moamanbí in kobiaganmu, bo diábí in ná iko. Kainimu kamai dá iko in diábí mobaḻí dongkadon boba-bobay, bo buímu in diá moyopú.

⁹Táe tongábí tokokiap monag, tongo singgai, doyowa tua in mobaḻí moyododai. Umpaka iko mopomaké in sihir bo sinotaau, yo ki buḷoimu bo ki adímu in gamáanbí doman.

¹⁰Kainimu iko in moaman aka mogaid kon inta moraat, kainimu kamai dá aidmu tatua in diábí sinontongan mako. Iko in pinoḷaḻe in kabijaksanaan bo sinotaaumu, kainimu kamai diábí in ná iko.

¹¹Táe iko in koantuganbí in bodito, totaau in sihirmu diábí mokopoḷagui kon inia. Iko in angoionbí in bodito, bo diábí mokotongod in monayow. Koyopúan in daḻídon moiangoi, bo diábí muna kinoraianmu.

¹²Tantúdon aidai in sinotaaumu bo sihirmu, inta mokororiga kon inimu nongkon mongoadíanpamai. Dika-dika tua in baraguna kon inimu, mopogogondok kon musungmu mita.

¹³Iko in nororigadon popisí in nobayong in tonggina. Potabádon in mononoḻindap mita simindog moposaḷamat kon inimu; mosia inta ain nonaridi kon sinangkub in siup in ḷangit bo nobalajar kon kaadaan in tundi mita, bo kon pomuḷoi in buḷan mobagu monoḻindap kon onu[68] inta mobaḻí ukurmu.

¹⁴Indoiai, mosia in naonda bo wawa inta kinaan in tuḷú; diábí in mosia mokoposaḷamat kon awak monia tontaní! Dokot in tuḷú tatua totuubí mopatú kon i monia, deemanbí tuḷú mointok inta mopia ponayangan.

¹⁵Tuata in mangaḻenea in mononoḻindap kon inimu inta mokopororigamai kon inimu nongkon mointokanpamai; kon batúannea mayá monaḷámai kon inimu; diábí in mamangoi motuḷung kon inimu.”